వైసీపీలో చేరతారంటూ జరిగే ప్రచారంపై సీబీఐ మాజీ జేడీ లక్ష్మీనారాయణ క్లారిటీ,,,,టైం వేస్ట్ చేసుకోవద్దంటూ హితవు

సీబీఐ మాజీ జేడీ లక్ష్మీనారాయణ వచ్చే ఎన్నికల్లో వైఎస్సార్‌సీపీ నుంచి పోటీ చేయబోతున్నారా?.. సోషల్ మీడియాలో రెండు, మూడు రోజులుగా జరుగుతున్న చర్చ ఇది. శ్రీశైలంలో జగన్ సర్కార్ చేపట్టి కార్యక్రమాలపై ప్రశంసలు కురిపించడంతో.. ఆ పార్టీకి దగ్గరవుతున్నారని కొందరు సోషల్ మీడియాలో ప్రచారం చేశారు. అలాగే ఆయన చేసిన వ్యాఖ్యల్ని కొందరు ప్రస్తావిస్తూ వచ్చే ఎన్నికల్లో ఆ పార్టీ నుంచి పోటీ చేస్తున్నారనే ఊహాగానాలను మొదలు పెట్టారు. ఈ క్రమంలో సోషల్ మీడియా వేదికగా లక్ష్మీనారాయణ స్పందించారు. ఈ అంశంపై క్లారిటీ ఇచ్చారు.

'శ్రీశైలం ఎమ్మెల్యే శ్రీ శిల్పా చక్రపాణి గారిని మా పూర్వ విద్యార్థుల కార్యక్రమానికి ఆహ్వానించడానికి కలిశాను. అక్కడే వైద్య పరీక్షలకు సంబంధించిన ప్రభుత్వ కార్యక్రమానికి ఆయన నన్ను ఆహ్వానించారు. ఆ సమావేశంలో నేను వైద్య శిబిరాలు, నాడు-నేడు కార్యక్రమాలను అభినందించాను. అంతమాత్రాన నేను అధికార పార్టీలో చేరుతున్నానని, వచ్చే ఎన్నికల్లో వారి టిక్కెట్టుపై పోటీ చేస్తానంటూ తప్పుడు వార్తలు ప్రచారం చేయడం సరికాదు. ఈ ఊహాగానాలలో ఏ మాత్రం నిజం లేదు.. ప్రజలు తమ విలువైన సమయాన్ని వృధా చేసుకోవద్దని నేను అభ్యర్థిస్తున్నాను. ఓటర్ల చైతన్య కార్యక్రమం కొనసాగించే నా పోరుబాటకు కట్టుబడి ఉన్నాను' అంటూ ట్వీట్ చేశారు.

లక్ష్మీనారాయణ మూడు రోజుల క్రితం శ్రీశైలంలో పర్యటించారు. ఈ క్రమంలో స్థానిక ఎమ్మెల్యే శిల్పా చక్రపాణి రెడ్డి పాల్గొన్న సమావేశానికి మాజీ జేడీ కూడా హాజరయ్యారు. ఈ క్రమంలో వేదికపై నాడు–నేడు కింద ప్రభుత్వ పాఠశాలలు చాలా అందంగా ముస్తాబయ్యాయని ప్రశంసించారు. అంగన్వాడీలలో చిన్న పిల్లలకు పౌష్టికాహారం రాగిజావ చేర్చడంపై పొగడ్తలు కురిపించారు. అంతేకాదు జగనన్న ఆరోగ్య సురక్ష మంచి కార్యక్రమం అని కితాబిచ్చారు. ఇలా ప్రశంసలు కురిపించడంతో లక్ష్మీనారాయణపై ప్రచారం జరిగింది.

విజయనగరం రైలు ప్రమాదంపైనా లక్ష్మీనారాయణ ట్వీట్ చేశారు. 'విజయనగరం జిల్లా కొత్తవలస మండలం కంటకాపల్లి వద్ద జరిగిన విశాఖ – రాయగడ ప్యాసింజర్ రైలు ప్రమాదం నన్ను కలచివేసింది. ప్రమాదంలో మృతుల కుటుంబాలకు నా ప్రగాఢ సంతాపం. క్షతగాత్రులకు మెరుగైన వైద్యం సహాయం అందించాలి. సహాయ కార్యక్రమాల్లో పాల్గోవాలని జేడీ ఫౌండేషన్ సభ్యులకు విజ్ఞప్తి చేస్తున్నాను' అన్నారు.

సీబీఐ జేడీగా పనిచేసిన వీవీ లక్ష్మీనారాయణ.. ఆ తర్వాత వాలంటరీ రిటైర్మెంట్ తీసుకున్నారు. జనసేన పార్టీలో చేరి రాజకీయాల్లోకి ఎంట్రీ ఇచ్చారు.. 2019 ఎన్నికల్లో విశాఖ నుంచి ఎంపీగా పోటీచేసి ఓడిపోయారు. ఆ తర్వాత పరిణామాలతో జనసేనకు రాజీనామా చేశారు. అయితే లక్ష్మీనారాయణ వచ్చే ఎన్నికల్లో కచ్చితంగా పోటీ చేస్తానని చెబుతున్నారు.