పార్లమెంటు లాగిన్ వివరాలు బిజినెస్‌మెన్‌కు నేనే ఇచ్చా.. అంగీకరించిన మహువా మొయిత్రా

టీఎంసీ ఎంపీ మహువా మొయిత్రా కేసు రోజురోజుకూ రసవత్తరంగా మారుతోంది. ఇప్పటికే ఎథిక్స్ కమిటీ ముందు హాజరు కావాలని ఆమెకు సమన్లు అందించగా.. తాను తర్వాత వస్తానని మహువా మొయిత్రా తెలిపారు. ఈ క్రమంలోనే ఆమె తాజాగా ఈ ఘటనపై స్పందించారు. బిజినెస్‌మెన్ దర్శన్‌ హీరానందానికి పార్లమెంట్‌ లాగిన్‌ వివరాలు తానే ఇచ్చినట్లు మహువా మొయిత్రా అంగీకరించారు. ఈ క్రమంలోనే తన నిర్ణయాన్ని సమర్థించుకుంటూ తృణముల్ కాంగ్రెస్ వివరణ ఇచ్చారు.

లోక్‌సభలో తాను అడిగే ప్రశ్నలను టైప్‌ చేయడానికి పార్లమెంటు లాగిన్ ఐడీ, పాస్‌వర్డ్‌లను తన స్నేహితుడు, వ్యాపారవేత్త దర్శన్ హీరానందానికి ఇచ్చినట్లు మహువా మొయిత్రా.. నేషనల్ మీడియాకు ఇచ్చిన ఇంటర్వ్యూలో వెల్లడించారు. అయితే పార్లమెంట్‌లో ప్రశ్నలు అడిగేందుకు దర్శన్ హీరానందాని నుంచి డబ్బులు తీసుకున్నట్లు తనపై వస్తున్న ఆరోపణలను ఆమె ఖండించారు. తనపై ఆరోపణలు వస్తుండటంతో దర్శన్ హీరానందానిని ప్రశ్నించేందుకు తనకు అవకాశం ఇవ్వాలని మహువా మొయిత్రా డిమాండ్ చేశారు.

అయితే హీరానందానికి పార్లమెంటు లాగిన్ వివరాలు ఇవ్వడాన్ని ఆమె సమర్థించుకున్నారు. తాను ఒక మారుమూల నియోజకవర్గానికి ఎంపీగా ఉన్నందున వేరే వ్యక్తులకు ఆ వివరాలు ఇచ్చినట్లు తెలిపారు. ఇలా వివరాలు ఇచ్చినా.. ఎప్పటికప్పుడు తనకు ఓటీపీ వస్తుందని.. తన ప్రశ్నలు ఎప్పటికప్పుడు పోస్టు అవుతుంటాయని పేర్కొన్నారు. ప్రభుత్వం, పార్లమెంటరీ వెబ్‌సైట్లను నిర్వహించే ఎన్‌ఐసీకి.. ఇలా చేయడానికి వ్యతిరేకంగా ఎలాంటి నియమనిబంధనలు లేవని మహువా మొయిత్రా స్పష్టం చేశారు.

ఈ క్రమంలోనే హీరానందాని నుంచి గిఫ్ట్‌లు తీసుకున్నారని వస్తున్న ఆరోపణలకు కూడా ఆమె వివరణ ఇచ్చారు. ఆయన తన స్నేహితుడని.. తన బర్త్‌డే సందర్భంగా ఒక స్కార్ఫ్‌, లిప్‌స్టిక్‌, మేకప్‌ ఐటెమ్స్‌ ఇచ్చారని తెలిపారు. దుబాయ్‌లోని ఒక స్టోర్‌ నుంచి వాటిని కొనుగోలు చేసినట్లు చెప్పారు. వీటితోపాటు తన అధికారిక బంగ్లాలో ఇంటీరియర్స్‌ మార్చేందుకు హీరానందాని సలహా తీసుకునేందుకు తాను ఆయనను కలిసినట్లు వివరించారు. తన ఇంటికి కొత్త ఆర్కిటెక్చర్‌కు సంబంధించిన డ్రాయింగ్‌ను హీరానందాని ఇచ్చారని తెలిపారు. కేంద్ర ప్రభుత్వ పరిధిలోని సీపీడబ్ల్యూడీ ఇంటీరియర్‌ పనిని చేసిందని చెప్పారు. ఈ క్రమంలోనే హీరానందాని తనకు డబ్బు గానీ.. ఇతర గిఫ్ట్‌లు గానీ ఇచ్చినట్లు ఆధారాలు ఉంటే వెల్లడించాలని.. ఆరోపణలు కాదని గట్టిగా కౌంటర్ ఇచ్చారు.

ఇక ఇదే వ్యవహారంపై బీజేపీ ఎంపీ నిషికాంత్ దూబే చేసిన ఫిర్యాదుతో విచారణ చేపట్టిన పార్లమెంట్‌ ఎథిక్స్‌ కమిటీ.. అక్టోబర్ 31 వ తేదీన హాజరు కావాలని మహువా మొయిత్రాకు సమన్లు జారీ చేశారు. అయితే తనకు షెడ్యూల్ కార్యక్రమాలు ఉన్నందున తనకు కొంత సమయం కావాలని మహువా మొయిత్రా కోరగా.. ఎథిక్స్ కమిటీ హాజరు తేదీని నవంబర్‌ 2 వ తేదీకి మార్చింది. పార్లమెంటులో ప్రశ్నలు అడిగేందుకు బిజినెస్‌మెన్ దర్శన్ హీరానందాని నుంచి మహువా మొయిత్రా డబ్బులు, గిఫ్ట్‌లు తీసుకున్నారన్నవి ఆమెపై ఉన్న ప్రధాన ఆరోపణలు. ఆమె పార్లమెంటులో అడిగిన 61 ప్రశ్నల్లో అదానీ గ్రూపును లక్ష్యంగా చేసుకుని 50 ప్రశ్నలు ఉన్నాయని.. నిషికాంత్‌ దూబే లోక్‌సభ స్పీకర్‌ ఓం బిర్లాకు లేఖ రాశారు. ఈ క్రమంలోనే హీరానందాని కూడా మహువా మొయిత్రాకు వ్యతిరేకంగా ప్రకటన విడుదల చేయడంతో ఆమె చిక్కుల్లో పడ్డారు.