చంద్రబాబుకు మధ్యంతర బెయిల్,,,,,సంతోషంగా ఉందన్న పవన్ కళ్యాణ్

తెలుగుదేశం పార్టీ జాతీయ అధ్యక్షులు చంద్రబాబుకు ఆంధ్రప్రదేశ్ హైకోర్టు ద్వారా మధ్యంతర బెయిల్‌ లభించడం సంతోషకరం అన్నారు జనసేన పార్టీ అధినేత పవన్ కళ్యాణ్. ఆయన సంపూర్ణ ఆరోగ్యంతో.. ఇనుమడించిన ఉత్సాహంతో ప్రజా సేవకు పునరంకితం కావాలని ఆకాంక్షిస్తున్నాను అన్నారు. ఆయన అనుభవం ఈ రాష్ట్రానికి ఎంతో అవసరమని.. చంద్రబాబు విడుదల కోసం కోట్లాది మంది ఎదురు చూస్తున్నారని.. అందరం ఆయన్ని స్వాగతిద్దామన్నారు. పవన్ కళ్యాణ్ ప్రస్తుతం విదేశాల్లో ఉన్నారు.. నాగబాబు కుమారుడు వరుణ్ తేజ్ వివాహ వేడుకకు హాజరయ్యేందుకు వెళ్లారు. మరోవైపు చంద్రబాబుకు మధ్యంతర బెయిల్‌‌ను స్వాగతిస్తున్నామన్నారు ఏపీ బీజేపీ అధ్యక్షురాలు పురందేశ్వరి. ఆయనను అరెస్టు చేసిన విధానాన్ని తాము తప్పు పట్టామని.. నోటీసులివ్వకుండా.. విచారణ జరపకుండా అరెస్టు చేసిన విధానాన్ని తాము గతంలోనే వ్యతిరేకించామన్నారు. ఎఫ్‌ఐఆర్‌లో పేరు లేకుండానే అరెస్ట్ చేసిన విధానం కూడా కరెక్ట్ కాదన్నారు.

ఆంధ్రప్రదేశ్‌లో ఇసుక దోపిడీపై పురందేశ్వరి ఆగ్రహం వ్యక్తం చేశారు. రాష్ట్రంలో కోట్లాది రూపాయల మేర ఇసుక దోపిడీ జరిగిందన్నారు. ప్రజా సమస్యలని ప్రస్తావించడం బీజేపీ ప్రధాన ఎజెండా.. ప్రభుత్వంలో అవినీతి జరుగుతోందనే విషయాన్ని ప్రజల్లోకి తీసుకెళ్లే ప్రయత్నం చేస్తున్నామన్నారు. తాను వివిధ అంశాలను ప్రస్తావిస్తోంటే.. తనపై విమర్శలు చేశారని మండిపడ్డారు. ఏపీలో ఇసుక దోపిడీ జరుగుతోందని.. గతంలో ట్రాక్టర్ ఇసుక రూ.వెయ్యికి లభించేదని.. కానీ ఇప్పుడు రూ. 5 నుంచి 6 వేలుగా ఉందన్నారు. ఇసుక ధరలు పెరగడం వల్ల సామాన్యులు ఇబ్బందులు పడుతున్నారన్నారు.

ఇసుక ధర పెరగడంతో నిర్మాణ రంగం కుదేలైందన్నారు. దీంతో సుమారు 35 లక్షల మంది ఉన్న భవన నిర్మాణ కార్మికులు ఇబ్బందులు పడుతున్నారన్నారు. ఈ వైఎస్సార్‌సీపీ అధికారంలోకి వచ్చాక ఇసుక పాలసీని మార్చి.. ఒకే కాంట్రాక్టరుకు ఇచ్చారన్నారు. ఎవ్వర్నీ పోటీకి రానివ్వకుండా జేపీ వెంచర్సుకు కట్టబెట్టారని ఆగ్రహం వ్యక్తం చేశారు. సబ్ లీజ్ ఇవ్వకూడదనే నిబంధన ఉందని.. కానీ దాన్ని ఉల్లంఘించారని మండిపడ్డారు.

నిర్మాణ రంగాన్ని నమ్ముకున్న వారిపై ఇసుక ప్రభావం పడిందని.. పనులు లేక భవన నిర్మాణ కార్మికులు రోడ్డున పడే పరిస్థితి ఉందన్నారు.ఇసుక ధర పెరగడం వల్ల సామాన్యులపై భారం పడిందని.. రాష్ట్రాభివృద్ధి.. నిర్మాణ రంగంతో ముడిపడి ఉందన్నారు. అలాగే రాష్ట్రంలో నాణ్యత లేని మద్యం ప్రజలకు విక్రయిస్తున్నారని.. జేబులు నింపుకోవడమే ప్రధానమని ఈ ప్రభుత్వం భావిస్తోందన్నారు. అన్ని విషయాలపై ప్రజలకు సమాధానం చెప్పాల్సి ఉంటుందన్నారు పురందేశ్వరి.