అరగంటలోనే సంభవించిన 3 భూకంపాలు,,,15 మంది మృతి, 78 మందికి గాయాలు

అరగంటలో సంభవించిన 3 భూకంపాలు ఆఫ్ఘనిస్తాన్‌ను అతలాకుతలం చేశాయి. శనివారం సంభవించిన ఈ భూ ప్రకంపనలకు ఆఫ్ఘాన్ వాసులు బెంబేలెత్తిపోయారు. రిక్టర్ స్కేలుపై 5.6, 6.1, 6.3 తీవ్రతతో వచ్చిన భూకంపం భారీగా ప్రాణ, ఆస్తి నష్టాన్ని మిగిల్చింది. ఈ 3 భూకంపాలకు ఆఫ్ఘనిస్తాన్‌లో 15 మంది చనిపోయినట్లు స్థానిక మీడియా కథనాల ద్వారా తెలుస్తోంది. 78 మంది తీవ్రంగా గాయపడినట్లు సమచారం. అయితే మృతులు, గాయపడిన వారి సంఖ్య భారీగానే ఉంటుందనే అనుమానాలు వ్యక్తం అవుతున్నాయి. ఈ భూకంపం తీవ్రతను యునైటెడ్ స్టేట్స్ జియోలాజికల్ సర్వే వెల్లడించింది. భూ ప్రకంపనల ధాటికి కొన్ని భవనాలు నేలమట్టం అయ్యాయని.. చాలా మంది ఆ శిథిలాల కింద చిక్కుకున్నట్లు స్థానిక మీడియా తెలిపింది.

హెరాత్‌ ప్రావిన్స్‌కు వాయువ్యంగా 40 కిలోమీటర్ల దూరంలో భూకంప కేంద్రం ఉందని జియోలాజికల్‌ సర్వే వెల్లడించింది. ఐదు సార్లు భూమి కంపించినట్లు వెల్లడించింది. శనివారం మధ్యాహ్నం 12 గంటల 19 నిమిషాలకు 5.6 తీవ్రతతో మొదటిసారి భూ ప్రకంపనలు వచ్చినట్లు తెలిపింది. ఆ తర్వాత మరో అరగంట వ్యవధిలోనే మరో 2 సార్లు భూకంపం సంభవించినట్లు పేర్కొంది. 12 గంటల 11 నిమిషాలకు 6.1 తీవ్రతతో ఒకసారి.. ఆ తర్వాత 12 గంటల 42 నిమిషాలకు 6.3 తీవ్రతతో మరో భూకంపం సంభవించినట్లు తెలిపింది. ఇక ఈ భూకంపం ధాటికి కొన్ని భవనాలు నేలమట్టం అయ్యాయి. మరికొన్ని భవనాలు పాక్షికంగా దెబ్బతిన్నాయి. అయితే భూకంపం సంభవించినప్పటి పరిస్థితులను ప్రత్యక్ష సాక్షులు వెల్లడించారు. తాము ఆఫీస్‌లలో పని చేసుకుంటుండగా.. ఒక్కసారిగా బిల్డింగ్ ఊగిపోయిందని తెలిపారు. దీంతో ఏం జరుగుతుందో తెలియక తామంతా భయంతో బయటికి పరిగెత్తినట్లు గుర్తు చేసుకున్నారు. భవనంలోని వస్తువులు ఊగడం, గోడలకు పగుళ్లు రావడం చూసినట్లు తెలిపారు. ఇక శిథిలాల కింద చిక్కుకున్న వారిని బయటికి తీసే ప్రక్రియ కొనసాగుతోంది. తీవ్రంగా గాయపడిన వారిని స్థానిక ఆస్పత్రులకు తరలించి చికిత్స అందిస్తున్నారు. వారిలో కొందరి పరిస్థితి విషమంగా ఉన్నట్లు తెలిపారు. అయితే చనిపోయిన వారి సంఖ్య.. గాయపడిన వారి సంఖ్య మరింత పెరిగే అవకాశం ఉందని అధికారులు అంచనా వేస్తున్నారు.