డీకే శివకుమార్‌ కాళ్లకు మొక్కిన బీజేపీ ఎమ్మెల్యే.. నేతలు షాక్

తన నియోజకవర్గ అభివృద్ధి విషయంలో అన్యాయం జరిగిందని, మంజూరు చేసిన నిధులను వెనక్కి తీసుకున్నారని ఆరోపిస్తూ కర్ణాటక బీజేపీ ఎమ్మెల్యే మునిరత్న బుధవారం నిరాహార దీక్ష దిగడం కలకలం రేగింది. డిప్యూటీ సీఎం డీకే శివకుమార్, ఆయన సోదరుడు సురేష్‌లకు వ్యతిరేకంగా విధాన సౌధలోని గాంధీ విగ్రహం వద్ద నిరసనకు దిగారు. ఈ విషయం తెలిసి.. ఆయన అభిమానులు, అనుచరులు, బీజేపీ నేతలు అక్కడకు చేరుకున్నారు. దీంతో పోలీసులు స్పందించి కార్యకర్తలను అదుపులోకి తీసుకున్నారు. ఎమ్మెల్యే మునిరత్న ఒంటరిగా నిరసన కొనసాగించారు. అనంతరం మాజీ ముఖ్యమంత్రి యడియూరప్ప అక్కడకు చేరుకుని నచ్చజెప్పడంతో మునిరత్న నిరసన విరమించారు.

అక్కడ నుంచి బెంగళూరులో కంబళ క్రీడల నిర్వహణ పూజా కార్యక్రమంలో పాల్గొన్న డీకే శివకుమార్‌‌ను కలవడానికి వెళ్లారు. ఈ సమయంలో మాట్లాడుతున్న డీకే శివకుమార్‌.. నేరుగా మునిరత్నను ఉద్దేశించి తీవ్రమైన వ్యాఖ్యలు చేశారు. కొందరు యాక్టింగ్‌ చేసేందుకు వచ్చారని, వారి గురించి తర్వాత మాట్లాడతానని ఎద్దేవా చేశారు. కార్యక్రమం ముగిసిన తర్వాత బయటకు వస్తున్న డీకే శివకుమార్‌ వద్దకు వెళ్లిన మునిరత్న.. అందరూ చూస్తుండగానే వంగి ఆయన కాళ్లకు నమస్కరించారు. దీంతో ఈ దృశ్యాన్ని చూసినవారంతా షాకయ్యారు.

అయితే, వెంటనే డీకే ఆయన్ను వారించి ఇంటికి వస్తే కూర్చుని మాట్లాడుకుందామని చెప్పారు. ఆ తర్వాత నేరుగా సదాశివనగర్‌కు వెళ్లిన మునిరత్నతో డిప్యూటీ సీఎం చర్చలు జరిపారు. భేటీ అనంతరం డీకే శివకుమార్‌ మీడియాతో మాట్లాడుతూ.. మునిరత్న తన కాళ్లు మొక్కారా? అంటూ ఆశ్చర్యం వ్యక్తం చేశారు. మునిరత్న ప్రాతినిధ్యం వహిస్తోన్న రాజరాజేశ్వరినగర్‌లో వాస్తవంగా జరిగిన పనులకు సంబంధించి ఒక నివేదిక ఇవ్వాలని, వాటిని పరిష్కరిస్తానని హామీ ఇచ్చినట్టు తెలిపారు.

మరోవైపు, మునిరత్న మాట్లాడుతూ నియోజకవర్గ అభివృద్ధి కోసం కాళ్లకు మొక్కానని, పరిష్కారం కాకుంటే మళ్లీ పోరాటం చేస్తానని స్పష్టం చేశారు. బసవరాజ్ బొమ్మై సీఎంగా ఉన్నప్పుడు హొసకెరెహళ్లి చెరువుతోపాటు పలు పార్కుల అభివృద్ధికి రూ.120 కోట్ల గ్రాంటు కేటాయించారని చెప్పారు. ప్రభుత్వం మారిన తర్వాత వాటిని రద్దుచేసి.. పలు నియోజకవర్గాలకు కేటాయింపులు చేశారని వెల్లడించారు. రాజకీయ వైషమ్యాలతో తన నియోజకవర్గ ప్రజలకు అన్యాయం జరుగుతోందని ఆయన ఆవేదన వ్యక్తం చేశారు.