జగన్ మళ్లీ సీఎం అవుతాడు.. చంద్రబాబు చస్తాడు.. ఇది గ్యారెంటీ: గోరంట్ల మాధవ్

2024లో జగన్ మళ్లీ ముఖ్యమంత్రి అవుతారు.. చంద్రబాబు నాయుడు గారు చస్తారు అంటూ.. వైఎస్సార్సీపీ ఎంపీ గోరంట్ల మాధవ్ తీవ్ర వ్యాఖ్యలు చేశారు. ఈ రాష్ట్రంలో పంచాయతీల నుంచి ఉపముఖ్యమంత్రి పదవి వరకు.. అన్ని విభాగాల్లో బీసీ, ఎస్సీ, ఎస్టీలను అగ్రభాగంలో నిలబెట్టిన ఘనత జగన్ మోహన్ రెడ్డికి దక్కుతుందన్న ఆయన.. వారంతా కచ్చితంగా జగన్ పక్షాన ఉంటారన్నారు. రాష్ట్రంలో 175కి 175 సీట్లు వైఎస్సార్సీపీ గెలవబోతోందని గోరంట్ల మాధవ్ జోస్యం చెప్పారు. అనంతపురం జిల్లా శింగనమల నియోజకవర్గంలోని బుక్కరాయసముద్రంలో నిర్వహించిన సామాజిక సాధికార యాత్రలో ఎంపీ ఈ వ్యాఖ్యలు చేశారు.

బస్సు యాత్ర సందర్భంగా ప్రతిపక్ష నేతలపై గోరంట్ల మాధవ్ తీవ్ర స్థాయిలో విమర్శలు గుప్పించారు. చంద్రబాబు నాయుడు బస్సు యాత్ర చేసి ఇప్పుడు జైలు యాత్ర చేస్తున్నారని.. జనసేన అధినేత పవన్ కళ్యాణ్ వారాహి యాత్ర చేసి.. ఇప్పుడు పారిపోయే యాత్రకు శ్రీకారం చుట్టారని ఆయన ఎద్దేవా చేశారు. నారా లోకేశ్ యువగళం పేరిట చేపట్టిన పాదయాత్రకు బ్రేకులు పడిన విషయమై ఎంపీ స్పందిస్తూ.. ఇప్పుడు ఆయన ఢిల్లీ చుట్టూ తిరిగే యాత్ర చేస్తున్నారన్నారు. ఎవరు ఎన్ని యాత్రలు చేసినా.. జగన్ జైత్రయాత్రను ఆపలేరన్నారు.

గోరంట్ల మాధవ్ చేసిన వ్యాఖ్యల పట్ల టీడీపీ నేతలు భగ్గుమంటున్నారు. చంద్రబాబు నాయుడిపై వైఎస్సార్పీ కుట్రకు సాక్ష్యమిదే అని ఆరోపిస్తున్నారు. ఇంతకు ముందే గోరంట్ల మాధవ్‌ను బట్టల్లేకుండా చూశారన్న ధూళిపాళ్ల నరేంద్ర.. ప్రజలు త్వరలోనే ఆయన్ను బట్టలూడదీసి తరిమే రోజులు వస్తాయని హెచ్చరించారు. చంద్రబాబును అక్రమంగా అరెస్ట్ చేశారనే అభిప్రాయానికి వచ్చారన్నారు. ప్రభుత్వానికి వ్యతిరేకంగా ప్రజలు ఉన్నారని అధికారంలో ఉన్న నాయకులకు అర్థమై విచక్షణ కోల్పోయి ఇష్టారాజ్యంగా వ్యాఖ్యలు చేస్తు్న్నారన్నారు. ప్రజలు వైఎస్సార్సీపీ నాయకులను భరించే స్థితిలో లేరన్నారు. అహంకారపూరితంగా వ్యవహరిస్తోన్న వారందర్నీ ఆంధ్రప్రదేశ్ ప్రజలు తరిమికొట్టే రోజులు దగ్గర్లోనే ఉన్నాయన్నారు.