నిజం గెలవాలని మేం కూడా అదే కోరుకుంటున్నాం: మంత్రి రోజా

నిజం గెలిస్తే చంద్రబాబు జీవితకాలం చంద్రబాబు జైల్‌లో ఉంటారన్నారు మంత్రి రోజా. ఆయనతో పాటుగా లోకేష్, భువనేశ్వరి కూడా జైల్‌కి వెళ్ళే అవకాశం ఉందన్నారు. మంత్రి మంగళవారం ఉదయం స్వామి వారి నైవేద్యం విరామ సమయంలో తిరుమల శ్రీవారి సేవలో పాల్గొని మొక్కులు చెల్లించుకున్నారు. దర్శనం తర్వాత ఆలయ పండితులు వేద ఆశీర్వనం అందించగా.. ఆలయ అధికారులు శేష వస్త్రంతో సత్కరించి తీర్థ ప్రసాదాలు అందజేశారు. నారా భువనేశ్వరి నిజం గెలవాలి అని గట్టిగా శ్రీ వేంకటేశ్వరస్వామి దగ్గర పూజలు చేసినట్లు ఉన్నారని.. తాము కూడా నిజం గెలవాలని మనస్ఫూర్తిగా కోరుకుంటున్నాను అన్నారు.

నిజంగా భువనేశ్వరికి నిజం గెలవాలని ఉంటే సీబీఐ ఎంక్వైరీ వేయాల‌ని కోరాలన్నారు.‌ స్కిల్ డెవలప్‌మెంట్ స్కాంపై సీబీఐ విచారణ వేయించుకుంటే నిజం తప్పకుండా గెలుస్తుందన్నారు. ఇన్నర్ రింగ్ రోడ్డు ఎలైన్మెంట్‌పై నిజం గెలవాలని సీబీఐ ఎంక్వైరీ వేసుకుంటే హెరిటేజ్‌లో ఎవరెవరు ఉన్నారో అందరూ బయట పడతారన్నారు. పవన్, లోకేష్‌ను చూస్తే పాడుతా తీయగా సెలక్షన్‌‌కి ఇటు ఒక బ్యాచ్, అటు ఒక బ్యాచ్ కూర్చుకుని సెలక్ట్ చేసినట్లు ఉందన్నారు. అర సున్నా, అర సున్నా కూర్చుని లోపల ఉన్న గుండు సున్నా కోసం పార్టీ దిశానిర్దేశం చేయడం చూసి ప్రజలకు ఫన్నీగా ఉందని ఎద్దేవా చేశారు.

పవన్, లోకేష్ ఇద్దరిని ప్రజలు ఓడించారని.. అలాంటి వారు దిశా నిర్దేశం చేయడం ఏంటన్నారు. ఇదేమి కర్మరా బాబు అని పార్టీల్లో వాళ్లు వాపోతున్నారని.. 14 ఏళ్లలో మేనిఫెస్టోలో ఇది చేశాం అని ప్రజల దగ్గరకు వెళ్లి ఓట్లు అడిగే దమ్ము ధైర్యం టీడీపీకి లేదన్నారు. మొదటి సారి సీఎం అయినా సరే వైఎస్ జగన్మోహన్ రెడ్డి మేనిఫెస్టోలో ఇచ్చిన హామీ 98 శాతం పూర్తి చేశారని.. వై ఏపీ నీడ్స్ జగన్ అని చెప్పి గడప గడపకు వెళ్తున్నామన్నారు. వై ఏపీ నీడ్స్ చంద్రబాబు, వై ఏపీ నీడ్స్ పవన్ అని ప్రజల ముందుకు వెళ్ళే దమ్ము ఉందా అంటూ ప్రశ్నించారు.

ప్రజలు మూతి పగల గొడతారని తెలుసుకున్న టీడీపీ, జనసేన ఏపీ హేట్స్ అనే ప్రోగ్రాంతో వెళ్తున్నారన్నారు. రాష్ట్రం మీద చిత్తశుద్ది లేదని, ప్రజలపై కూడా చిత్తశుద్ది లేదన్నారు. యువగళం చేయలేక నారా లోకేష్ మంగళం పాడితే, ఫ్యాషన్ షోకు వెళ్లినట్లు భువనేశ్వరి నిజం గెలవాలి అంటూ బస్సు యాత్ర చేస్తున్నారన్నారు. ఈ యాత్ర నారా భువనేశ్వరి చేయగలరా అని అడిగారు.. తండ్రిపైన చొప్పులు వేసినప్పుడే, తండ్రి పార్టీ లాక్కునే సమయంలో, తండ్రి చావుకు కారమణైన వీళ్లు హ్యాపీగా ఉన్నారన్నారు. వీళ్లు రాష్ట్ర ప్రజల కోసం ఏం కష్ట పడతారన్నారు.

భువనేశ్వరి కోరుకున్న నిజం గెలవాలి.. చంద్రబాబు లోపల ఉండాలని అనే విధంగా ఆలోచిస్తున్నారన్నారు. ఫైబర్ గ్రిడ్, స్కిల్ డెవలెప్‌మెంట్‌లో, రాజధాని భూముల్లో, రాజధాని ఇన్నర్ రింగ్ రోడ్డులో ఎన్నో స్కాంలు చంద్రబాబు చేశారన్నారు. ఇప్పటికైనా తిన్న డబ్బులు కక్కి, ప్రజలకు క్షమాపణ‌ కోరి బెయిల్‌పై బురద జల్లితే ప్రజలు ఊరుకునేది లేదన్నారు. 2024 జగనన్న వన్స్ మోర్ అని‌ ప్రజలు ఫిక్స్ అయ్యారన్నారు.