విమాన ప్రమాదంలో చనిపోయిన వాగ్నర్ గ్రూప్ చీఫ్ డెడ్ బాడీలో గ్రనేడ్.. పుతిన్

విమాన ప్రమాదంలో చనిపోయిన రష్యా ప్రయివేట్ సైన్యం వాగ్నర్ గ్రూప్ చీఫ్ యెవ్‌గనీ ప్రిగోజిన్ మృతదేహంలో పేలుడు పదార్థాల అవశేషాలు గుర్తించామని వ్లాదిమిర్ పుతిన్ వెల్లడించారు. ఆగస్టులో మాస్కో నుంచి సెయింట్ పీటర్స్‌బర్గ్‌కు ప్రిగోజిన్ ప్రయాణిస్తున్న విమానం మార్గ మధ్యలో కూలిపోయిన విషయం తెలిసిందే. పుతిన్‌పై వాగ్నర్ సైన్యం తిరుగుబాటు చేసిన రెండు నెలల తర్వాతే ఈ ఘటన జరగడంతో అనేక అనుమానాలు వ్యక్తమయ్యాయి. పుతిన్ విమర్శకులు, పాశ్చాత్య దేశాలు ఇది ప్రమాదం కాదని.. దీని వెనుక భారీ కుట్ర ఉండే అవకాశం ఉందని అనుమానించాయి.

ఈ నేపథ్యంలో ప్రిగోజిన్ మరణంపై దర్యాప్తునకు సంబంధించి పుతిన్ తాజాగా వ్యాఖ్యలు చేయడం ప్రాధాన్యత సంతరించుకుంది. గురువారం వాల్డై డిస్కషన్ క్లబ్‌లో జరిగిన సమావేశంలో పుతిన్ మాట్లాడుతూ.. ప్రిగోజినీ విమాన ప్రమాదం ఘటన దర్యాప్తు గురించి ఆయన ప్రస్తావించారు. ‘ఇన్వెస్టిగేటివ్ కమిటీ చీఫ్ కొన్ని రోజుల కిందట నాకు నివేదించారు.. విమాన ప్రమాదంలో చనిపోయినవారి మృతదేహాల్లో హ్యండ్ గ్రనేడ్ల అవశేషాలు గుర్తించినట్టు తెలిపారు.. విమానంపై బయట నుంచి ఎటువంటి ప్రభావం లేదు..’ అని అన్నారు. ముందస్తు కుట్ర సహా విమానం ప్రమాదానికి సంబంధించిన అన్ని కోణాలను పరిశీలిస్తున్నట్లు రష్యా దర్యాప్తు అధికారులు చెప్పారు. ప్రిగోజిన్, ప్రమాదంలో చనిపోయిన తొమ్మిది మంది బాధితులకు ఆల్కహాల్, డ్రగ్ పరీక్షలు నిర్వహించకపోవడంపై పుతిన్ ఆగ్రహం వ్యక్తం చేశారు. కిరాయి సైన్యం స్వల్పకాలిక తిరుగుబాటు తర్వాత వాగ్నర్ కార్యాలయాల వద్ద ఐదు కిలోల కొకైన్ దొరికిందని ఆయన ఆరోపించారు. మద్యం, డ్రగ్స్ సేవించారా? లేదా? అని తెలుసుకోడానికి రక్త పరీక్షలు చేయలేదని పుతిన్ చెప్పారు.

‘సెయింట్ పీటర్స్‌బర్గ్‌లోని వాగ్నర్ గ్రూప్ కార్యాలయంలో ఫెడరల్ సెక్యూరిటీ సిబ్బంది 10 బిలియన్ రూబిళ్లు (100 మిలియన్ డాలర్లు) నగదు మాత్రమే కాకుండా ఐదు కిలోల కొకైన్‌ను కూడా గుర్తించిన విషయం మాకు తెలుసు’ అని పుతిన్ అన్నారు. జూన్‌లో పుతిన్‌పై తిరుగుబాటు చేసిన ప్రిగోజిన్ ప్రపంచవ్యాప్తంగా వార్తల్లో నిలిచిన విషయం తెలిసిందే. వాగ్నర్ సైన్యాలను మాస్కో దిశగా నడిపించి ఆయన మళ్లీ వెనక్కి తగ్గారు. ఒక్క రోజు తిరుగుబాటు బెలారస్ అధ్యక్షుడు మధ్యవర్తిత్వంతో టీకప్పులో తుఫాను మాదిరిగా సమసిపోయింది. ఒకప్పుడు నేరాలకు పాల్పడి జైలుకెళ్లిన ప్రిగోజిన్‌.. పలు రెస్టారెంట్లు నడిపాడు. ఆ సమయంలో ఆయనకు పుతిన్ పరిచయం కావడం.. ఇరువురి మధ్య స్నేహం ఏర్పడింది. క్రమంగా పుతిన్ ఆంతరంగికుల్లో ఒకడిగా ఎదిగాడు. సెయింట్‌ పీటర్స్‌బర్గ్‌ డిప్యూటీ మేయర్‌గానూ పని చేసి.. రష్యా ప్రభుత్వ ఆహార కాంట్రాక్టులన్నీ అతడే దక్కించుకున్నాడు. అంచెలంచెలుగా పుతిన్ అండతో ఆర్థికంగా, రాజకీయంగా ఎదిగి కిరాయి సైన్యం వాగ్నర్‌కు నాయకుడు అయ్యారు.