భగవంతుడి విషయాల్లో జాగ్రత్తగా మాట్లాడాలి: టీటీడీ ఛైర్మన్

ప్రతి అంశాన్నీ రాజకీయ కోణంతో చూసి విమర్శించడం సరైన చర్య కాదని టీటీడీ ఛైర్మన్ భూమన కరుణాకర్ రెడ్డి అన్నారు. ముఖ్యంగా భగవంతుడికి సంబంధించిన విషయాల్లో నోరు అదుపులో పెట్టుకొని మాట్లాడాలని విమర్శకులకు ఆయన హితవు పలికారు. ‘అందరూ భక్తులే కావచ్చు. కానీ, మాట్లాడే ముందు అది సకారాత్మక దృక్కోణమా, లేక నకారాత్మక దృక్కోణమా అనేది ఆత్మ విమర్శ చేసుకోవాలి. మనం చేసే సలహా సద్విమర్శగా ఉండాలి. అది కూడా భగవంతునికి సంబంధించిన విషయాల్లో అయితే, ఓ సలహాగానే ఉండాలి తప్ప విమర్శల దాడి చేసి వ్యక్తిగత ప్రతిష్టను పెంచుకోవాలని చూస్తే మాత్రం దేవుడి పట్ల అపచారం చేసిన వాళ్లవుతారు’ అని భూమన వ్యాఖ్యానించారు. తిరుమలలో పార్వేటి మండపాన్ని కూల్చి, కొత్త మండపాన్ని నిర్మించడంపై వస్తున్న విమర్శలపై ఆయన తీవ్రంగా స్పందించారు.

‘మనకు వచ్చిన ఆలోచనే చాలా శాస్త్రీయమైనదని అనుకుంటే అది వారి పొరపాటే. టీటీడీలో పనిచేస్తున్న అర్చకులు కావచ్చు, ఆగమ పండితులు కావచ్చు, లేదా అత్యున్నత అధికారులు కావొచ్చు.. వారందరూ జ్ఞానం లేకుండా పనిచేస్తారని, తామొక్కరమే చాలా గొప్పగా ఆలోచిస్తామని అనుకోవడం బాధాకరం’ అని భూమన కరుణాకర్ రెడ్డి అన్నారు. అతిపురాతమైన మండపం కావడం, కూలడానికి సిద్ధంగా ఉన్న పరిస్థితుల్లోనే తిరుమల పార్వేటి మండపాన్ని జీర్ణోద్ధరణ చేశామని భూమన తెలిపారు. దాని స్థానంలో ప్రాచీన సంప్రదాయ పద్ధతులు ఉట్టిపడేలా అత్యద్భుతంగా నూతన మండపాన్ని టీటీడీ నిర్మించిందని ఆయన చెప్పారు. ‘ఈ రోజు పార్వేటి ఉత్సవానికి విచ్చేసిన ప్రతి భక్తుడూ ఈ నూతన మండప నిర్మాణం పట్ల తమ ఆనందాన్ని వ్యక్తం చేస్తున్నారు’ అని భూమన అన్నారు.

తిరుమలలో నూతనంగా నిర్మించిన పార్వేటి మండపంలో స్వామి వారి పార్వేటి ఉత్సవాన్ని ఘనంగా నిర్మించారు. మంగళవారం (అక్టోబర్ 24) ఉదయం స్వామి, అమ్మవార్లను ఊరేగింపుగా పార్వేటి మండపానికి వేంచేపు చేశారు. స్వామి, అమ్మవార్లకు ఆలయ అర్చకులు శాస్త్రోక్తంగా స్నపన తిరుమంజనం కార్యక్రమాన్ని నిర్వహించారు. అనంతరం స్వామి వారు శేషాచలం అటవీ ప్రాంతంలో వేట సాగించే దృశ్యాన్ని అర్చకులు కళ్లకు కట్టినట్లు నిర్వహించారు. ఈ కార్యక్రమం అనంతరం మీడియాతో టీటీడీ ఛైర్మన్ భూమన కరుణాకర్ రెడ్డి మాట్లాడారు.

‘టీటీడీ అధికారులంతా చాలా భక్తితో పని చేస్తారు. భక్తులకు మెరుగైన సౌకర్యాలు అందించాలని తపన పడుతుంటారు. భక్తులందరూ ఈ విషయాన్ని గమనించాలి. వందల సంవత్సరాల నుంచి ఉన్న నిర్మాణాలు ఉపయోగంలో లేనప్పుడు వాటిని కాపాడుకోవడం తేలికే. కానీ, వాటిని ప్రతిసారి వినియోగించుకోవాలి అనుకున్నప్పుడు.. వాటితో ప్రయోగాలు చేయడం చాలా ప్రమాదం. పార్వేటి మండపం చాలా శిథిలావస్థలో కూలిపోయే పరిస్థితిలో ఉండేది కాబట్టే దాన్ని ఆధునికీకరించడం జరిగింది’ అని భూమన కరుణాకర్ రెడ్డి అన్నారు.

పాత పార్వేటి మండపంలో ఉండే కళాఖండాలను, చిత్రాలు తీసి భద్రపరిచి.. నూతన పార్వేటి మండపంలో వాటిని అలాగే ఉంచి అత్యంత సుందరంగా తీర్చిదిద్దామని భూమన తెలిపారు. ‘టీటీడీ ఈవో ధర్మారెడ్డికి వచ్చిన చాలా చక్కటి ఆలోచన ఇది. మండపాన్ని చాలా చక్కగా ఆధునికీకరించాం. ప్రతి భక్తుడు ఈ నిర్ణయాన్ని అభినందిస్తున్నారు. అనాదిగా వస్తున్న సాంప్రదాయాలను పాటిస్తూ ఈ ఏడాది కూడా పార్వేటి మండపంలో పార్వేటి ఉత్సవాన్నిన శాస్త్రోక్తంగా నిర్వహించాం’ అని టీటీడీ ఛైర్మన్ భూమన అన్నారు.