విదేశాలకు ఈ వస్తువులు తీసుకెళ్తున్నారా.. ఇక నుంచి విమానాల్లో అది కుదరదు

విదేశాలకు వెళ్లేవారికి కస్టమ్స్ అధికారులు పెద్ద షాక్ ఇచ్చారు. ఇక నుంచి విమానాల్లో తీసుకువెళ్లే వస్తువులు, పదార్థాల విషయంలో కీలక ఆదేశాలు జారీ చేశారు. విదేశాలకు వెళ్లేవారు గతంలో కిలోల కొద్ది స్వీట్లు తీసుకెళ్లేవారు. అయితే ఇక నుంచి అలా కుదరదని కస్టమ్స్ అధికారులు తేల్చి చెప్పారు. ఈ నేపథ్యంలోనే లగేజీలో స్వీట్స్ ఉంటే ఎయిర్‌పోర్టులోని చెకింగ్ వద్దే తనిఖీలు చేసి వాటిని తీసివేయనున్నారు. ఇలాంటి సంఘటనే తాజాగా తమిళనాడులోని చెన్నై ఇంటర్నేషనల్ ఎయిర్‌పోర్టులో జరిగింది.

ఇంటర్నేషనల్ ఫ్లైట్‌లలో ప్రయాణించే వారు తమ లగేజీలో స్వీట్లు తీసుకెళ్లేందుకు చెన్నై ఎయిర్‌పోర్టు కస్టమ్స్‌ అధికారులు అనుమతించడం లేదు. దీంతో కిలోల కొద్ది స్వీట్లు తీసుకువచ్చిన వారు తీవ్ర ఇబ్బందులు పడుతున్నారు. ఇటీవల నలుగురు ప్రయాణికులు బ్యాంకాక్ వెళ్లేందుకు చెన్నై విమానాశ్రయానికి చేరుకున్నారు. ఈ క్రమంలోనే కస్టమ్స్ అధికారులు నిర్వహించిన చెకింగ్‌లో ప్రయాణికులు తమ లగేజీలో స్వీట్ బాక్సులను తీసుకెళ్తున్నట్లు గుర్తించారు. ఈ క్రమంలోనే విమానంలోకి స్వీట్లను అనుమతించడం లేదని కస్టమ్స్ అధికారులు చెప్పినట్లు తెలుస్తోంది.

అయితే పండుగల సీజన్‌ కావడంతో చెన్నై నుంచి విదేశాలకు స్వీట్లు తీసుకెళ్తున్నామని కస్టమ్స్ అధికారులకు ప్రయాణికులు చెప్పేందుకు ప్రయత్నించగా వారు వినలేదు. పైగా వారి విమాన టిక్కెట్లను కూడా రద్దు చేయడం తీవ్ర సంచలనంగా మారింది. దీంతోపాటు చెన్నై నుంచి శ్రీలంకకు వెళ్లే ప్రయాణికులు నైట్ డ్రెస్‌లు, కాటన్ చీరలను కూడా తమ వెంట తీసుకెళ్లేందుకు ఎయిర్‌పోర్ట్ కస్టమ్స్ అధికారులు అనుమతించడం లేదని ప్రయాణికులు వాపోతున్నారు. సాధారణంగా శ్రీలంకలో ఉన్న తమ వారి కోసం పండుగల సీజన్‌లో చెన్నై నుంచి చీరలు, బట్టలను భారీగా తీసుకువెళ్తారు. తాజాగా చెన్నై కస్టమ్స్ అధికారులు తీసుకువచ్చిన నిర్ణయాలతో శ్రీలంక వెళ్లే ప్రయాణికులు.. బెంగళూరు, కొచ్చి, తిరువనంతపురంలకు వెళ్లి అక్కడి నుంచి వెళ్తున్నారు.

అయితే దేశంలోని అన్ని విమానాశ్రయాలకు కస్టమ్స్ నిబంధనలు ఒకేలా ఉంటాయని కానీ.. చెన్నైలో మాత్రం అధికారులు ఇష్టానుసారంగా నిబంధనలు మార్చుకుంటున్నారని విదేశాలకు వెళ్లే ప్రయాణికులు తీవ్ర ఆరోపణలు చేస్తున్నారు. ఈ ఘటనలపై స్పందించిన చెన్నై ఎయిర్‌పోర్టు కస్టమ్స్‌ అధికారులు.. తాము ప్రభుత్వ నిబంధనలను మాత్రమే పాటిస్తున్నామని.. దేశంలోని ఇతర విమానాశ్రయాల నిబంధనల గురించి తమకు తెలియదని చెప్పడం గమనార్హం.