సైనిక శిక్షణా అకాడమీపై భారీ ఉగ్రదాడి.. 100 మందికిపైగా యువ సైనికులు మృతి

సిరియాలో ఉగ్రవాదులు రెచ్చిపోయారు. మిలిటరీ అకాడమీపై డ్రోన్లతో విరుచుకుపడ్డారు. ఈ ఉగ్రదాడిలో సైనికులు సహా 100 మందికి పైగా ప్రాణాలు కోల్పోగా... సుమారు మరో 125 మంది గాయపడ్డారు. హోమ్స్‌ ప్రావిన్స్‌లో మిలటరీ కాలేజీ గ్రాడ్యుయేషన్‌ వేడుక జరుగుతున్న సమయంలోనే ముష్కరులు దాడికి తెగబడ్డారు. మృతుల్లో మిలిటరీ క్యాడెట్స్‌ కుటుంబ సభ్యులు, మహిళలు, చిన్నారులు ఉన్నట్టు అధికారులు తెలిపారు. గత కొన్నేళ్లుగా సిరియా అంతర్యుద్ధంతో అట్టుడుకుతోంది. అయితే, ప్రభుత్వంతో పోరాడుతున్న తిరుగుబాటుదారులు, జిహాదిస్టులు ఈ దాడిపై ఎలాంటి ప్రకటన చేయలేదు.

కానీ, సాయుధ ఉగ్ర సంస్థలే గ్రాడ్యుయేషన్‌ డేను లక్ష్యంగా చేసుకొని దాడికి పాల్పడినట్లు సిరియా సైన్యం ఆరోపించింది. సైనిక కాలేజీలో శిక్షణ పూర్తికావడంతో క్యాడెట్స్‌కు గురువారం గ్రాడ్యుయేషన్‌ డేను నిర్వహించారు. ఈ కార్యక్రమానికి వారి కుటుంబసభ్యులు, సైనిక అధికారులు భారీగా హాజరయ్యారు. వేడుక ముగిసిన అనంతరం అధికారులు, మిలిటరీ క్యాడెట్స్‌ ఆ ప్రాంతం నుంచి బయటకు వెళ్తుండగా ఈ ఘటన చోటుచేసుకుంది. డ్రోన్ దాడితో ఒక్కసారిగా వారంతా భయబ్రాంతులకు గురయ్యారు.

ఆ ప్రాంతమంతా బాధితుల ఆర్తనాదాలు, ఆహాకారాలతో దద్దరిల్లింది. ఎటుచూసినా తెగిపడిన అవయవాలు, రక్తమోడుతోన్న శరీరాలతో భీతావాహ దృశ్యం కనిపించింది. ఘటనకు సంబంధించిన వీడియోలు సోషల్ మీడియాలో వైరల్ అవుతున్నాయి. దాడి నుంచి వెంటనే తేరుకున్న సైనికులు.. క్షతగాత్రులను చికిత్స కోసం ఆసుపత్రికి తరలించారు. పేలుడు పదార్థాలు నింపిన డ్రోన్‌తో మిలిటరీ అకాడమీని లక్ష్యంగా చేసుకొని దాడి చేసినట్లు సిరియా అధికారిక మీడియా సానా వెల్లడించింది.

దీనికి ప్రతీకారం తప్పదని, ఉగ్రమూకలు ఎక్కడ ఉన్నా తప్పించుకోలేరని సైన్యం శపథం చేసింది. మృతుల్లో ఆరుగురు మహిళలు, ఆరుగురు చిన్నారులు ఉన్నట్లు సిరియా ఆరోగ్యశాఖ మంత్రి హసన్‌ అల్‌ గబ్బాష్‌ తెలిపారు. మృతుల సంఖ్య మరింత పెరిగే అవకాశం ఉందని ఆయన పేర్కొన్నారు. ఈ వేడుకకు సిరియా రక్షణ శాఖ మంత్రి కూడా హాజరుకాగా.. ఆయన అక్కడి నుంచి వెళ్లిపోయిన కొద్దిసేపటికే ఈ దాడి జరిగింది. శుక్రవారం నుంచి మూడు రోజులపాటు సంతాప దినాలు పాటిస్తున్నట్లు సిరియా ప్రభుత్వం ప్రకటించింది. మృతుల్లో సగం మంది సైనిక గ్రాడ్యుయేట్‌‌లు ఉన్నారని సిరియాలో మానవహక్కుల కోసం కృషిచేస్తోన్న బ్రిటన్ సంస్థ తెలిపింది.