గుండెపోటుతో గంటపాటు ఆగిన హృదయ స్పందనలు.. అద్భుతం చేసిన వైద్యులు

మానవ శరీరంలో ముఖ్యమైన అవయవం గుండె. పిడికెడంత పరిమాణంలో ఉండే గుండె ద్వారా శరీరంలోని అన్ని భాగాలకు రక్తం, ఆక్సిజన్ సరఫరా అవుతుంది. అలాంటి గుండె దాదాపు గంట పాటు కొట్టుకోకుండా ఆగిపోతే మనిషి బతుకడం అసాధ్యం? కానీ, కానీ ఒక్కోసారి అద్భుతాలు జరుగుతాయి. ఓ 38 ఏళ్ల వ్యక్తికి అకస్మాత్తుగా గుండెపోటు వచ్చి దాదాపు గంట గుండె కొట్టుకోవడం నిలిచిపోతే.. వైద్యులు తిరిగి అతడి శ్వాసను పునరుద్దరించి గుండె కొట్టుకునేలా చేశారు. అనంతరం ఐసీయూలో చికిత్స తీసుకుని.. కోలుకోవడంతో ఆస్పత్రి నుంచి డిశ్చార్జ్ అయ్యాడు. ఆధునిక వైద్యశాస్త్రం చేసిన ఈ అద్భుత సంఘటన మహారాష్ట్రలోని నాగ్‌పూర్‌లో చోటుచేసుకుంది.

అమెరికన్ హార్ట్ అసోసియేషన్ ప్రకారం స్పాంటేనియస్ సర్క్యులేషన్ లేదా హృదయ స్పందన తిరిగి రాకపోతే 40 నిమిషాల తర్వాత కార్డియోపల్మోనరీ రిససిటేషన్ నిలిపివేస్తారు. కానీ, ఈ కేసులో కార్డియాలజిస్ట్ డాక్టర్ రిషి లోహియా.. రోగి వయస్సును దృష్టిలో ఉంచుకుని 40 నిమిషాలు మించిపోయినా గుండెకు శ్వాసను పునరుద్ధరించే వరకు డీఫిబ్రిలేషన్ షాక్‌లతో కూడిన సీపీఆర్ కొనసాగించారు. ఆస్పత్రి రికార్డుల ప్రకారం బాధితుడికి 45 నిమిషాల పాటు సీపీఆర్ చేశారు.

స్పాంటేనియయస్ సర్క్యూలేషన్ 30 సెకన్ల పాటు రికార్డ్ చేసినప్పుడు మొదటి సీపీఆర్ 20 నిమిషాలకు పైగా కొనసాగిందని, అయితే అత్యవసర పరిస్థితి కారణంగా డాక్యుమెంట్ లేకుండా పోయిందని డాక్టర్ లోహియా చెప్పారు. ‘వెంట్రిక్యులర్ ఫిబ్రిలేషన్ కనిపిస్తే కార్డియాక్ మసాజ్‌తో పాటు షాక్‌లు ఉపయోగించాలి... ఇది గుండెను పునఃప్రారంభించడంలో సహాయపడుతుంది’ అని ఆయన చెప్పారు. ఎక్కువ సమయం సీపీఆర్ వల్ల పక్కటెముకలు విరిగిపోయే ప్రమాదం ఉంటుంది. పదేపదే షాక్‌ల వలన చర్మం కాలిపోతుంది. కానీ, ఈ కేసులో బాధితుడికి అటువంటి దుష్ప్రభావాలు ఎదురుకాలేదని, సీపీఆర్ సరైన విధానంలో చేశామన్నారు. కాగా, ఐటీ కంపెనీలో పనిచేసే బాధితుడికి తొలుత మూడు నాలుగు రోజుల పాటు గుండెల్లో మంటలా వచ్చిందని, ఆగస్టు 25న అకస్మాత్తుగా గుండెపోటుకు గురయ్యాడని వైద్యులు తెలిపారు. అతడు KIMS-కింగ్స్‌వే హాస్పిటల్‌కు చేరుకునేలోపు రెండుసార్లు అపస్మారక స్థితికి చేరుకున్నాడు.

ఆస్పత్రికి చేరుకున్న తర్వాత వైద్యులు.. దాదాపు గంటపాటు సీపీఆర్ చేసి, షాక్‌లు ఇచ్చి తిరిగి గుండెకొట్టుకునేలా చేశారు. అతడికి 40 రోజుల పాటు వెంటిలేటర్ సపోర్ట్ అవసరం కాగా.. ఎనిమిదో రోజు తర్వాత అతడు స్పందించాడు. 45 రోజుల పాటు ఐసీయూలో ఉండి అద్భుతంగా కొలుకున్న ఆయన.. అక్టోబరు 13 ఆస్పత్రి నుంచి డిశ్చార్జ్ అయ్యాడు.