ఏపీపై వాయుగుండం ప్రభావం.. రెండు, మూడు రోజుల పాటూ వర్షాలు

ఏపీకి చల్లని కబురు చెప్పింది వాతావరణశాఖ. పశ్చిమ బంగాళాఖాతంలో వాయుగుండం కేంద్రీకృతమైనట్లు తెలిపారు. ఇది క్రమంగా తుఫాన్‌గా, అనంతరం తీవ్ర తుఫాన్‌గా మారే అవకాశాలున్నట్లు అంచనా వేస్తున్నారు. అక్టోబర్‌ 25న బంగ్లాదేశ్‌లో తీరం దాటే అవకాశం ఉందని.. ఈ వాయుగుండం కారణంగా కోస్తాలో రెండు మూడు రోజుల పాటు వర్షాలు కురుస్తాయంటున్నారు.ఇవాళ శ్రీకాకుళం, విజయనగరం, పార్వతీపురం మన్యం, అల్లూరి సీతారామరాజు, విశాఖపట్నం, అనకాపల్లి జిల్లాల్లో తేలికపాటి నుంచి మోస్తరు వానలు పడతాయంటున్నారు.

ఈ వాయుగుండం సముద్రంలోనే బలహీనపడి బంగ్లాదేశ్ లోని చిట్టిగాంగ్ సమీపంలో తీవ్ర వాయుగుండంగా, లేని పక్షంలో తీవ్ర తుఫాన్‌గా మారి తీరం దాటే అవకాశం ఉంది. ఈ ప్రభావంతో ఉత్తరాంధ్రలో మేఘావృతంగా ఉంది. తీరం వెంబడి బలమైన గాలులు వీస్తున్నాయి. దీంతో మత్య్సకారులు వేటకు వెళ్లొద్దని అధికారులు సూచించారు. మరి ఈ తుఫాన్ ప్రభావం ఏపీపై ఎలా ఉంటుంది అన్నది పూర్తి స్థాయిలో క్లారిటీ రాలేదు.

మరోవైపు రాష్ట్రంలో ఈశాన్య రుతుపవ­నాల చురుకుదనానికి వాయుగుండం బ్రేకులు వేసింది. మళ్లీ ఇవి వేగం పెంచుకోవడానికి మరి­కొన్ని రోజుల సమయం పడుతుంది అంటున్నారు. ప్రస్తుతం పశ్చిమ మధ్య బంగాళాఖాతంలోని వాయుగుండం ప్రభావంతో ఈశాన్య రుతుపవనాలు ఏపీపై ప్రభావం చూపలేకపోతున్నాయి. ఈ వాయుగుండం తీరాన్ని దాటే వరకు ఇదే పరిస్థితి ఉంటుందని అంచనా వేస్తున్నారు. వాయుగుండం బెంగాల్‌ తీరాన్ని దాటడానికి ఇంకా నాలుగైదు రోజులు పడుతుంది అంటున్నారు. ఆ తర్వాత మరో రెండు మూడు రోజులకు గాని ఈశాన్య గాలుల్లో తేమ ఏర్పడే పరి స్థితి ఉండదంటున్నారు.

ఈ కారణంగా ఈశాన్య రుతుపవనాలు బలం పుంజుకోవడానికి కనీసం వారం రోజులైనా పడుతుందని అంచనా. ఏపీలో ఆశించిన స్థాయిలో వర్షాలు కురవాలంటే అప్పటివరకు వేచి ఉండాల్సిందే అంటున్నారు. వాస్తవానికి పశ్చిమ మధ్య బంగాళాఖాతంలో అల్పపీడనం గాని, వాయుగుండం గాని ఏర్పడితే ఏపీలో సమృద్ధిగా వర్షాలు కురుస్తాయి. కానీ ప్రస్తుత వాయుగుండం పశ్చిమ మధ్య బంగాళాఖాతంలోనే ఏర్పడినప్పటికీ అది తీరానికి దూరంగా ఉంది. పైగా ఈ వాయుగుండం ఆంధ్ర తీరం వైపు కాకుండా బెంగాల్‌ వైపు పయనిస్తోంది. ఫలితంగా ఏపీలో వర్షాలు కురవడం లేదని..రాష్ట్రంలో సమృద్ధిగా వర్షాలకు వారమైనా పట్టవచ్చని అంచనా వేస్తున్నారు. మరోవైపు ఈశాన్య రుతుపవనాల ఆగమనానికి సూచికగా తమిళనాడులో శనివారం నుంచి వర్షాలు ప్రారంభమయ్యాయని ఐఎండీ తెలిపింది. మరోవైపు ఏపీలో ఎండలు మండిపోతున్నాయి.. ఉక్కపోతతో జనాలు అల్లాడిపోతున్నారు. అయితే వాయుగుండం ప్రభావంతో వర్షాల పడతాయన్న అంచనాతో కాస్త ఆశగా ఉన్నారు.