బైక్ పక్కకు తీయమని హారన్ కొట్టిన డ్రైవర్,,,బస్సును అడ్డగించి దాడి
Andhra Pradesh Telugu | Suryaa Desk | Published : Fri, Oct 27, 2023, 08:38 PM
నెల్లూరు జిల్లా కావలిలో ఆర్టీసీ బస్సు డ్రైవర్‌పై దాడి జరిగింది. విజయవాడ డిపోనకు చెందిన ఆర్టీసీ బస్సు కావలి నుంచి విజయవాడకు వెళుతోంది. కావలిలోని ట్రంకు రోడ్డులో ఆర్టీసీ బస్సు డ్రైవర్ రాంసింగ్‌ తన ముందున్న బైక్ అడ్డు తీయాలంటూ హారన్ మోగించాడు. దీంతో ఆ ద్విచక్రవాహనదారుడు బస్సు డ్రైవర్‌తో వాదనకు దిగాడు. అనంతరం అక్కడే ఉన్న పోలీసులు వారికి సర్దిచెప్పి పంపించారు. అంతటి అందరూ ఈ వివాదం సమసిపోయిందని భావించారు.
అయితే ఈ విషయాన్ని ఆ వాహనదారుడు తన మిత్రులకు చెప్పడంతో 14 మంది ఆర్టీసీ బస్సును వెంబడించారు. పట్టణ శివార్లలోని మద్దూరుపాడు వ్యవసాయ మార్కెట్‌ కమిటీ గోదాముల దగ్గర బస్సును అడ్డుకున్నారు. డ్రైవర్‌ను దుర్భాషలాడుతూ దాడి చేసి తీవ్రంగా గాయపరిచారు. ఈ సీన్ మొత్తాన్ని బస్సులోని ఓ ప్రయాణీకుడు మొబైల్‌లో వీడియో తీస్తుండగా అతడిపైనా దాడికి పాల్పడ్డారు.. మొబైల్‌ను ధ్వంసం చేశారు. ఈ సమాచారం తెలియడంతో కావలి రూరల్ సీఐ సంఘటనా స్థలానికి చేరుకొని ఆరా తీశారు. డ్రైవర్‌ను కావలి ప్రాంతీయ ఆసుపత్రికి తరలించి చికిత్స చేస్తున్నారు. పోలీసులు ఈ ఘటనపై ఆరా తీస్తున్నారు.. బాధితుడి ఫిర్యాదుతో పోలీసులు కేసు నమోదు చేశారు.. నిందితుల కోసం గాలిస్తున్నారు.
|
|