చంద్రబాబు ఆరోగ్యంపై లోకేష్, భువనేశ్వరి, బ్రాహ్మణి ఆందోళన

మాజీ ముఖ్యమంత్రి చంద్రబాబు ఆరోగ్యంపై కుమారుడు లోకేష్, సతీమణి భువనేశ్వరి, కోడలు బ్రాహ్మణి ఆందోళన వ్యక్తం చేశారు. చంద్రబాబు ప్రాణాలకు ముప్పు ఉందని.. ఉద్దేశపూర్వకంగా హాని తలపెడుతున్నారన్నారన్నారు. ఆయనకు సరైన భద్రత లేదని.. రిస్క్‌లో ఉన్నారన్నారు. చంద్రబాబు డీహైడ్రేషన్, బరువు తగ్గారు, ఇన్‌ఫెక్షన్, అలర్జీతో బాధపడుతున్నారన్నారు. దోమల బెడదతో పాటుగా కలుషితమైన నీటిని జైల్లో అందిస్తున్నారన్నారు. అలాగే ఆయనకు సరైన వైద్యం కూడా అందడం లేదని ఆరోపించారు. ఏపీ ప్రభుత్వం ఆయనకు స్టెరాయిడ్స్ ఇచ్చేందుకు ప్రయత్నిస్తోందన్నారు. అధికార యంత్రాంగం, ప్రభుత్వ డాక్టర్లు ఏదో దాచేందుకు ప్రయత్నిస్తున్నారన్నారు. చంద్రబాబుకు ఏదైనా జరిగితే సీఎం జగన్ బాధ్యత వహించాలంటూ లోకేష్ ట్వీట్ చేశారు.

చంద్రబాబుకు అత్యవసర వైద్యం అందించడంలో ప్రభుత్వ విఫలం అయ్యారని నారా భువనేశ్వరి ఆరోపించారు. జైలులో తన భర్తకు సకాలంలో వైద్యం అందించలేదని.. ఇప్పటికే చంద్రబాబు 5 కిలోల బరువు తగ్గారన్నారు. ఇంకా బరువు తగ్గితే కిడ్నీలపై ప్రభావం చూపుతుందని వైద్యులన్నారని.. జైలులో ఓవర్ హెడ్ నీళ్ల ట్యాంకులు అపరిశుభ్రంగా ఉన్నాయన్నారు. చంద్రబాబు ఆరోగ్యానికి తీవ్ర ముప్పు వాటిల్లుతోందని.. జైలులో పరిస్థితులు తన భర్తకు తీవ్ర ముప్పు తలపెట్టేలా ఉన్నాయన్నారు. చంద్రబాబు ఆరోగ్యాన్ని తీవ్ర నిర్లక్ష్యం చేస్తున్నారన్నారు. జైల్లో చంద్రబాబు పరిస్థితి చూసి చాలా బాధగా ఉందన్నారు నారా బ్రాహ్మణి. జైల్లో అపరిశుభ్రమైన వాతావరణం ఉందని.. దీని వల్ల ఆయన ఆరోగ్యానికి ముప్పు ఉందన్నారు. ఆయనకు అత్యవసరంగా వైద్యం అందించాల్సి ఉందని.. వైద్య నిపుణులు ఆయన ఆరోగ్యం గురించి ఆందోళన వ్యక్తం చేశారన్నారు. చంద్రబాబుకు సరైన సమయానికి వైద్యం అందిచడం లేదని.. ఇప్పటికే ఆయన 5 కేజీల బరువు తగ్గారని చెప్పుకొచ్చారు. ఇలా బరువు తగ్గితే కిడ్నీలపై ప్రభావం చూపే అవకాశ ఉందంటున్నారు. ఆయన ఆరోగ్యం గురించి తీవ్ర ఆందోళనలో ఉన్నామన్నారు.

