కుమారుడికి భారతీయ శాస్త్రవేత్త చంద్రశేఖర్ పేరు పెట్టిన ఎలాన్ మస్క్

టెస్లా అధినేత, బిలియనీర్ ఎలాన్‌ మస్క్ తన కుమారుల్లో ఒకరికి భారత సంతతికి చెందిన అమెరికా శాస్త్రవేత్త పేరు పెట్టారట. ఆయన కొడుకు పేరులో ‘చంద్రశేఖర్‌’‌ను చేర్చారట. ఈ విషయాన్ని కేంద్ర ఐటీ శాఖ సహాయ మంత్రి రాజీవ్‌ చంద్రశేఖర్‌ స్వయంగా వెల్లడించారు.బ్రిటన్‌లో జరుగుతోన్న మొట్టమొదటి అంతర్జాతీయ కృత్రిమ మేధ భద్రతా సదస్సు‌కు భారత్ ప్రతినిధిగా కేంద్ర మంత్రి రాజీవ్‌ హాజరయ్యారు. ఈ సందర్భంగా ఎలాన్‌ మస్క్‌ను కలిసిన ఆయన.. టెస్లా చీఫ్‌తో దిగిన ఫోటోను ట్విట్టర్‌లో షేర్ చేశారు.

‘ఏఐ సదస్సులో భాగంగా నేను ఎవరిని కలిశానో చూడండి... కెనడాకు చెందిన శివోన్‌ అలీసా జిలిస్‌తో కలిగిన కవలల్లోని ఒక కుమారుడి మధ్య పేరు ‘చంద్రశేఖర్‌’గా పెట్టినట్లు ఎలాన్‌ మస్క్‌ నాతో చెప్పారు.. భౌతికశాస్త్రంలో నోబెల్‌ బహుమతి గెలుచుకున్న, భారత సంతతికి చెందిన శాస్త్రవేత్త ప్రొ.సుబ్రమణ్యం చంద్రశేఖర్‌‌ పేరుతో తన కొడుకు పేరు పెట్టినట్లు తెలిపారు’ అని కేంద్ర మంత్రి రాజీవ్ చెప్పారు. మంత్రి పేరులోనూ చంద్రశేఖర్‌ ఉండటం గమనార్హం.

ఇక, కెనడాకు చెందిన శివోన్ జిలిస్‌‌, మస్క్‌ మధ్య 2016లో పరిచయం ఏర్పడింది. ఆయన స్థాపించిన న్యూరాలింక్‌ కంపెనీలో జిలిస్ ఉద్యోగిగా చేరారు. ఈ పరిచయం రిలేషన్‌‌షిప్‌కి దారితీసింది. కొన్నేళ్లు సహజీవనంలో ఉన్న ఈ జంట 2021 నవంబరులో కవలలకు జన్మనిచ్చింది. ఈ పిల్లలకు స్ట్రైడర్‌, అజూర్‌ అనే పేర్లు పెట్టారు. కాగా, మస్క్‌‌ తన మాజీ భార్య జస్టిన్‌ విల్సన్‌తో ఐదుగురు పిల్లలకు, కెనడా గాయని గ్రిమ్స్‌తో ముగ్గురు పిల్లలకు జన్మనిచ్చారు. గత సెప్టెంబరులో గ్రిమ్స్‌, ఎలాన్‌ మస్క్‌ విడిపోయారు. కాగా, నక్షత్రాలపై చేసిన పరిశోధనలకుగానూ భారత సంతతికి చెందిన శాస్త్రవేత్త సుబ్రమణ్యం చంద్రశేఖర్‌‌.. విలియమ్ ఆల్ఫ్రెడ్ ఫౌలరేతో కలిసి భౌతిక శాస్త్రంలో 1983లో నోబెల్‌ పురస్కారం అందుకున్నారు.

అంతర్జాతీయ కృత్రిమ మేధ భద్రతా సదస్సు అనేది AI గురించి చర్చించడానికి విధాన రూపకర్తలు, పెట్టుబడిదారులు, ఆవిష్కర్తలను ఒకచోట చేర్చే సమావేశం. సమ్మిట్ ఏఐ స్థితి, పెట్టుబడులు, నిబంధనలు, విధనాలను విశ్లేషిస్తుంది. నవంబరు 1 ligmr రెండు రోజుల పాటు జరిగిన ఈ సమ్మిట్‌కు కేంద్ర మంత్రి రాజీవ్ చంద్రశేఖర్ భారత్ తరపున ప్రాతినిధ్యం వహించారు. సమ్మిట్‌లో చంద్రశేఖర్ మాట్లాడుతూ.. దేశ జీడీపీలో డిజిటల్ ఆర్థిక వ్యవస్థ 4.5 శాతంగా ఉందని, 2025-26 నాటికి దీనిని 20 శాతానికి చేర్చాలని లక్ష్యంగా పెట్టుకున్నామని తెలిపారు. ఆ లక్ష్యం ప్రస్తుతం 11 శాతానికి చేరుకుందని అన్నారు. ‘మేము ఎదుర్కొనే అస్తిత్వ ప్రమాదాలలో ఇది ఒకటి.. మన సమయ ప్రమాణం, పురోగతి రేటును పరిశీలిస్తే ఇది అత్యంత ముఖ్యమైనది.. శిఖరాగ్ర సమావేశం సమయానుకూలంగా ఉంది.. దీనిని నిర్వహించినందుకు బ్రిటన్ ప్రధానమంత్రి రిషి సునాక్‌ని అభినందిస్తున్నాను’ అని అన్నారు.