విశాఖ సీపీని కలిసిన కేఏ పాల్,,,మార్ఫింగ్ ఫోటోపై ఫిర్యాదు

ప్రజాశాంతి పార్టీ అధ్యక్షుడు కేఏ పాల్ విశాఖ పోలీస్ కమిషనర్‌ రవిశంకర్ అయ్యన్నార్‌ను కలిశారు. సోషల్ మీడియాలో తన ఫోటోలను మార్ఫింగ్ చేయడంపై ఫిర్యాదు చేశారు. ఫోటోలు మార్పింగ్ చేసి సోషల్ మీడియాలో పోస్టు చేస్తున్న వారిపై చర్యలు తీసుకోవాలని కోరారు. ఈ నెల 23న రాజమహేంద్రవరంలో జరిగిన టీడీపీ జనసేన పార్టీల సమన్వయ కమిటీ సమావేశంలో నారా లోకేష్ -పవన్ కళ్యాణ్ భేటీ ఫోటోలు మార్ఫింగ్ చేశారని తెలిపారు. ఇద్దరు నేతల మధ్య చర్చలు తన (కేఏ పాల్) ఆధ్వర్యంలో జరిగినట్లు ఫోటో సృష్టించి సోషల్ మీడియాలో తనను కించపరిచారన్నారు. దీనికి సంబంధించిన ఫోటోలను సీపీకి అందజేశారు.

తాను నారా లోకేష్, పవన్ కళ్యాణ్‌కు బ్లెస్సింగ్ ఇస్తున్నట్టు మార్ఫింగ్ చేసిన ఫోటోను సోషల్ మీడియాలో పెట్టిన వారిపై చర్యలు తీసుకోవాలని విశాఖ పోలీస్ కమిషనర్‌కి ఫిర్యాదు చేశానన్నారు. దీనిపై దర్యాప్తు చేసి ఈ ఫోటో మార్ఫింగ్ చేసిన వారిపై చర్యలు తీసుకుంటానని కమిషనర్ తెలియజేశారన్నారు. తాను ఏ రోజు టీడీపీ, జనసేన పార్టీలకు తన మద్దతు ఉంటుందని చెప్పలేదన్నారు. టీడీపీ, జనసేన పార్టీలు చేస్తున్న కుట్రపై విశాఖ పోలీస్ కమిషనర్ కి తెలియజేశాను అన్నారు.

విశాఖ ఎంపీగా పోటీ చేస్తున్నందుకు తనపై కుట్రలు చేస్తున్నట్లు తనకు ఇవాళ తెలిసిందన్నారు. 2024 ఎన్నికల్లో రెండు రాష్ట్రాల్లో ప్రజాశాంతి పార్టీ గెలుస్తుందని.. తాను విశాఖ ఎంపీగా పోటీ చేస్తున్నందుకు ప్రస్తుతం విశాఖ ఎంపీ ఎంవీవీ సత్యనారాయణ, టీడీపీ నుంచి భరత్, సీబీఐ మాజీ జేడీ లక్ష్మీనారాయణ 2024 ఎన్నికల్లో ఎంపీగా పోటీ చేయకుండా కేఏ పాలే పోటీ చేస్తే బాగుంటుందని.. స్వయంగా వాళ్లే తనతో చెప్పారన్నారు.