స్వలింగ వివాహాలకు సుప్రీం నో.. కోర్టు ముందే ఉంగరాలు మార్చుకున్న ఇద్దరు యువకులు

స్వలింగ సంపర్కుల వివాహాలకు చట్టబద్ధత కల్పించేందుకు సుప్రీంకోర్టు నిరాకరించిన విషయం తెలిసిందే. దీనిపై నిర్ణయం తీసుకోవాల్సిన బాధ్యతను పార్లమెంటుకు అప్పగిస్తూ సుప్రీంకోర్టు ప్రధాన న్యాయమూర్తి జస్టిస్ డీవై చంద్రచూడ్ నేతృత్వంలోని ఐదుగురు సభ్యుల రాజ్యాంగ ధర్మాసనం తేల్చి చెప్పింది. ఈ క్రమంలోనే ఎల్‌జీబీటీక్యూ సంఘాలు, స్వలింగ సంపర్కులు తీవ్ర ఆవేదన వ్యక్తం చేశాయి. ఈ నేపథ్యంలోనే తాజాగా జరిగిన ఓ సంఘటన సంచలనంగా మారింది. ఎక్కడైతే తమ హక్కులు సాధించాలని పోరాటం చేశారో అదే సుప్రీం కోర్టు వద్ద ఇద్దరు యువకులు ఉంగరాలు మార్చుకుని ఎంగేజ్‌మెంట్ చేసుకున్నారు. ఈ ఇద్దరు యువకుల్లో ఒకరు న్యాయవాది కావడం గమనార్హం.

ఈ క్రమంలోనే ఆ ఇద్దరు యువకుల్లోని ఒక వ్యక్తి అనయా కొటియా ట్విటర్ వేదికగా ఒక ఫోటో షేర్ చేశారు. తన భాగస్వామి, లాయర్ ఉత్కర్ష్ సక్సేనాతో కలిసి ఉంగరాలు మార్చుకున్న ఫోటో.. దాని వెనకాల సుప్రీంకోర్టు భవనం కనిపించేలా ఫోటో ఉంది. ఈ నేపథ్యంలోనే మంగళవారం సుప్రీంకోర్టు వెలువరించిన తీర్పుపై స్పందించిన అనయా కొటియా.. కోర్టు తీర్పు బాధించిందని పేర్కొన్నారు. అందుకే ఎక్కడైతే తమ హక్కుల గురించి పోరాటం చేశామో అక్కడే తమ ప్రేమను వ్యక్తం చేస్తూ ఈ ఎంగేజ్‌మెంట్ చేసుకున్నట్లు తెలిపారు. అయితే తమకు జరిగిన నష్టం గురించి బాధ పడాల్సిన అవసరం లేదని.. ఇది తమ నిశ్చితార్థం చేసుకున్నామని పేర్కొన్నారు. ఇప్పుడు తమకు అన్యాయం జరిగిందని.. మరొక రోజు మరొక పోరాటంతో మళ్లీ వస్తామని స్పష్టం చేశారు.

స్వలింగ సంపర్కుల పెళ్లిళ్లకు చట్టబద్ధత కోసం దాఖలైన అన్ని పిటిషన్లపై సుప్రీంకోర్టు మంగళవారం తుది తీర్పు ఇచ్చింది. మే 11 వ తేదీనే ఈ ఘటనపై విచారణ పూర్తి చేసిన సుప్రీంకోర్టు తీర్పును రిజర్వ్ చేసింది. స్వలింగ సంపర్కుల పెళ్లిళ్లకు చట్టబద్దత కల్పించలేమని.. 3:2 మెజారిటీతో సీజేఐ జస్టిస్ డీవై చంద్రచూడ్ నేతృత్వంలోని రాజ్యాంగ ధర్మాసనం సంచలన తీర్పు వెల్లడించింది. స్వలింగ వివాహం చేసుకున్న వారిని దంపతులుగా గుర్తించలేమని.. వివాహం చేసుకోవడం ప్రాథమిక హక్కు కాదని పేర్కొంది. సహ జీవనాన్ని గుర్తిస్తున్నామని.. అయితే వాటిని పెళ్లిగా గుర్తించలేమని స్పష్టం చేసింది. ప్రత్యేక వివాహ చట్టంపై పార్లమెంట్ నిర్ణయం తీసుకోవాలని సుప్రీంకోర్టు సూచించింది.