రాజమహేంద్రవరం సెంట్రల్ జైల్లో ఉన్న టీడీపీ అధినేత చంద్రబాబు నాయుడుకు ఏదైనా జరిగితే సీఎం జగన్ దే బాధ్యత అని మాజీ మంత్రి, టీడీపీ పొలిట్ బ్యూరో సభ్యులు యనమల రామకృష్ణుడు అన్నారు. చంద్రబాబు ఆరోగ్య పరిస్థితులపై డాక్టర్లు కాకుండా డిప్యూటీ సూపరింటెండెంట్ ఎలా రిపోర్టు ఇస్తారని ప్రశ్నించారు. చంద్రబాబు ఆరోగ్యం గురించి జైలు డిప్యూటీ సూపరింటెండెంట్ అధికారి ఇచ్చిన నివేదికలో ఏముంది.? ఏ రిపోర్టులు చూసి ఆరోగ్యం బాగుందని బులిటెన్ బయటకు ఇచ్చారని ప్రశ్నించారు. చేయాల్సిన కనీస పరీక్షలు చేయలేదు.. రక్త పరీక్ష కూడా చేయలేదన్నారు. ఆరోగ్యం బాగోలేకనే చర్మంపై దద్దుర్లు, అలర్జీ వచ్చిందని. చంద్రబాబు ఆరోగ్యంపై మొదటి నుండీ ప్రభుత్వం, అధికారులు తప్పుడు సమాచారం బయటకు ఇస్తున్నారన్నారు. హెల్త్ బులిటెన్ ఇచ్చినప్పుడు సంబంధిత అధికారులు విడుదల చేయాలి..కానీ జైలు డిప్యూటీ సూపరింటెండెంట్ విడుదల చేస్తున్నారన్నారు. డాక్టర్లు పరిశీలించినట్లుగా ఆరోగ్య బులిటెన్ లో లేదని.. చంద్రబాబు ముద్దాయి అన్న పదం వాడారు తప్ప డాక్టర్లు పరీక్షలు చేసినట్లు బులిటెన్ లో లేదన్నారు. డిప్యూటీ సూపరింటెండెంట్ తన సొంతంగా లేఖ రాసి బయటకు వదిలారన్నారు. డాక్టర్లు పరీక్షలు చేసిన రిపోర్టులు ఎక్కుడున్నాయని.. డాక్టర్ రిలీజ్ చేసిన మెడికల్ రిపోర్టు బయటపెట్టాలి.. కానీ పెట్టలేదన్నారు. జైలులో చంద్రబాబు ఉండే రూము, అక్కడి పరిసర ప్రాంతం సరిగా లేకపోవడం వల్ల అనారోగ్య సమస్య వచ్చిందన్నారు. ఓవర్ హెడ్ ట్యాంక్ కు బోరు నీళ్లు వెళ్తాయి.. ఆ ట్యాంకు శుభ్రం చేస్తున్నారో లేదో తెలీదన్నారు. చంద్రబాబు జాతీయ స్థాయి నేత..ఆయన గురించి ప్రభుత్వం తప్పకుండా ఆలోచించాలన్నారు యనమల.

డాక్టర్లపై ఒత్తిడి తెచ్చి చంద్రబాబు ఆరోగ్య పరిస్థితిపై ఉన్నది ఉన్నట్లు చెప్పడం లేదని.. 5 కేజీల బరువు తగ్గారని.. మరో 2 కేజీలు తగ్గితే కిడ్నీ సమస్య తలెత్తుందన్నారు. ఈ వయసులో చంద్రబాబు ను ఇలాంటి కష్టాలు పెట్టడాన్ని ఖండిస్తున్నామని.. ఆరోపణలు ఎదుర్కొనే వ్యక్తి అనారోగ్య సమస్యలతో బాధ పడితే తక్షణమే ఆసుపత్రిలో చేర్చాల్సిన బాధ్యత ప్రభుత్వంపై ఉందన్నారు. చంద్రబాబు అనారోగ్యంపై లీగల్ గా కూడా వ్యవహరిస్తామని.. డాక్టర్లు ఇచ్చిన రిపోర్టులు కూడా మార్పులు చేసి సొంత రిపోర్టులు చేస్తున్నారన్నారు. చంద్రబాబును సూపర్ స్పెషాలిటీ ఆసుపత్రిలో చేర్చి.. కోలుకునేదాకా డాక్టర్ల సమక్షంలో ఉంచాలి అన్నారు. అవసరమైతే పోలీసుల సమక్షంలోనే ఉంచుకోవచ్చన్నారు. అనారోగ్యం ఇలాగే ఉంటే లివర్, హార్ట్ పై ప్రభావం ఉంటుందన్నారు. తాము ప్రైవేట్ డాక్టర్లను సంప్రదించగా సీరియస్ అంశంగా చెప్పారని.. గతంలో లాలూ ప్రసాద్ యాదవ్ జైల్లో అనారోగ్యంతో ఉన్నప్పుడు వెంటనే ఆసుపత్రిలో చేర్చారన్నారు. ఇక్కడి వాతావరణ పరిస్థితుల వల్ల చంద్రబాబు ఉండే గదిలో ఫ్యాన్ వేసినా ఇంకా వేడి పెరుగుతుందన్నారు.. వాళ్లు ఏం మందులు ఇచ్చారో కూడా తెలియదని.. కనీసం వ్యక్తిగత డాక్టర్లకు కూడా సమాచారం ఇవ్వలేదన్నారు. ఏం మందులు ఇచ్చారో అనుమానం ఉందని.. చంద్రబాబు వద్దకు వ్యక్తిగత డాక్టర్లను అనుమతించాలన్నారు. ఆరోగ్య సమస్యపై కోర్టును కూడా ఆశ్రయించి బుద్ధి చెప్తామని.. చంద్రబాబు ఆరోగ్య పరీక్షలు చేసి డాక్టర్లు ఇచ్చిన రిపోర్టు ఎక్కడుందని ప్రశ్నించారు. చంద్రబాబు ఆరోగ్యం పాడైనా పర్వాలేదన్న కక్షపూరిత వ్యవహారంలో ప్రభుత్వం ఉందని.. ఏయే మందులు ఇస్తున్నారో కూడా చూపించడం లేదన్నారు.