బంగాళాఖాతంలో ద్రోణి, ఆవర్తనం,,,,కోస్తా, రాయలసీమలో వర్షాలు

ఏపీలో వర్షాలు పడతాయని అలర్ట్ చేసింది వాతావరణశాఖ. తాజాగా గురువారం నైరుతి బంగాళాఖాతం దానికి ఆనుకుని ఉన్న పశ్చిమ మధ్య బంగాళాఖాతంపై అల్పపీడన ద్రోణి ఏర్పడింది. ఇది సముద్రమట్టానికి 1.5 కి.మీల ఎత్తులో విస్తరించి అనుబంధంగా ఉన్న ఉపరితల ఆవర్తనంతో కలిసి శ్రీలంక పరిసరాల్లో కొనసాగుతోంది. మరోవైపు ఆంధ్రప్రదేశ్‌పైకి ఈశాన్య, తూర్పు గాలులు వీస్తున్నాయి. ఈ ప్రభాంతో ఈనెల 6వ తేదీ వరకు రాష్ట్రంలో వర్షాలు కురుస్తాయని ఐఎండీ తెలిపింది. శుక్ర, శనివారాల్లో ఉత్తరకోస్తా, రాయలసీమల్లో కొన్నిచోట్ల, దక్షిణ కోస్తాలో అనేక చోట్ల తేలికపాటి నుంచి మోస్తరు వర్షాలు కురిసే అవకాశం ఉందని వివరించింది.

ఇవాళ పార్వతీపురం మన్యం, అల్లూరి సీతారామరాజు, కడప, అన్నమయ్య, చిత్తూరు, తిరుపతి జిల్లాల్లో తేలికపాటి వానలు పడతాయంటోంది ఏపీ విపత్తుల సంస్థ. అలాగే గురువారం రోజు.. ఏలూరులో 50.4 మిల్లీ మీటర్లు, నూజివీడులో 20.8, తిరుపతి జిల్లా తడలో 11.6, నర్సాపురంలో 9.4, నెల్లూరులో 8.1, యానాంలో 6.6 వర్షపాతం నమోదైందని ఐఎండీ తెలిపింది. ఏపీలో విభిన్నమైన వాతావరణం కనిపిస్తోంది. కొన్ని జిల్లాల్లో తేలికపాటి వానలు పడుతుండగా.. మిగిలిన చోట్ల ఎండలు మండిపోతున్నాయి. అలాగే ఉక్కపోతతో జనాలు అల్లాడిపోతున్నారు. అంతేకాదు రాత్రి సమయంలో చలి వాతావరణం కనిపిస్తోంది. పగటి సమయంలో మాత్రం ఎండల ప్రభావం కనిపిస్తోంది. ఈశాన్య రుతుపవనాల ప్రభావం కూడా పెద్దగా కనిపించడం లేదు. కొన్ని జిల్లాల్లో ఎండల ప్రభావం.. మరికొన్ని జిల్లాల్లో రెండు, మూడు రోజులుగా తేలికపాటి వర్షాలు కురుస్తున్నాయి.

మరోవైపు ఈశాన్య రుతుపవనాల సీజన్‌ ప్రారం­భమైంది.. దాదాపు పది రోజులవుతున్నా రాష్ట్రంలో వానలు ఆశించిన స్థాయిలో పడలేదు. నైరుతి రుతుపవనాల సీజన్‌‌లో వర్ష ప్రభావం పెద్దగా లేకుండా పోయింది. కొన్ని ప్రాంతాల్లో సంతృప్తికరంగా, మరికొన్ని ప్రాంతాల్లో తక్కువగా వర్షాలు కురిశాయి. ఈశాన్య రుతుపవనాల ప్రభావం ఎక్కువగా ఉండే అక్టోబర్‌లో కూడా వానలు అంతంతమాత్రమే. అక్టోబర్‌లో పరిస్థితి మరీ దారుణంగా ఉంది. ఈశాన్య రుతుపవనాలు ప్రవేశించే సమయంలోనే బంగాళాఖాతంలో ఏర్పడిన హమూన్‌ తుఫాన్ ప్రభావం చూపించింది. గాలిలో తేమతో ఆ తుఫాన్ బంగ్లాదేశ్‌ వైపు పయనించింది.. దీంతో ఈశాన్య రుతుపవనాలు బలహీనంగా మారాయని చెబుతున్నారు. అయితు రెండు రోజులుగా వర్షాలు కొంతమేర పడుతున్నాయి. ఈ నెలలోనైనా వర్షాలు పడతాయా.. మళ్లీ అదే పరిస్థితి ఉంటుందా అని జనాలు భయపడుతున్నారు. ముఖ్యంగా వర్షాలు లేక రైతులు అల్లాడిపోతున్నారు.. సాగు చేసిన పంటలు ఎండిపోతున్నాయని ఆవేదన వ్యక్తం చేస్తున్నారు.