తిరుపతి బాలుడి కిడ్నాప్ కేసు..ఎట్టకేలకు సుఖాంతం

తిరుపతి ఆర్టీసీ బస్టాండులో కలకలం రేపిన రెండేళ్ల బాలుడి కిడ్నాప్ వ్యవహారం సుఖాంతమైంది. గంటల వ్యవధిలోనే పిల్లాడి జాడను గుర్తించిన పోలీసులు... క్షేమంగా అతణ్ని కన్నవారి ఒడికి చేర్చారు. దీంతో అందరూ ఊపిరి పీల్చుకున్నారు. అయితే బాలుడిని ఎత్తుకెళ్లింది సుధాకర్ అనే వ్యక్తిగా పోలీసులు గుర్తించారు. ఆ కేసు వివరాలను జిల్లా ఎస్పీ పరమేశ్వర్ రెడ్డి మీడియాకు వివరించారు. చెన్నై‌లోని వరసవక్కానికి చెందిన రామస్వామి చంద్రశేఖర్ కుటుంబం సోమవారం తిరుమల శ్రీవారిని దర్శనం చేసుకుంది. అనంతరం తిరుమల నుంచి తిరుపతికి చేరుకుంది. అయితే ఊరు వెళ్లేందుకు రాత్రి సమయంలో బస్సులు అందుబాటులో లేకపోవటంతో రామస్వామి.. భార్యా, ఇద్దరు కుమారులతో కలిసి తిరుపతి బస్డాండులోనే నిద్రపోయారు. అయితే తెల్లవారుజామున మెళకువ వచ్చి చూసేసరికి చిన్న కుమారుడు, రెండేళ్ల మురుగున్ వారికి కనిపించలేదు. దీంతో బస్టాండ్ మొత్తం వెతికిన రామస్వామి కుటుంబం చివరకు పోలీసులను ఆశ్రయించింది. బాధితుల ఫిర్యాదుతో రంగంలోకి దిగిన పోలీసులు సీసీటీవీ ఫుటేజీ పరిశీలించగా.. తెల్లవారుజామున రెండున్న ర గంటల సమయంలో ఓ వ్యక్తి బాబును తీసుకెళ్లినట్లు గుర్తించారు. వెంటనే బృందాలుగా ఏర్పడి గాలింపు చర్యలు చేపట్టారు.

ఆర్టీసీ బస్‌స్టాండ్ నుంచి బాలుడిని ఎత్తుకెళ్లిన సుధాకర్ అనే వ్యక్తి.. తెల్లవారేసరికి తన ఫొటోను సోషల్ మీడియాలో వైరల్‌ చేశారు. ఇది గమనించి అర్ధరాత్రి మూడు గంటల సమయంలో ఏర్పేడు మండలం మాధవ మాల గ్రామంలో ఉన్న తన అక్క ధనమ్మ ఇంటికి మురుగున్‌ను తీసుకెళ్లాడు. పిల్లాడిని తన స్నేహితుడి కుమారుడిగా చెప్పిన సుధాకర్.. వేరే వాళ్ళు డబ్బు ఇవ్వాలని.. అక్కడికి వెళ్లి తీసుకుని వస్తానని చెప్పి అక్కడి నుంచి వెళ్లిపోయాడు. అయితే మంగళవారం ఉదయం ధనమ్మ ఇంటిముందు ఆడుతున్న రెండేళ్ల బాలుడిని గ్రామస్తులు గుర్తించారు. చిన్నారి గురించి టీవీల్లో వార్తలు చూసిన గ్రామస్థులు.. అతనే తప్పి పోయిన బాలుడని గుర్తించారు. ఈ విషయం మాధవమాల సర్పంచ్ వరకూ చేరగా.. ఆయన పోలీసులకు సమాచారం అందించారు. దీంతో ఏర్పేడు సీఐ శ్రీహరి తన సిబ్బందితో వెళ్లి రెండేళ్ల బాలుడితో పాటు ధనమ్మను పోలీస్ స్టేషన్‌కు తీసుకువచ్చారు.

సర్పంచ్ సమక్షంలో ధనమ్మ ఏర్పేడు పోలీసులకు అప్పగించింది. అక్కడి నుంచి తిరుపతి ఎస్పీ కార్యాలయానికి బాలుడిని తీసుకొచ్చి తల్లిదండ్రుల చెంతకు చేర్చారు. బిడ్డను చూడగానే తల్లిదండ్రులు ముద్దులు పెడుతూ సంబరపడ్డారు. అనంతరం చిన్నారిని తల్లిదండ్రులకు అప్పగించటంతో అందరూ ఊపిరిపీల్చుకున్నారు. మరోవైపు చిన్నారిని కిడ్నాప్ చేసిన సుధాకర్ కోసం పోలీసులు గాలిస్తున్నారు. తనకు, తన అక్కకు పిల్లలు లేకపోవడంతోనే సుధాకర్ బాలుడిని అపహరించినట్లు గుర్తించారు.