చంద్రబాబును కలిసిన డాక్టర్లు.. ఏఐజీ ఆస్పత్రిలో పరీక్షలకు ఏర్పాట్లు

జైలు నుంచి విడుదలైన చంద్రబాబు నాయుడు నేడు (నవంబర్ 1) హైదరాబాద్ చేరుకున్నారు. బేగంపేట ఎయిర్‌పోర్టులో ఆయనకు ఘన స్వాగతం లభించింది. అభిమానులు, కార్యకర్తలు వెంట రాగా.. విమానాశ్రయం నుంచి జూబ్లీహిల్స్‌లోని తన నివాసానికి చేరుకున్నారు. నివాసానికి చేరుకున్న చంద్రబాబు నాయుడిని ఏఐజీ వైద్యుల బృందం కలిసింది. చంద్రబాబు ఆరోగ్య పరిస్థితి, ఆరోగ్య పరమైన ఇబ్బందుల గురించి అడిగి తెలుసుకున్నారు. వైద్యుల సూచన మేరకు గురువారం ఉదయం 10 గంటలకు గచ్చిబౌలిలోని ఏఐజీ ఆసుపత్రికి చంద్రబాబు వెళ్లనున్నారు. వైద్యులు ఆయనకు అవసరమైన పరీక్షలు నిర్వహించి, చికిత్స అందించనున్నారు.

బేగంపేట ఎయిర్‌పోర్టు నుంచి జూబ్లీహిల్స్‌లోని తన నివాసానికి చంద్రబాబు చేరుకునే సరికే ఏఐజీ ఆస్పత్రి డాక్లర్లు ఇంటి వద్దకు చేరుకున్నారు. చంద్రబాబుతో వైద్యులు సుదీర్ఘంగా మాట్లాడారు. అవసరమైన పరీక్షలు చేసి కావాల్సిన వైద్యం అందిస్తామని చెప్పారు. స్కిల్ డెవలప్‌మెంట్ కేసులో అరెస్టై 52 రోజులుగా రాజమహేంద్రవరం జైలులో ఉన్న చంద్రబాబు నాయుడు మంగళవారం సాయంత్రం విడుదలైన సంగతి తెలిసిందే. అభిమానులు, పార్టీ శ్రేణులు వెంట రాగా.. రాజమహేంద్రవరం నుంచి బయల్దేరిన ఆయన ఉండవల్లిలోని నివాసానికి చేరుకునే సరికి బుధవారం ఉదయం 5.30 గంటలైంది. మధ్యాహ్నం వరకూ విశ్రాంతి తీసుకున్న ఆయన.. సాయంత్రం గన్నవరం విమానాశ్రయం నుంచి ప్రత్యేక విమానంలో హైదరాబాద్‌ చేరుకున్నారు.

చంద్రబాబు కాన్వాయ్ వెంట వేలాది కార్లు, బైక్‌లు..

హైదరాబాద్‌లో టీడీపీ అధినేతకు ఘన స్వాగతం లభించింది. చంద్రబాబుకు స్వాగతం పలికేందుకు బేగంపేట విమానాశ్రయం వద్దకు టీడీపీ శ్రేణులు, అభిమానులు పెద్ద సంఖ్యలో తరలివచ్చారు. ‘జై.. చంద్రబాబు’ నినాదాలతో హోరెత్తించారు. కోర్టు షరతులు ఉండటంతో ఆయన మీడియాతో మాట్లాడకుండా, కారులో నుంచే అభిమానులకు అభివాదం చేస్తూ ముందుకు సాగారు. వేలాది మంది అభిమానులు కార్లు, బైక్‌లపై చంద్రబాబు కాన్వాయ్‌ను అనుసరించారు.