ఇజ్రాయెల్‌కు గూఢచర్యం చేశారనడం అవాస్తవం: భారత మాజీ నేవీ అధికారుల కుటుంబ సభ్యులు

ఖతార్‌ న్యాయస్థానం 8 మంది భారత మాజీ నేవీ అధికారులకు మరణ శిక్ష విధించిన సంగతి తెలిసిందే. ఖతార్ కోర్టు తీర్పు పట్ల తీవ్ర దిగ్భ్రాంతిని వ్యక్తం చేసిన భారత ప్రభుత్వం.. బాధిత కుటుంబాలకు అండగా ఉంటామని ప్రకటించింది.ఈ కేసుకు తమ ప్రభుత్వం అత్యధిక ప్రాధాన్యం ఇస్తోందని విదేశాంగ శాఖ మంత్రి జై శంకర్ తెలిపారు. 8 మంది మాజీ నేవీ అధికారుల కుటుంబ సభ్యులను కలిసిన సందర్భంగా ఆయన ఈ వ్యాఖ్యలు చేశారు.

అయితే ఖతార్‌ కోర్టు భారత మాజీ నేవీ అధికారులకు మరణ శిక్ష ఎందుకు విధించిందనే విషయమై ఇప్పటికీ క్లారిటీ రాలేదు. ఇప్పటికే వారు ఏడాదికిపైగా ఖతార్‌లో నిర్బంధంలో ఉన్నారు. దీంతో ఇండియాలోని వారి కుటుంబ సభ్యులు అప్పటి నుంచి తీవ్ర ఆవేదనతో ఉన్నారు. ఇప్పటికి పలుమార్లు బెయిల్ కోసం పిటిషన్లు దాఖలు చేసినప్పటికీ ఫలితం లేకపోగా.. అక్టోబర్ 26న మరణ శిక్ష విధిస్తూ కోర్టు తీర్పు ఇవ్వడంతో వారంతా దీనంగా భారత ప్రభుత్వం జోక్యం కోసం ఎదురు చూస్తున్నారు. ఖతార్ ప్రభుత్వంతో సంప్రదింపులు జరిపి.. తమ వారిని వెంటనే స్వదేశానికి తీసుకురావాలని కేంద్రాన్ని కోరుతున్నారు.

తమ వారి గురించి మీడియాలో వస్తున్న కథనాల్లో నిజం లేదని నేవీ అధికారుల కుటుంబ సభ్యులు తెలిపారు. ఇజ్రాయెల్‌కు గూఢచర్య చేశారనే కారణంతో భారత మాజీ నేవీ అధికారులకు ఖతార్ కోర్టు మరణ శిక్ష విధించిందంటూ కొన్ని మీడియా సంస్థల్లో వచ్చిన కథనాలను వారు ఖండించారు. తమవారికి మరణ శిక్ష విధించడానికి గల కారణాలను ఖతార్ ప్రభుత్వం బహిర్గతం చేయాల్సి ఉందన్నారు. దయచేసి ఎలాంటి తప్పుడు ప్రచారం చేయొద్దని మాజీ నేవీ అధికారుల కుటుంబ సభ్యులు మీడియాను కోరుతున్నారు. సమస్య తీవ్రతను, సున్నితత్వాన్ని గుర్తించాలని, తమ వారికి హాని కలిగించే కథనాలు రాయొద్దని వారు మీడియాను కోరుతున్నారు.

8 మంది భారత మాజీ నేవీ అధికారులు ఖతార్‌ నేవీకి శిక్షణ ఇవ్వడం కోసం, ఆ దేశ నౌకాదళాన్ని బలోపేతం చేసేందుకు అక్కడికి వెళ్లారని వారి కుటుంబ సభ్యులు చెబుతున్నారు. ఖతార్ సబ్‌మెరైన్ ప్రోగ్రాంకు సంబంధించిన వివరాలను లీక్ చేశారని మీడియాలో వచ్చిన కథనాలను తప్పని, వాటిని తొలగించాలని కోరుతున్నారు. భారత నేవీలో సుదీర్ఘ కాలం పని చేసినవారు.. మరో దేశ నేవీకి శిక్షణ ఇవ్వడానికి వెళ్లినప్పుడు గూఢచర్యం చేసే అవకాశం లేదని.. అందులోనూ భారత్, ఖతార్ మధ్య రక్షణ సహకార ఒప్పందం కూడా ఉందని గుర్తు చేస్తున్నారు.

దహ్రా గ్లోబల్‌ సంస్థలో పని చేసిన ఈ 8 మంది అధికారులకు సబ్‌మెరైన్ ప్రోగ్రాంతో ఎలాంటి సంబంధం లేదని వారి కుటుంబ సభ్యులు చెబుతున్నారు. వారు క్షేత్రస్థాయి శిక్షణకే పరిమితం అయ్యారని చెబుతున్నారు. అంతే కాదు ఇటలీకి చెందిన ఫిన్‌కాంటియెరీ అనే షిప్ మాన్యుఫ్యాక్చరింగ్ కంపెనీ సబ్‌మెరైన్లను తయారు చేస్తోందని, దీనికి సంబంధించిన సమాచారాన్ని ఈ అధికారులు లీక్ చేశారంటూ కొన్ని కథనాలు వచ్చాయి.అయితే తాము ఖతార్‌కు సబ్‌మెరైన్లను తయారు చేస్తున్నట్లు వచ్చిన వార్తలను ఫిన్‌కాంటియెరీ గతంలోనే తోసిపుచ్చింది. దీనికి సంబంధించి ‘ది సండే గార్డియన్‌’లో కథనాలు కూడా వచ్చాయని నేవీ అధికారుల కుటుంబ సభ్యులు చెబుతున్నారు.