సోషల్ మీడియాలో తప్పుడు ప్రచారం చేస్తే చట్టపరమైన చర్యలు: టీటీడీ ఈవో హెచ్చరిక

టీటీడీ ఈవో ధర్మారెడ్డి అలిపిరి నడక మార్గంలో మండపం నిర్మాణంపై క్లారిటీ ఇచ్చారు. 16వ శతాబ్దంలో అప్పటి రాజులు శ్రీవారి దర్శనానికి వెళ్లే భక్తులు విశ్రాంతి తీసుకునేందుకు నడక మార్గానికి ఇరువైపులా రెండు రాతి మండపాలు నిర్మించినట్లు తెలిపారు. ఈ మండపాలలో ఒకటి శిధిలావస్థకు చేరుకున్నదని, ఈ మండపాన్ని గతంలో ఇదివరకే ఒకసారి మరమ్మతులు చేశారని తెలిపారు. ప్రస్తుతం ఈ మండపానికి మరమ్మతులు చేసేందుకు కూడా వీలుకాదని టీటీడీ ఇంజనీరింగ్ విభాగం వారు ఇచ్చిన నివేదిక అనుసరించి దీనిని పునర్ నిర్మించాలని టీటీడీ నిర్ణయించిందన్నారు. ఇందులోని రాతి స్తంభాలు, పై కప్పును పునర్నిర్మాణంలో వినియోగిస్తామన్నారు. ఈ మండపం వెనుక వైపున గోడ పూర్తిగా కూలిపోయిందని మండపంలోనికి భక్తులు వెళ్లకుండా ఫెన్సింగ్ ఏర్పాటు చేసినట్లు వివరించారు.

16వ శతాబ్దంలో సాళువ నరసింహరాయులు ఈ మండపాన్ని నిర్మాణం చేశారని.. రూ. 136 లక్షల తో పునర్ నిర్మాణం చేస్తున్నామన్నారు. మొత్తం 20 పిల్లర్లతో యదావిథిగా పునర్ నిర్మాణం చేస్తున్నామని తెలిపారు. ఇదే విధంగా గతంలో తిరుమలలోని పార్వేటి మండపం శిధిలావస్థకు చేరుకున్నందున పునర్ నిర్మించినప్పుడు కూడా కొన్ని సామాజిక మధ్యమాలలో, కొందరు వ్యక్తులు టీటీడీ పై దుష్ప్రచారం చేశారన్నారు. దీనివలన భక్తుల మనోభావాలు దెబ్బతింటుందని ఇకపై ఇలాంటి దుష్ప్రచారం చేసే వ్యక్తులపై కఠిన చర్యలు తీసుకుంటామన్నారు.

నడక మార్గంలో చిరుతలు సంచారం తగ్గడంతో కొన్ని ఆంక్షలు సడలించామన్నారు. అందుకే తిరుమల ఘాట్ రోడ్‌లో బైకుల్ని రాత్రి పది గంటల వరకు అనుమతిస్తున్నామన్నారు. నడక దారిలో మధ్యాహ్నం 2 గంటల తర్వాత చిన్నపిల్లల్ని అనుమతించడంపై అటవీ శాఖ నుంచి ఆదేశాలు రాలేదన్నారు. కంచె నిర్మాణం పై వైల్డ్ లైఫ్ అధికారులు రిపోర్ట్ ఇంకా ఇవ్వలేదని.. అటవీ జంతువుల కదలికలపై ఎప్పటి కప్పుడు నిఘా ఉంచామన్నారు. సీసీ కెమెరాలు, ట్రాప్ కెమెరాలతో నిరంతర పర్యవేక్షణ చేస్తున్నామన్నారు. ఇప్పటికే ఆరు చిరుతల్ని బంధించిన విషయాన్ని కూడా గుర్తు చేశారు.

గతంలో తిరుమల పాపవినాశనం మార్గంలో ఉన్న పార్వేట మండపం విషయంలో దుష్ప్రచారం జరిగింది. ఈ మండపం పురావస్తు శాఖకు చెందినదని జరుగుతున్న ప్రచారంలో నిజం లేదని క్లారిటీ ఇచ్చారు. ప్రతిఏటా పార్వేట ఉత్సవంతో పాటూ కార్తీక వనభోజనాల సమయంలో శ్రీవారిని ఈ మండపానికి తీసుకొచ్చి వేంచేపు చేస్తారని టీటీడీ తెలిపింది. భక్తులు కూడా మండపానికి వస్తారని.. కూలిపోయే ప్రమాదం ఉందనే పునర్ నిర్మించినట్లు తెలిపారు.

కానీ సోషల్ మీడియాలో జరుగుతున్న ప్రచారంపై టీటీడీ స్పందించింది. కొందరు ఉద్దేశపూర్వకంగా దుష్ప్రచారం చేస్తున్నారని.. భక్తులు అవాస్తవాలను నమ్మొద్దని కోరింది టీటీడీ. ఈ మండపం పురాతనమైనది.. ఎందుకు కూల్చేస్తున్నారని రాజకీయ పార్టీల ుంచి కూడా అభ్యంతరాలు వచ్చాయి. దీంతో టీటీడీ స్పందించి క్లారిటీ ఇచ్చింది. ఇప్పుడు అలిపిరిలో కూడా మరో మండపాన్ని పునర్ నిర్మించేందుకు సిద్ధమవుతున్నారు. ఈ క్రమంలోనే టీటీడీ ఈవో ధర్మారెడ్డి ముందుగానే క్లారిటీ ఇచ్చారు.