కొడుకు కోసం.. భర్త చేతిలో మరణానికి సమ్మతించిన మహిళ

భర్త చేతిలో హత్యకు గురైన ఓ మహిళ కుమారుడికి రూ.15 లక్షల పరిహారాన్ని బీమా కంపెనీ నిరాకరించడాన్ని వినియోగదారుల న్యాయస్థానం సమర్ధించింది. ఇది హత్య కాదని, ఉద్దేశపూర్వక ఆత్మహత్య అని తేల్చిచెప్పింది. గుజరాత్‌లోని వల్సాద్‌కు చెందిన అరుణా దేశాయ్ అనే మహిళ 2008లో భర్త చేతిలో హత్యకు గురైంది. భార్యను హత్యచేసిన అనంతరం భర్త రంజిత్ దేశాయ్‌ కూడా ఆత్మహత్య చేసుకున్నాడు. అయితే, భర్త తనను హత్యాయత్నం చేసినా ఆమె ప్రతిఘటించలేదని విచారణలో తేలింది. ప్రమాద బీమా పొందే కుట్రలో భాగంగానే అతడికి సహకరించినట్టు వినియోగదారుల కమిషన్ నిర్ధారించింది.

‘హత్యను ఆమె ప్రతిఘటించకపోవడం.. ప్రమాదవశాత్తు మరణం కాదని ఆత్మహత్య లేదా స్వీయ-ప్రేరేపిత మరణం’ అని రుజువు చేస్తుందని పేర్కొంది. కేసు వివరాల్లోకి వెళ్తే.. అరుణా దేశాయ్ డిసెంబరు 2007లో బ్యాంకు నుంచి రూ.15 లక్షల వ్యక్తిగత రుణం తీసుకున్నారు. ఇదే సమయంలో డిసెంబరు 21, 2007 నుంచి 2008 డిసెంబరు 20 వరకూ చెల్లుబాటయ్యేలా ఏడాది కాలపరిమితితో రూ.15 లక్షల వ్యక్తిగత ప్రమాద బీమా పాలసీ కూడా చేశారు.

ఈ క్రమంలో 2008 డిసెంబరు 12న అరుణ, ఆమె భర్త రంజిత్‌లు ధరంపూర్‌లోని భవ్ భవనేశ్వర్ ఆలయానికి వెళ్లారు. ఆలయ గెస్ట్‌ హౌస్‌లో గదిని అద్దెకు తీసుకున్నారు. కేన్సర్ బాధితుడైన రంజిత్ ఆ గదిలో ఫ్యాన్‌కు ఉరేసుకుని ఆత్మహత్యకు పాల్పడ్డాడు. దీనికి ముందు భార్య అరుణను ఉరేసి చంపాడు. భార్యను హత్య చేసి తాను ఆత్మహత్యకు పాల్పడినట్టు సూసైడ్ నోట్ రాసిపెట్టాడు. అంతేకాదు, తన బంధువుకు ఫోన్ చేసి అరుణను చంపినట్టు చెప్పిన అతడు.. తానూ ఆత్మహత్య చేసుకుంటున్నట్టు తెలిపాడు. ఈ ఘటనపై కేసు నమోదుచేసిన పోలీసులు దర్యాప్తు చేపట్టారు. వారి కుమారుడు జిమిత్ దేశాయ్.. బీమా కంపెనీకి సమాచారం ఇచ్చి.. రూ.15 పరిహారం కోరుతూ డిసెంబరు 15న దరఖాస్తు చేశాడు. అయితే, దాదాపు ఆరు నెలల తర్వాత 2009 మే 20న సదరు కంపెనీ క్లైయిమ్‌ను తోసిపుచ్చింది. అరుణా దేశాయ్‌ను ఉద్దేశపూర్వకంగానే రంజిత్ చంపాడని, దీన్ని ప్రమాదంగా పరిగణించలేమని తెలిపింది.

దీంతో జిమిత్ 2010లో బీమా సంస్థకు వ్యతిరేకంగా సూరత్ వినియోగదారుల కోర్టును ఆశ్రయించగా.. అక్కడ అనుకూలంగా తీర్పు వచ్చింది. ఈ ఉత్తర్వులను సవాల్ చేస్తూ బీమా సంస్థ అప్పీల్ చేయడంతో కోర్టు విచారణకు స్వీకరించి వల్సాద్ వినియోగదారుల కోర్టుకు బదిలీ చేసింది. బీమా చేయించుకున్న అరుణ దేశాయ్‌కు ఆ రోజు తాను హత్యకు గురవుతానని తెలియదని ఫిర్యాదుదారు కోర్టులో వాదించారు. భర్త రంజిత్ దేశాయ్ రాసిన సూసైడ్ నోట్ ద్వారా ఇది రుజువైంది. ప్రమాదవశాత్తూ జరిగిందని స్పష్టమైంది. కాబట్టి క్లెయిమ్ మంజూరు చేయాలని కోరారు. అయితే, ఈ ఘటన కుటుంబ సభ్యుల ముందే ప్లాన్ చేసిందని బీమా సంస్థ వాదించింది. ‘తీసుకున్న రుణం తమ కొడుకు చెల్లించాల్సిన అవసరం లేకుండా పాలసీదారుని చంపాలని ప్లాన్ చేశారు.. అరుణా దేశాయ్ శరీరంపై ఎలాంటి గాయం గుర్తులు లేకపోవడం, ఆా సమయంలో ఆమె రంజిత్ దేశాయ్‌ను ప్రతిఘటించలేదని రుజువు చేసింది. దీంతో హత్యకు ఆమె సమ్మతించినట్లు రుజువైంది’ అని వివరించింది. ఈ వాదనలతో ఏకీభవించిన వినియోగదారుల కోర్టు బీమా కంపెనీ పరిహారాన్ని తోసిపుచ్చడాన్ని సమర్దించింది.