ఏపీలో ఈ చలాన్ స్కామ్ ,,,,ఏకంగా రూ.కోట్లలో దారి మళ్లించారు

ఏపీలో ట్రాఫిక్‌ ఈ-చలానాల రుసుముల దుర్వినియోగం వ్యహారం కలకలం సృష్టిస్తోంది. వాహనదారులు చెల్లించిన చలానాల సొమ్ము పక్కదారి పట్టినట్లు పోలీసులు అధికారికంగా ప్రకటించారు. మాజీ డీజీపీ సాంబశివరావు అల్లుడు కొమ్మిరెడ్డి అవినాష్‌ ఈ కేసులో ప్రధాన సూత్రధారిగా తేల్చారు. అవినాష్‌కు చెందిన డేటా ఎవాల్వ్‌ సంస్థ ఆస్తులను గుర్తించి వాటి క్రయవిక్రయాలకు తావులేకుండా రిజిస్ట్రేషన్‌ శాఖ అధికారులకు లేఖలు రాశామని గుంటూరు రేంజ్‌ ఐజీ పాలరాజు తెలిపారు. ట్రాఫిక్‌ పోలీసులు నమోదు చేసిన కేసులకు సంబంధించి జరిమానాలకు సంబంధించిన ఈ-చలానాల రూపంలో డీజీ అకౌంట్‌కు నాలుగు పేమెంట్‌ గేట్‌వేల నుంచి జమవుతుంది.

అయితే ఇందులో డేటా ఎవాల్వ్‌ సంస్థకు చెందిన రేజర్‌ పే ఖాతా నుంచి డీజీ ఖాతాకు డబ్బులు జమయ్యేలా ఒప్పందం ఉంది. కానీ ఆ సంస్థ సాఫ్ట్‌వేర్‌లో రేజర్‌పే యాప్‌ను క్లోనింగ్‌ చేసి రేజర్‌ పీఈ యాప్‌ను రూపొందించి.. ఆ సొమ్ము తమ సొంత ఖాతాకు జమయ్యేలా అక్రమాలు చేసింది. ఈ విషయంలో శాఖాపరంగా ఆడిట్‌ నిర్వహణ లోపం ఉందని.. డబ్బుల చెల్లింపుల్లో ఇప్పటి వరకు రూ.36.53 కోట్లు దుర్వినియోగమైందని గుర్తించామని తెలిపారు డీజీ. తిరుపతి డీఎస్పీ నర్సప్ప తన యూనిట్‌ నుంచి ఏ రోజు ఎంత వసూలు చేసింది ఆరా తీస్తున్న క్రమంలో మొదటి రోజు చూసిన మొత్తానికి, ఆ తర్వాత నాలుగు రోజులకు చూసిన మొత్తానికి తేడా కనిపించింది. ఆయనకు అనుమానం రావడంతో ఈ ఏడాది మే 1 నుంచి 20వరకు జరిగిన లావాదేవీలపై ఆరా తీశారు. అందులో తేడాలు గమనించడంతో విషయాన్ని ఆయన ఆగస్టు 31న పోలీసు ఉన్నతాధికారుల దృష్టికి తీసుకొచ్చారు. వెంటనే పోలీస్‌శాఖ అంతర్గతంగా విచారణ జరిపించడంతో కుంభకోణం బయటపడింది.

రేజర్‌పే అకౌంట్ నుంచి డీజీపీ ఖాతాకు నగదు వెళ్లడం లేదు.. ఈ మొత్తాన్ని అవినాష్‌కు చెందిన రేజర్‌ పీఈ ఖాతాకు మళ్లించుకున్నట్లు తేలింది. 2017 జూన్‌ 27న అప్పటి డీజీపీ సాంబశివరావు డేటా ఎవాల్వ్‌ సొల్యూషన్స్‌కు ఈ-చలానాల సర్వీస్‌ ప్రొవైడర్‌ బాధ్యతలు అప్పగిస్తూ ఆదేశాలు జారీ చేశారు. ఆన్‌లైన్‌లో బిడ్డింగ్‌లో ఒక్క రూపాయికే కోట్‌ చేసి, టెండరు దక్కించుకున్న ఆ సంస్థ నిర్వాహకులు.. డీజీపీ ఖాతాకు జమ కావాల్సిన నగదులో రూ.36.53 కోట్లను సంస్థ సొంత ఖాతాల్లోకి మళ్లించుకున్నారు. ఎవరికీ అనుమానం రాకుండా కొంత మొత్తం నొక్కేసి మిగిలిన మొత్తాన్ని రజోర్‌ పే గేట్‌ వే ద్వారా డీజీపీ ఖాతాకు జమ చేస్తున్నారు. ఐదేళ్లుగా ఈ సంస్థ వసూలు చేసిన వంద కోట్లలో రూ.36.53 కోట్లు కాజేసింది.

ఈ వ్యవహారంపై తాడేపల్లి పోలీస్‌స్టేషన్‌లో ఫిర్యాదు చేయగా కేసు నమోదు చేశారు. ఆ సంస్థలో పని చేస్తున్న కొత్తపల్లి రాజశేఖర్‌ను అరెస్ట్‌ చేసి కోర్టులో హాజరు పరిచారు పోలీసులు.. మిగిలిన నిందితులు పరారీలో ఉన్నారు. వారిని త్వరలో అరెస్టు చేసి.. దారి మళ్లిన సొమ్ము రూ.36.53 కోట్లకు సంబంధించి ఆస్తులను సీజ్‌ చేశామని డీజీ పాలరాజు తెలిపారు. అన్ని వివరాలు తెలిశాక అవినాష్‌తో పాటు ఆ సంస్థలో డైరెక్టర్లుగా ఉన్న అతని సోదరి అక్షిత, రవికిరణ్‌లను బాధ్యులుగా గుర్తించి కేసు నమోదు చేశామన్నారు. వారందరిపైనా నిఘా పెట్టామని, త్వరలోనే అరెస్టు చేస్తామని చెప్పారు. ఆ నగదు ఎవరెవరి ఖాతాల్లోకి వెళ్లింది, వాటి ద్వారా ఏఏ ఆస్తులు కొనుగోలు చేశారనేది గుర్తించి వాటిని జప్తు చేశామన్నారు. మాజీ డీజీపీ సాంబశివరావు నుంచి తమకు ఎలాంటి ఒత్తిళ్లు లేవని చెప్పారు.