ఏపీ హైకోర్టులో నారా లోకేష్‌కు ఊరట

ఏపీ హైకోర్టులో టీడీపీ జాతీయ ప్రధాన కార్యదర్శి నారా లోకేష్‌కు ఊరట లభించింది. ఫైబర్‌ గ్రిడ్‌ టెండర్ల అక్రమాలు జరిగాయనే ఆరోపణలతో మంగళగిరి సీఐడీ పోలీసులు నమోదు చేసిన కేసులో ముందస్తు బెయిలు కోసం లోకేష్ మంగళవారం హైకోర్టులో లంచ్‌ మోషన్‌ పిటిషన్‌ దాఖలు చేశారు. లోకేష్ తరఫు లాయర్ 41ఏ నోటీసు పేరుతో పిలిచి అందులోని నిబంధనలకు కట్టుబడలేదనే సాకుతో అరెస్టు చేసే ప్రమాదం ఉందని కోర్టుకు విన్నవించారు. 41ఏ(3)(4) నిబంధనలను ఒకేసారి సూచిస్తూ నోటీసు ఇస్తున్నారన్నారు. సమాచారం తీసుకురావాలని పోలీసులు కోరుతున్నారని.. నోటీసులోని అంశాలకు కట్టుబడలేదనే కారణం చూపుతూ అక్రమ అరెస్టులు చేస్తున్నారని తెలిపారు. పిటిషనర్‌ తండ్రి చంద్రబాబు పేరును స్కిల్‌ డెవలప్‌మెంట్‌ కేసులో అకస్మాత్తుగా చేర్చి ఒక్కసారిగా అరెస్టు చేశారన్నారు.

ఫైబర్‌ గ్రిడ్‌ కేసులో ఇప్పటి వరకు లోకేష్‌ పేరు నిందితుల జాబితాలో లేదని గుర్తు చేశారు న్యాయవాది. 2021లో నమోదు చేసిన కేసని..పిటిషనర్‌కు ఇప్పటి వరకు ఎలాంటి నోటీసు ఇవ్వలేదు అన్నారు. రాజకీయ కారణాలతో లోకేష్‌ పేరును లాగుతున్నారని.. ఈ అంశాల్ని దృష్టిలో పెట్టుకొని అరెస్టు విషయంలో తొందరపాటు చర్యలు తీసుకోకుండా సీఐడీని నిలువరించాలని కోరారు. అయితే ఇప్పటి వరకు నారా లోకేష్ (పిటిషనర్‌) ఈ కేసులో నిందితుడిగా లేరని ఏజీ శ్రీరామ్ స్పష్టంచేశారు. ఒకవేళ లోకేష్‌ను నిందితుల జాబితాలో చేరిస్తే సీఆర్‌పీసీ సెక్షన్‌ 41ఏ ప్రకారం నోటీసు ఇచ్చి విచారణ చేస్తామన్నారు. 41ఏ నోటీసు నిబంధనలను తప్పకుండా పాటిస్తామని కోర్టుకు తెలిపారు. ఈ కేసులో అరెస్టు అవసరం లేదని దర్యాప్తు అధికారి భావిస్తున్నారు కాబట్టే 41ఏ నోటీసు ఇవ్వాలని నిర్ణయించారన్నారు. ఏజీ చెప్పిన వివరాలను నమోదు చేసిన న్యాయమూర్తి 41ఏ నిబంధనల మేరకు నడుచుకోవాలని సీఐడీని ఆదేశించారు.ఈ పిటిషన్‌పై విచారణను ముగించారు.

మరోవైపు అమరావతి ఇన్నర్‌ రింగ్‌రోడ్డు కేసులో సీఐడీ ఇచ్చిన నోటీసులపై కూడా లోకేష్ హైకోర్టును ఆశ్రయించారు. మంగళవారం లంచ్ మోషన్ పిటిషన్ దాఖలు చేశారు. ఈ కేసు వ్యవహారంలో హెరిటేజ్‌ ఫుడ్స్‌ బ్యాంకు ఖాతా వివరాలు, భూ లావాదేవీల వివరాలు తీసుకొని ఈ నెల 4న తమముందు హాజరుకావాలని సీఐడీ ఇచ్చిన 41ఏ నోటీసులోని కొన్ని అంశాలపై అభ్యంతరం వ్యక్తం చేశారు. పిటిషనర్‌ హెరిటేజ్‌ సంస్థలో షేర్‌హోల్డర్‌ మాత్రమేనన్నారు లోకేష్ తరఫు లాయర్. ఆయన దగ్గర లేని డాక్యుమెంట్లను సీఐడీ కోరుతోందన్నారు. అవి ఇవ్వాలంటే ముందుగా హెరిటేజ్‌ సంస్థకు పిటిషనర్‌ దరఖాస్తు చేయాల్సి ఉంటుందన్నారు. ఆ డాక్యుమెంట్లతో బుధవారం విచారణకు హాజరుకావడం సాధ్యం కాదన్నారు. తాము కోరిన వివరాలు ఇవ్వలేదనే కారణంతో సీఐడీ.. పిటిషనర్‌ను అరెస్టు చేసే ప్రమాదం ఉందన్నారు. ఈ అంశాల్ని దృష్టిలో పెట్టుకొని సీఐడీ ముందు హాజరయ్యే విషయాన్ని వారానికి వాయిదా వేయాలన్నారు.

విచారణ నిమిత్తం ఈ నెల 10న సీఐడీ ముందు హాజరుకావాలని టీడీపీ జాతీయ ప్రధాన కార్యదర్శి నారా లోకేష్‌ను హైకోర్టు ఆదేశించింది. అలాగే విచారణ సమయంలో లోకేష్‌తో పాటు లాయర్‌ను అనుమతించాలని సీఐడీకి కోర్టు స్పష్టంచేసింది. ఫలానా డాక్యుమెంట్లు తీసుకురావాలని పిటిషనర్‌ను ఒత్తిడి చేయొద్దని సీఐడీని ఆదేశించింది. ఉదయం 10 నుంచి సాయంత్రం 5లోపు మాత్రమే విచారణ చేయాలని.. మధ్యాహ్నం ఓ గంట భోజన విరామం ఇవ్వాలని పేర్కొంది. విచారణ సమయంలో న్యాయవాదిని అనుమతించేందుకు అభ్యంతరం లేదన్నారు సీఐడీ తరఫు లాయర్.హెరిటేజ్‌ సంస్థకు చెందిన డాక్యుమెంట్లతో రావాలని పిటిషనర్‌ను బలవంతం చేయబోమన్నారు. ఇతర నిందితులతో కలిపి ఈ నెల 4న విచారణ చేయాల్సిన అవసరం ఉందన్నారు. అంత అత్యవసరంగా 4న విచారణ చేయాల్సిన అవసరం ఏముందని న్యాయమూర్తి ప్రశ్నించారు. ఈ నెల 10న సీఐడీ ముందు హాజరు కావాలని లోకేష్‌ను ఆదేశించారు.