ఖమ్మంలో అంబటికి నిరసన సెగ,,,గోబ్యాక్ అంటూ టీడీపీ శ్రేణుల ఆందోళన
Andhra Pradesh Telugu | Suryaa Desk | Published : Fri, Oct 27, 2023, 06:36 PM
ఏపీ నీటిపారుదల శాఖ మంత్రి అంబటి రాంబాబుకు తెలంగాణలో నిరసన సెగ తగిలింది. ఓ ప్రైవేట్ కార్యక్రమంలో పాల్గొనేందుకు ఖమ్మం పట్టణానికి వచ్చిన ఆయన గ్రాండ్ గాయత్రి హోటల్‌లో బస చేశారు. ఈ విషయం తెలుసుకున్న స్థానిక టీడీపీ శ్రేణులు పెద్ద ఎత్తున హోటల్ వద్దకు చేరుకుని ఆందోళన చేపట్టారు. సీఎం జగన్, రాంబాబుకు వ్యతిరేకంగా నిరసన వ్యక్తం చేసారు. 'సీఎం జగన్ డౌన్ డౌన్.. అంబటి రాంబాబు డౌన్ డౌన్' అంటూ నినాదాలు చేశారు. 'ఖమ్మం గడ్డ టీడీపీ అడ్డా.. ఇక్కడికి నువ్వెందుకొచ్చావ్' అంటూ రాంబాబును టీడీపీ నేతలు నిలదీశారు.
టీడీపీ కార్యకర్తల ఆందోళనతో షాక్‌కు గురైన అంబటి రాంబాబు.. కారెక్కి వెళ్లిపోయేందుకు ప్రయత్నించారు. కారును అడ్డుకున్న టీడీపీ కార్యకర్తలు.. ముందుకు పోనీయకుండా జై చంద్రబాబు అంటూ పెద్ద ఎత్తున నినాదాలు చేశారు. ఈ ఘటనతో ఆ మార్గంలో కాసేపు ట్రాఫిక్‌కు జామ్ ఏర్పడింది. విషయం తెలుసుకున్న స్థానిక పోలీసులు.. ఆందోళనకారులను చెదరగొట్టారు. దీంతో మంత్రి కారుకు అడ్డంకులు తొలగిపోయాయి. ఆయన పర్యటనకు ఎలాంటి ఆటంకాలు కలగకుండా ఖమ్మం పోలీసులు బందోబస్తు ఏర్పాటు చేశారు. ఆ తర్వాత ప్రైవేటు కార్యక్రమంలో పాల్గొనేందుకు అంబటి అక్కడి నుంచి వెళ్లిపోయారు.
|
|