రూ.100 పెట్టి కొన్న టిక్కెట్టుకు కోటిన్నర లాటరీ.. ఇద్దరు స్నేహితులను వరించిన అదృష్టం

ఇద్దరు స్నేహితులను అదృష్టం వరించింది రాత్రికి రాత్రే లక్షాధికారులయ్యారు. వారు కొనుగోలుచేసిన టిక్కెట్‌కు కోటిన్నర లాటరీ తగిలింది. పంజాబ్ ప్రభుత్వం నిర్వహించిన లాటరీలో ఫాజిల్కా జిల్లాకు చెందిన ఇద్దరు స్నేహితులు విజేతలుగా నిలిచారు. బోహర్‌ పట్టణానికి చెందిన రమేశ్‌ సింగ్, జోగిందర్ కుకీ అనే ఇద్దరు స్నేహితులు. వీరిలో జోగిందర్ చిన్న బట్టల దుకాణం నడుపుతుంటారు. ఈ ఇద్దరూ కలిసి గత 14 ఏళ్లుగా లాటరీ టికెట్లు కొనుగోలు చేస్తూ తమ అదృష్టాన్ని పరీక్షించుకుంటున్నారు. వీరు కొన్న టిక్కెట్లకు చాలా సార్లు చిన్న చిన్న బహుమతులు వచ్చాయి. ఒకసారి రూ.45,000, మరోసారి రూ.20,000 లాటరీ వచ్చింది. ఈ నేపథ్యంలో ఇటీవల రెండు రూ.100 టికెట్లను సంయుక్తంగా కొనుగోలు చేశారు.

ఆదివారం రాత్రి విడుదలైన ఫలితాల్లో వీరి కొనుగోలు చేసిన ఓ టికెటుకురూ.కోటిన్నర లాటరీ వరించింది. తమ టిక్కెట్‌కు లాటరీ వరించిందనే విషయాన్ని వీళ్లు కాసేపు నమ్మలేదు. ఇది కలా? నిజమా? అని అనుకున్నారు. నెంబరును ఒకటికి రెండుసార్లు సరిచూసుకుని.. నిర్దారణకు వచ్చారు. సోమవారం ఘంటాఘర్‌ చౌరస్తాలోని జ్ఞాన్‌చంద్‌ లాటరీ విక్రయ కేంద్రం వద్దకు బాజాభజంత్రీలతో ఈ మిత్రులిద్దరూ చేరుకున్నారు. బ్యాండు దరువుకు అనుణంగా సంతోషంగా నృత్యం చేస్తూ మిఠాయిలు పంచి కోలాహలం సృష్టించారు. లాటరీ డబ్బును తమ పిల్లల కోసం, కొన్ని ఆధ్యాత్మిక కార్యక్రమాలకు ఖర్చు చేస్తామని రమేశ్‌, కుకీ వెల్లడించారు.

రమేశ్ సింగ్ మాట్లాడుతూ.. గతంలో తాము కొనుగోలుచేసిన టిక్కెట్లకు చిన్న చిన్న లాటరీలు తగిలాయని, ఆ విజయాలు చిన్నవని అన్నారు. అయితే, ఇది తన పిల్లలు జీవితంలో స్థిరపడేందుకు సహాయపడుతుందని, ఈ డబ్బుతో నా కొడుకుల కోసం ఏదైనా వ్యాపారం పెట్టిస్తానని చెప్పారు. ఇక, 1968లో ప్రారంభించిన పంజాబ్ స్టేట్ లాటరీలడైరెక్టరేట్ పంజాబ్ ప్రభుత్వ ఆర్థిక శాఖలో ఒక విభాగం. అధికారిక వెబ్‌సైట్‌లో నియమాలు, నిబంధనలకు అనుగుణంగా నిజమైన, పారదర్శక పథకాలను నిర్వహించడం, ప్రోత్సహించడం లాటరీల లక్ష్యమని ప్రభుత్వం పేర్కొంది.