పండుగ పూట తీవ్ర విషాదం.. టూర్‌కు వచ్చిన నలుగురు యువకులు గోదారిలో గల్లంతు

పండుగ పూట తీవ్ర విషాదం నెలకొంది. తన పుట్టిన రోజు సందర్భంగా స్నేహితులతో కలిసి పార్టీ చేసుకుందామని అందరూ కలిసి యానాంకు వచ్చారు. సరదాగా గడిపిన తర్వాత గోదావరిలో స్నానం చేసేందుకు దిగారు. ఈ క్రమంలో నలుగురు గల్లంతయ్యారు.

పండుగ వేళ తీవ్ర విషాదం చోటుచేసుకుంది. స్నేహితులంతా కలిసి ఎంతో సరదాగా వెళ్లిన విహారయాత్ర కాస్త.. తీరని విషాద యాత్రగా మారింది. నలుగురు స్నేహితులు గోదావరిలో మునిగి గల్లంతయ్యారు. ఈ గుండెలు పిండేసే ఘటన కాకినాడ జిల్లా తాళ్లరేవు మండలం గోపలంక దగ్గర ఈ ఘటన జరిగింది. కాలేజీలకు సెలవులు కావటం, అందులోనూ ఓ స్నేహితుడి పుట్టిన రోజు కూడా కావటంతో.. ఏడుగురు స్నేహితులు కలిసి సరదాగా యానంకు విహారయాత్రకు వచ్చారు. ఎంతో ఆనందంగా గడుపుదామని వచ్చిన వారి జీవితాల్లో తీరని విషాదం నిండింది.

పశ్చిమ గోదావరి జిల్లా తణుకు దగ్గరున్న సజ్జాపురానికి చెందిన హనుమకొండ కార్తీక్ అనే యువకుడు పుట్టిన రోజు కావటంతో.. తన స్నేహితులందరికీ పార్టీ ఇచ్చేందుకు సలాది దుర్గామహేష్, మద్దిన ఫణీంద్ర గణేష్, కొమ్మిరెడ్డి చైతన్య, పెండ్యాల బాలాజీ, నేదూరి భానుప్రసాద్‌, తిరుమలరావు రాంతేజతో కలిసి యానాం వచ్చారు. యానాంలో ఎంతో సరదాగా గడిపిన ఈ స్నేహితులు.. తిరిగి వెళ్తున్న క్రమంలో తాళ్లరేవు మండలం గోపులంక పుష్కరఘాట్ వద్ద స్నానం చేసేందుకు గోదావరిలో దిగారు. కార్తీక్ అనే యువకుడు గోదావరిలోకి దిగి స్నానం చేస్తూ మునిగిపోతుండగా.. మిగిలిన వారు అతన్ని కాపాడే ప్రయత్నం చేశారు. ఈ క్రమంలో నలుగురు గల్లంతయ్యారు. మిగిలిన ముగ్గురు సురక్షితంగా బయటపడ్డారు. పెండ్యాల బాలాజి, ముద్దన ఫణీంద్ర గణేష్, తిరుమల రవితేజతో పాటు పుట్టిన రోజు జరుపుకుంటున్న హనమకొండ కార్తీక్ కూడా గోదావరిలో మునిగిపోయి గల్లంతయ్యాడు. సమాచారం అందుకున్న వెంటనే పోలీసులు హుటాహుటిన సంఘటనా స్థలానికి చేరుకుని గాలింపు చర్యలు చేపట్టారు.