క్యాండీ క్రష్ నా ఫేవరెట్ గేమ్.. అది ఆడుతూనే ఉంటా.. ప్రతిపక్షాలకు సీఎం కౌంటర్

ఐదు రాష్ట్రాల అసెంబ్లీలకు ఎన్నికల నగారా మోగింది. ఈ క్రమంలోనే అధికార, విపక్షాలు.. దొరికిన ప్రతీ అంశంపై మాటల యుద్ధం  రాజకీయాల్లో నాయకులకు చెందిన ఏ చిన్న అవకాశం దొరికినా దాన్ని సమర్థవంతంగా ఉపయోగించుకుంటారు. అయితే ఇక ఎన్నికల సమయం వచ్చిందంటే చాలు.. మాటల యుద్ధం తారస్థాయికి చేరుకుంటుంది. ఈ క్రమంలోనే తమ ప్రత్యర్థులకు చెందిన విషయాలు ఏవి బయటికి వచ్చినా వాటిని ఎన్నికల్లో ఆయుధాలుగా చేసుకుని.. ప్రజల ముందు ఉంచుతూ ఉంటారు. ఈ క్రమంలోనే ఎమ్మెల్యేలు, మంత్రులకు సంబంధించిన కొన్ని ఫోటోలు, వీడియోలు ఎన్నికల సమయంలో సోషల్ మీడియాలో హల్‌చల్ చేస్తూ ఉంటాయి. అయితే ఈసారి ఏకంగా ముఖ్యమంత్రికి సంబంధించిన ఓ ఫోటో బయటికి రావడంతో దానిపై ప్రతిపక్షాలు తీవ్ర విమర్శలు చేస్తున్నాయి.

ఛత్తీస్‌గఢ్‌లో కాంగ్రెస్ పార్టీ ఎన్నికల సమావేశంలో సీఎం భూపేష్ బఘేల్ తన ఫోన్‌లో క్యాండీ క్రష్ గేమ్ ఆడుతుండగా.. అక్కడ ఉన్న ఓ వ్యక్తి ఫోటో తీసి దాన్ని సోషల్ మీడియాలో ఉంచాడు. దీంతో అది కాస్త వైరల్‌గా మారింది. ఇక ఇప్పటికే ఛత్తీస్‌గఢ్‌లో ఎన్నికల వేడి మొదలు కాగా.. ప్రతిపక్షంలో ఉన్న బీజేపీకి ఇదో పెద్ద ఆయుధంగా మారింది. దీంతో సీఎం భూపేష్ బఘేల్‌పై విమర్శల దాడిని పెంచింది. అయితే బీజేపీ నేతలు చేస్తున్న విమర్శలకు సీఎం భూపేష్ బఘేల్ అదే స్థాయిలో రివర్స్ కౌంటర్ ఇచ్చారు. తనకు క్యాండీ క్రష్ గేమ్ అంటే చాలా ఇష్టమని.. ఆ గేమ్ ఆడుతూనే ఉంటానని తెలిపారు. తన ఉనికే బీజేపీ నేతలకు అభ్యంతరంగా ఉన్నట్టుంది అంటూ ఎద్దేవా చేశారు.

గతంలో తాను కార్ట్ గేమ్ ఎందుకు ఆడతాను.. బొంగరం ఎందుకు ఆడుతున్నాను.. కర్ర బిళ్ల ఎందుకు ఆడతాను.. ఛత్తీస్‌గఢ్ ఒలంపిక్స్ రాష్ట్రంలో ఎందుకు అంటూ బీజేపీ అభ్యంతరాలు వ్యక్తం చేసేదని భూపేష్ బఘేల్ బీజేపీని ఉద్దేశించి కీలక వ్యాఖ్యలు చేశారు. తాజాగా తాను పాల్గొన్న ఓ సమావేశంలో క్యాండీ క్రష్ ఆడుతున్నట్లు ఉన్న ఒక ఫోటో చూపిస్తూ.. దానిపై కూడా అభ్యంతరం చెబుతోందని మండిపడ్డారు. తన పట్ల వారు అనుసరిస్తున్న తీరు చూస్తుంటే అసలు తన ఉనికే వారికి అభ్యంతరమని తెలుస్తోందని భూపేష్ బఘేల్ ట్వీట్‌ చేశారు.

ఈ సందర్భంగా తన గురించి చెప్పారు. తాను రైడింగ్ ది కార్డ్, గిల్లీ దండా ఆడుతూనే ఉంటానని.. అలాగే క్యాండీ క్రష్ కూడా తన ఫేవరెట్ గేమ్ అని భూపేష్ బఘేల్ స్పష్టం చేశారు. క్యాండీ క్రష్‌ ఆటలోని అన్ని లెవెల్స్ తనకు బాగా తెలుసునని.. భవిష్యత్‌లో కూడా ఆ గేమ్ ఆడుతూనే ఉంటానని వెల్లడించారు. ఈ సందర్భంగా ఎన్నికల గురించి మాట్లాడిన ఛత్తీస్‌గఢ్ సీఎం.. ఎవరిని అధికారంలో ఉంచాలో ఎవరిని అధికారానికి దూరంగా ఉంచాలో ఛత్తీస్‌గఢ్ ప్రజలకు బాగా తెలుసని బీజేపీపై తీవ్ర స్థాయిలో విమర్శలు గుప్పించారు. అయితే సీఎం స్పందనకు ముందు బీజేపీ నేత అమిత్ మాలవీయ ట్విటర్‌లో ఒక పోస్టు పెట్టారు. అందులో ఓ కార్యక్రమంలో పాల్గొన్న భూపేష్ బఘెల్ క్యాండీ క్రష్ ఆడుతున్నట్లు ఉంది. ఛత్తీస్‌గఢ్‌లో మళ్లీ తమ ప్రభుత్వం రాదని భూపేష్ బఘేల్‌కు బాగా తెలుసని.. అందుకే క్యాండీ క్రష్ గేమ్ ఆడుతున్నారని తెలిపారు.