ఢిల్లీ నుంచి తిరిగొచ్చిన నారా లోకేష్.. చంద్రబాబుతో ములాఖత్

టీడీపీ జాతీయ ప్రధాన కార్యదర్శి నారా లోకేష్ ఢిల్లీ నుంచి గన్నవరం విమానాశ్రయానికి చేరుకున్నారు. అక్కడి నుంచి రోడ్డు మార్గాన రాజమహేంద్రవరం వెళ్లారు. చంద్రబాబు ఆరోగ్య పరిస్థితిపై ఆందోళన వ్యక్తం చేసిన కుటుంబ సభ్యులు ములాఖత్‌కు ప్రయత్నిస్తున్నారు. ములాఖత్‌ కోసం జైలు అధికారులను వారు సంప్రదిస్తున్నారు. ములాఖత్‌పై జైలు అధికారులు ఎలాంటి నిర్ణయం తీసుకుంటారన్నది ఆసక్తికరంగా మారింది. జైల్లో చంద్రబాబు అనారోగ్య సమస్యలతో బాధపడుతున్న సంగతి తెలిసిందే. దీంతో లోకేష్ ఢిల్లీ నుంచి తిరిగి వచ్చేశారు. ఇవాళ చంద్రబాబుతో ములాఖత్ అయ్యే అవకాశం ఉందని చెబుతున్నారు. మరి జైలు అధికారులు ములాఖత్‌కు అనుమతి ఇస్తారా లేదా అన్నది చూడాలి. దీనిపై కొద్దిసేపట్లో క్లారిటీ వచ్చే అవకాశం ఉంది.

చంద్రబాబు ఆరోగ్యంపై లోకేష్ ఆందోళన వ్యక్తం చేశారు. 'భ‌ద్ర‌త‌లేని జైలులో చంద్రబాబు ఆరోగ్యం క్షీణించేలా చేసి ఆయ‌న‌కి ప్రాణ‌హాని తల‌పెడుతున్నారు. ఎన్న‌డూ ఏ త‌ప్పూ చేయ‌ని 73 ఏళ్ల చంద్ర‌బాబు ప‌ట్ల రాక్ష‌సంగా వ్య‌వ‌హ‌రిస్తోంది ఈ ప్ర‌భుత్వం. వ్య‌వ‌స్థ‌ల్ని మేనేజ్ చేస్తూ, జ్యుడీషియ‌ల్ రిమాండ్‌లో ఉంచుతూనే 73 ఏళ్ల చంద్ర‌బాబు గారిని అనారోగ్య కార‌ణాల‌తో అంత‌మొందించే ప్ర‌ణాళిక ఏదో ర‌చిస్తున్నారు. చంద్ర‌బాబు గారి ఆరోగ్యంపై జైలు అధికారుల తీరు సందేహాస్ప‌దంగా ఉంది. జ్యుడీషియ‌ల్ రిమాండ్‌లో ఉన్న చంద్ర‌బాబు గారిని ముద్దాయి అని హెల్త్ బులెటిన్లో ప‌దే ప‌దే పేర్కొనేందుకు పెట్టిన శ్ర‌ద్ధ ఆయ‌న ఆరోగ్యం, భ‌ద్ర‌త‌పై పెట్ట‌డంలేదు. చంద్ర‌బాబు గారికి ఏ హాని జ‌రిగినా, సైకోజ‌గ‌న్ స‌ర్కారు, జైలు అధికారుల‌దే బాధ్య‌త‌' అంటూ లోకేష్ ట్వీట్ చేశారు. మరోవైపు నారా భువనేశ్వరి, బ్రాహ్మణి కూడా చంద్రబాబు ఆరోగ్య పరిస్థితులపై ఆందోళన వ్యక్తం చేస్తున్నారు.

నారా లోకేష్ ఈ నెల 10న అమరావతి ఇన్నర్ రింగ్ రోడ్డు కేసులో సీఐడీ ముందు విచారణకు హాజరయ్యారు. మరుసటి రోజు కూడా విచారణకు వెళ్లారు.. అదే రోజు రాత్రి విచారణ తర్వాత నేరుగా ఢిల్లీ వెళ్లారు. అక్కడ కేంద్ర హోంమంత్రి అమిత్ షాతో సమావేశం అయ్యారు. అయితే శుక్రవారం చంద్రబాబు క్వాష్ పిటిషన్‌పై విచారణ వచ్చే మంగళవారానికి వాయిదా పడటం.. ఇటు చంద్రబాబు ఆరోగ్యపరమైన సమస్యలతో బాధపడుతుండటంతో లోకేష్ మళ్లీ తిరిగి ఏపీకి వచ్చారు. తిరిగి సోమవారం ఢిల్లీకి వెళ్లే అవకాశం ఉంది. చంద్రబాబు అరెస్టైన కొద్ది రోజుల తర్వాత లోకేష్ ఢిల్లీ వెళ్లారు.. అక్కడే ఉంటూ లాయర్లతో ఎప్పటికప్పుడు సంప్రదింపులు జరుపుతున్న సంగతి తెలిసిందే.