తీవ్రమైన ఇజ్రాయేల్-హమాస్ యుద్ధం.. ఆపరేషన్ అజయ్‌తో రంగంలోకి భారత్

ఇజ్రాయేల్- హమాస్ మధ్య యుద్ధం నేపథ్యంలో అక్కడ చిక్కుకున్న భారతీయులను స్వదేశానికి తీసుకొచ్చేందుకు కేంద్రం చర్యలు ప్రారంభించింది. ఇందుకోసం ‘ఆపరేషన్ అజయ్’ చేపట్టినట్టు తెలిపింది. ఇజ్రాయేల్‌లో మొత్తం 18,000 మంది భారతీయులు ఉండగా.. వీరిని తరలించేందుకు ప్రత్యేక విమానాలను ఏర్పాటు చేస్తున్నట్టు కేంద్ర విదేశాంగ మంత్రి ఎస్ జైశంకర్ ట్విట్టర్‌లో వెల్లడించారు. విదేశాలలో ఉన్న భారతీయుల భద్రత, శ్రేయస్సుకు తమ ప్రభుత్వం పూర్తిగా కట్టుబడి ఉందని ఆయన స్పష్టం చేశారు.

స్వదేశానికి వచ్చేందుకు పేర్లు నమోదు చేసుకున్నవారికి మొదటి ప్రాధాన్యత ఇస్తామని, వారిని తీసుకొచ్చేందుకు తొలి ప్రత్యేక విమానం గురువారం అందుబాటులో ఉంటుందని ఇజ్రాయేల్‌లోని భారత రాయబార కార్యాలయం మరొక పోస్ట్‌లో తెలిపింది. ‘ప్రత్యేక విమానం కోసం నమోదు చేసుకున్న భారతీయ పౌరులు చాలా మందికి ఇ-మెయిల్ పంపాం... తదుపరి విమానాల కోసం ఇతర నమోదిత వ్యక్తులకు సమాచారం ఇస్తాం’ అని పేర్కొంది.

ఇజ్రాయేల్ గడ్డపై హమాస్ ఆకస్మిక దాడి, ముష్కరులు ఇళ్లలోకి చొరబడి పౌరులను హతమార్చడంతో బెంజిమిన్ నెతన్యాహు సర్కారు యుద్ధం ప్రకటించింది. హమాస్‌పై యుద్ధాన్ని నిర్వహించడానికి అత్యవసర ప్రభుత్వాన్ని ఏర్పాటు చేసింది. హమాస్ అధీనంలోని గాజా స్ట్రిప్‌పై భారీ బాంబు దాడులతో ఇజ్రాయేల్ విరుచుకుపడుతోంది. ప్రతీకార దాడులతో గత ఐదు రోజులుగా వేలాది మంది మరణించారు. గాజాను ఇజ్రాయేల్ బలగాలు చుట్టుముట్టాయి.

మరోవైపు, దాదాపు 150 మంది పౌరులను హమాస్ బందీలుగా పట్టుకున్నట్లు ఇజ్రాయెల్ తెలిపింది. వారిలో కనీసం 14 మంది థాయ్‌లు, ఇద్దరు మెక్సికన్లు, పెద్ద సంఖ్యలో అమెరికన్లు, జర్మన్లు ఉన్నారు. ఇదే సమయంలో లెబనాన్‌తో ఉత్తర సరిహద్దులో ఇరాన్-మద్దతుగల షియా మిలిటెంట్ గ్రూప్ హిజ్బుల్లా నుంచి కూడా ఇజ్రాయేల్ ముప్పును ఎదుర్కొంది.

ఇజ్రాయేల్‌పై క్షిపణులను ప్రయోగించినట్టు హిజ్బుల్లా గ్రూప్ బుధవారం ప్రకటించింది. దక్షిణ లెబనాన్‌లోని మిలిటరీ అబ్జర్వేషన్ పోస్ట్‌లలో ఒకదానిపై దాడి చేయడంతో ప్రతిస్పందించినట్లు ఇజ్రాయేల్ సైన్యం తెలిపింది. మరోవైపు, గాజాలో ఇజ్రాయేల్‌ దాడులతో పరిస్థితి దిగజారుతుందని ఐక్యరాజ్య సమితి ఆందోళన వ్యక్తం చేసింది. ఇదే సమయంలో సిరియా, లెబనాన్‌ల నుంచి దాడులతో మరింత కలవరపడుతోంది. ఇరుపక్షాలూ సంయమనం పాటించాలని, ఉద్రిక్తతలను తగ్గించాలని కోరింది.

శనివారం ప్రారంభమైన ఘర్షణతో ఇప్పటిదాకా 3,500 మంది ప్రాణాలు కోల్పోయారు. ఇందులో ఇజ్రాయేల్‌లోనే 1,200 మంది చనిపోగా.. గాజాలో 1,050 మంది మరణించారు. వీరిలో 260 మంది పిల్లలు, 230 మంది మహిళలు ఉన్నారు. వెస్ట్‌బ్యాంక్‌లో జరిగిన ఘర్షణలో మరో 15 మంది పాలస్తీనా వాసులు చనిపోయారు. మరో 1,500 మంది హమాస్ మిలిటెంట్లు హతమయ్యారు.