ఆర్ట్ ఆఫ్ లివింగ్ కేంద్రంలో వేడుక,,,భారతీయ వైదిక సంప్రదాయంలో విదేశీ జంటల వివాహం

భారతీయ సంప్రదాయాలకు ప్రపంచవ్యాప్తంగా ప్రత్యేక గుర్తింపు ఉంది. మన వివాహ సంస్కృతిపై విదేశీయులకు ఆసక్తి పెరుగుతోంది. జపాన్, మంగోలియా, అమెరికా తదితర దేశాల నుంచి మనదేశానికి వచ్చిన జంటలు భారతీయ వైదిక సంప్రదాయం ప్రకారం పెళ్లి చేసుకున్నాయి. బెంగళూరులోని ఆర్ట్ ఆఫ్ లివింగ్ అంతర్జాతీయ కేంద్రం ఇందుకు వేదికైంది. విజయదశమి పర్వదినాన జరిగిన ఈ వివాహ వేడుకకు గురుదేవ్ శ్రీశ్రీ రవిశంకర్ స్వయంగా హాజరై వధూవరులను ఆశీర్వదించారు. వైదిక వివాహ మంటపంలో భారతీయ వైదిక సంప్రదాయం ప్రకారం ఈ వివాహాలు జరిగాయి.

ఆధ్యాత్మిక జ్ఞానం, యోగా, ఆయుర్వేదపు జ్ఞానాన్ని అందిస్తూ ప్రపంచవ్యాప్తంగా కోట్లాది మందిని ప్రభావితం చేస్తున్న గురుదేవ్.. కాలక్రమంలో మరుగున పడుతున్న అనేక భారతీయ సంప్రదాయాలను కూడా పునరుద్ధరించేందుకు సంకల్పించారు. లోతైన ఆధ్యాత్మిక ప్రాధాన్యత కలిగిన సంప్రదాయాలు, మంత్రాలతో కూడిన వైదిక వివాహ విధానం వాటిలో ఒకటి. వర్తమాన భారతీయ వివాహాలలో సంప్రదాయాలు క్రమంగా మరుగున పడి, ఆడంబరాలు హెచ్చుమీరుతున్న ప్రస్తుత తరుణంలో వేదమంత్రాల సాక్షిగా ప్రమాణాలు, ఒకరి పట్ల మరొకరు నిబద్ధత కలిగి ఉండటం లాంటి మౌలిక అంశాలకు ప్రాధాన్యం ఇచ్చే వైదిక వివాహాలకు గురుదేవ్ తిరిగి ప్రాచుర్యం కల్పిస్తున్నారు. ప్రాచీన వాఙ్మయం ప్రకారం చూసినప్పుడు, వివాహ సందర్భంగా పఠించే వేదమంత్రాలు.. విశ్వచైతన్యం ఒకటి మాత్రమే అనే సత్యాన్ని పెళ్లి చేసుకునే జంటకు గుర్తు చేస్తూ, వారి మధ్య అనంతకాలం నిలిచి ఉండే బాంధవ్యాన్ని ముడివేస్తాయి. మరోవిధంగా చెప్పాలంటే అన్నం, పప్పుతో కలిసి పూర్ణం అయినట్లుగా అన్నమాట.

భారతీయ వైదిక సంప్రదాయంలో వివాహం చేసుకున్న మంగోలియాకు చెందిన జంట బయాస్‌గలన్, సురేంజార్గల్ తమ సంతోషాన్ని వ్యక్తం చేశారు. ‘ఇది మాపై ఆశీర్వాదాల వర్షం కురిసినట్లు అనిపించింది. ఈ రోజు మాకు సరికొత్త ప్రారంభం’ అని వారన్నారు. ‘మేము 8 సంవత్సరాలుగా కలిసి ఉంటున్నాము. వైదిక పద్ధతిలో వివాహం జరగాలని నా భాగస్వామి ఎప్పటి నుంచో కోరుకుంటోంది. పురోహితుల జపవిధానం, వివాహ ప్రక్రియ నుంచి స్వయంగా గురుదేవుని ఆశీర్వాదాలు పొందడం వరకూ వివాహ వేడుక చక్కగా, సంప్రదాయబద్ధంగా జరిగింది. మాకు ఇంతకంటే మరే కోరికా లేదు’ అని దక్షిణాఫ్రికాలోని కేప్‌టౌన్ నుంచి వచ్చి వివాహం చేసుకున్న రే మోంగీ, లారెన్ డెర్బీ లూయిస్ దంపతులు పేర్కొన్నారు.

దసరా నవరాత్రి ఉత్సవాల సందర్భంగా 9 రోజుల పాటు ఆర్ట్ ఆఫ్ లివింగ్ అంతర్జాతీయ కేంద్రంలో ప్రాచీన వేద మంత్రోచ్ఛారణలు, పవిత్రమైన హోమాలు, భక్తి సంగీత-నృత్యోత్సవాల శోభతో కూడిన వాతావరణం వెల్లివెరిసింది. వివిధ దేశాల నుంచి, దేశంలోని వివిధ ప్రాంతాల నుంచి వచ్చిన లక్షలాది భక్తులు భక్తి, జ్ఞానం, ఆనంద సంగమంగా సాగిన నవరాత్రి ఉత్సవాలలో పాలుపంచుకున్నారు. జగదాంబను, దేవీశక్తిని పూజించే ఈ ఉత్సవాలలో భాగంగా.. నేపాల్, యునైటెడ్ అరబ్ ఎమిరేట్స్, మారిషస్, కెనడా సహా ప్రపంచవ్యాప్తంగా 30 దేశాలలో చండీ హోమం, మన దేశంలో 100 ప్రాంతాలలో దుర్గా హోమం కార్యక్రమాలు ఆర్ట్ ఆఫ్ లివింగ్ ఆధ్వర్యంలో నిర్వహించారు. బెంగళూరులోని ఆర్ట్ ఆఫ్ లివింగ్ ప్రధాన కేంద్రంలోని ఆశ్రమంలో వంటశాలలో దుర్గాష్టమి రోజున భక్తుల కోసం 17 రకాల శాకాహార వంటకాలను సిద్ధం చేసి, 1,20,000 మందికి దేవీ ప్రసాదంగా వడ్డించారు.