విజయవాడ దుర్గమ్మ హుండీకి భారీ ఆదాయం,,,,,16 రోజుల్లోనే ఏకంగా రూ. కోట్లు వచ్చాయి

విజయవాడ ఇంద్రకీలాద్రిపై కొలువైన దుర్గమ్మ సన్నిధిలోని హుండీల్లో భక్తులు సమర్పించిన కానుకలను లెక్కించారు. 16 రోజులకు రూ.2,30,88,508 నగదు, 671 గ్రాముల బంగారం, 5.615 కిలోల వెండి కానుకలు వచ్చాయి. 1431 యూఎస్ డాలర్లు, 55 కెనడా డాలర్లు, 57 సింగపూర్‌ డాలర్లు, 5 ఆస్ట్రేలియా డాలర్లు, 5 ఇంగ్లాండ్‌ పౌండ్లు, ఒక మలేసియా రింగెట్‌, 0.5 ఓమాన్‌ రియాల్‌, 23 ఖతార్‌ దీర్హమ్‌లు, 135 యూఏఈ దీర్హమ్‌లు, 17.5 కువైట్‌ దీనార్లు సమకూరాయి. హుండీ లెక్కింపును ఈవో కె.ఎస్‌ రామారావు, పాలక మండలి సభ్యులు పోలీసులు పర్యవేక్షించారు.

మరోవైపు దుర్గగుడిలో ఈనెల 15 నుంచి 23 వరకు జరగనున్న దసరా మహోత్సవాల ఆహ్వాన పత్రికలను ముఖ్యులకు అందించారు. రాష్ట్ర హైకోర్టు ప్రధాన న్యాయమూర్తి ధీరజ్‌సింగ్‌ ఠాకూర్‌, దేవదాయ శాఖ ప్రిన్సిపల్‌ సెక్రటరీ కరికాల వలవన్, దేవదాయ కమిషనర్‌ ఎస్‌ సత్యనారాయణకు ఈవో రామారావు, వైదిక కమిటీ సభ్యుడు శంకరశాండిల్య ఆహ్వాన పత్రికలు, ప్రసాదాలను అందజేశారు.అలాగే విశాఖ శారదాపీఠం అధిపతి స్వరూపానందేంద్రకు, ఉత్తర పీఠాధిపతి స్వాత్మానందేంద్రకు ట్రస్ట్‌బోర్డు చైర్మన్‌ కర్నాటి రాంబాబు, ముఖ్య అర్చకుల బృందం కలిసి ఆహ్వాన పత్రికలు, ప్రసాదాలను అందజేశారు. మంత్రులకు అమ్మవారి శరన్నవరాత్రి మహోత్సవాల ఆహ్వాన పత్రికను అందజేశారు. మరోవైపు విజయవాడ పోరంకికి చెందిన సీ.రామచంద్రరావు దంపతులు దుర్గమ్మకు 35.9 గ్రాముల బరువున్న బంగారు ఎనామిల్‌ హారాన్ని కానుకగా సమర్పించారు. అధికారుల ద్వారా కానుకను అందజేశారు. ఇంద్రకీలాద్రిపై అక్టోబర్ 15 నుంచి 23వ తేదీ వరకు దసరా ఉత్సవాలు నిర్వహించనున్నారు. ఉత్సవాల్లో భాగంగా అమ్మవారు వివిధ అలంకారాల్లో భక్తులకు దర్శన మివ్వనున్నారు.

అక్టోబర్‌ 15 - బాలా త్రిపురసుందరి

అక్టోబరు 16 - గాయత్రీ దేవి

అక్టోబరు 17 - అన్నపూర్ణ దేవి

అక్టోబరు 18 - మహాలక్ష్మి

అక్టోబరు 19 - మహాచండీ

అక్టోబరు 20 - సరస్వతి

అక్టోబరు 21 - లలితా త్రిపుర సుందరి

అక్టోబరు 22 - దుర్గాదేవి

అక్టోబరు 23 - మహిషాసుర మర్దిని, మధ్యాహ్నం నుంచి శ్రీ రాజరాజేశ్వరి

దసరా ఉత్సవాలు జరిగిన 9 రోజులూ అంతరాలయ దర్శనం ఉండదు.

మరోవైపు దసరా సందర్భంగా ఈ నెల 13 నుంచి 26 వరకు ప్రయాణికుల సౌకర్యార్థం 1000 బస్సులు నడిపేందుకు చర్యలు తీసుకుంటున్నారు. ఈ ప్రత్యేక సర్వీసుల్లో ఎటువంటి అదనపు ఛార్జీలు వసూలు చేయరు. విజయవాడ నుంచి హైదరాబాదు, బెంగళూరు, చెన్నై, విశాఖపట్నం, కాకినాడ, అమలాపురం, రాజమహేంద్రవరం, తిరుపతి, భద్రాచలం, రాయలసీమతో పాటు ఉమ్మడి జిల్లాలోని పట్టణాలకు ఈ సర్వీసులు నడుస్తాయి. అంతేకాదు రిజర్వేషన్‌ సౌకర్యం కూడా కల్పించారు. 60 ఏళ్లు దాటిన వృద్ధులకు టికెట్‌ ఛార్జీలో 25 శాతం రాయితీ ఇచ్చారు. అలాగే సాధారణ ప్రయాణికులు రాను, పోను టికెట్లు ఒకేసారి తీసుకుంటే 10 శాతం రాయితీ ఉంటుంది. అంతేకాదు ఏపీఎస్‌ఆర్టీసీ ‘ఈ వాలెట్‌’ ద్వారా బుక్‌ చేసుకుంటే 5 శాతం, నలుగురు సభ్యులు (పిల్లలతోసహా) ఒకేసారి టికెట్‌ బుక్‌ చేసుకుంటే 5 శాతం రాయితీ సౌకర్యం ఇచ్చింది ఆర్టీసీ.