ఏపీ హైకోర్టులో చంద్రబాబుకు నో రిలీఫ్,,,,నాట్ బిఫోర్ మీ అన్న న్యాయమూర్తి

మాజీ ముఖ్యమంత్రి చంద్రబాబు స్కిల్‌ డెవలప్‌మెంట్‌ కేసుకు సంబంధించి హైకోర్టులో దాఖలు చేసిన బెయిల్‌ పిటిషన్‌, మధ్యంతర బెయిల్‌ అనుబంధ పిటిషన్‌లపై విచారణ జరిగింది. దసరా సెలవుల ప్రత్యేక బెంచ్‌ (వెకేషన్‌ బెంచ్‌) విచారణ చేసింది. అయితే న్యాయమూర్తి జస్టిస్‌ వెంకట జ్యోతిర్మయి ప్రతాప బెంచ్‌ నాట్ బిఫోర్ మీ అన్నారు. ఈ పిటిషన్లపై విచారణ ఏ బెంచ్‌ చేయాలో హైకోర్టు ప్రధాన న్యాయమూర్తి నిర్ణయిస్తారని జడ్జి తెలిపారు. ఈ పిటిషన్ల వివరాలను సీజే ముందు ఉంచాలని రిజిస్టార్‌ను ఆదేశించారు. ఈ పిటిషన్లపై విచారణను ఈ నెల 30కి వాయిదా వేశారు.

విజయవాడ ఏసీబీ కోర్టు బెయిల్‌ ఇచ్చేందుకు నిరాకరించడంతో చంద్రబాబు హైకోర్టును ఆశ్రయించారు. ఈ నెల 19న హైకోర్టు ఈ పిటిషన్‌పై విచారణ జరిపింది.. ఆ తర్వాత వెకేషన్‌ బెంచ్‌ ముందుకు వాయిదా వేసింది. చంద్రబాబుకు సంబంధించిన వైద్య నివేదికలను 27నాటి విచారణకు కోర్టు ముందు ఉంచాలని రాజమహేంద్రవరం సెంట్రల్ జైలు అధికారులను ఆదేశించిన సంగతి తెలిసిందే. అయితే చంద్రబాబు తరఫు లాయర్లు గురువారం (26న) ఏపీ హైకోర్టులో హౌస్ మోషన్ పిటిషన్ దాఖలు చేశారు.

చంద్రబాబు కంటికి అత్యవసరంగా ఆపరేష్ అవసరం ఉందని.. అలాగే వ్యక్తిగత వైద్యుల ద్వారా చికిత్స తీసుకోవాల్సి ఉన్నందున మధ్యంతర బెయిలు మంజూరు చేయాలని పిటిషన్‌ దాఖలుకు అనుమతి ఇవ్వాలని లాయర్లు కోరారు. ఈ అభ్యర్థనకు హైకోర్టు నిరాకరించింది.. అత్యవసరంగా విచారణ జరపాలని చంద్రబాబు తరఫు చేసిన విజ్ఞప్తిని హైకోర్టు తోసిపుచ్చింది. తనకు వైద్య పరీక్షలు నిర్వహించాల్సిన అవసరం ఉందని ప్రభుత్వ వైద్యులు సైతం నివేదికలు ఇచ్చారని పిటిషన్లో పేర్కొన్నారు.

ఈ ఏడాది జూన్‌లో ఎడమ కంటి శుక్లం శస్త్రచికిత్స చేయించుకున్నానని తెలిపారు. సెప్టెంబరులోపు కుడి కంటికి సైతం చికిత్స చేయించుకోవాలని వైద్యులు సూచించారన్నారు. ప్రస్తుతం కుడి కంటి చూపు మందగించిన కారణంగా అత్యవసరంగా శస్త్ర చికిత్స అవసరమని వివరించారు. జాప్యం చేస్తే చూపు పూర్తిగా మందగించే ప్రమాదం ఉందని.. దీనిపై కంటి వైద్య నిపుణులు ఈనెల 21న ఇచ్చిన నివేదికను కోర్టుకు సమర్పించారు. అయినా కోర్టు విచారణకు స్వీకరించలేదు. మరి చంద్రబాబు పిటిషన్లపై కోర్టు ఎలాంటి నిర్ణయం తీసుకుంటుంది అన్నది చూడాలి. మరోవైపు చంద్రబాబు క్వాష్ పిటిషన్‌పై సుప్రీం కోర్టులో ఈ నెల 30 తర్వాత తీర్పు వెలువడే అవకాశం ఉంది. అలాగే ఫైబర్ నెట్ కేసులో ముందస్తు బెయిల్ పిటిషన్‌పై ఈ నెల 9న విచారణ జరగనున్న సంగతి తెలిసిందే.