కారును ఢీకొట్టారని వెంబడించిన నిందితులు,,,,సూపర్ మార్కెట్‌లో దంపతులపై దాడి

ఓ సూపర్‌ మార్కెట్‌లో దంపతులపై దాడికి పాల్పడిన కొందరు దుండుగులు.. ఆపై నిందితులలో ఒకరి కాళ్లు పట్టుకోవాలని బలవంతం చేశారు. దారుణమైన ఈ ఘటన మధ్యప్రదేశ్‌లోని ఖండ్వాలో చోటుచేసుకుంది. దీనికి సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. దంపతులను సూపర్‌మార్కెట్‌ వరకు నిందితులు వెంబడించి దాడికి పాల్పడ్డారు. ఈ ఘటన మొత్తం అక్కడ సీసీటీవీలో రికార్డయ్యింది. సూపర్‌మార్కెట్ సిబ్బంది పరిస్థితిని అదుపు చేసేందుకు ప్రయత్నించగా.. ఓ వ్యక్తి దంపతులను కొడుతుండటం వీడియోలో కనిపిస్తోంది. దంపతులను సూపర్‌మార్కెట్ వరకూ వెంబడించిన నిందితుడు. భౌతిక దాడికి తెగబడ్డాడు. బాధిత మహిళను నగరంలోని ప్రముఖ ప్రొఫెసర్‌గా గుర్తించారు. వేధింపులకు పాల్పడిన నిందితులకు.. దంపతులు తిరిగి క్షమాపణలు చెప్పాల్సి రావడం గమనార్హం. తన భర్త ప్రాణాలను రక్షించుకోడానికి ఆ మహిళ నిందితుడి కాళ్లను కూడా తాకింది. బాధితురాలిని జుత్తు పట్టుకుని బలవంతంగా కాళ్లు పట్టుకునేలా చేశారు. ఈ ఘటన ఖండ్వాలోని మోఘత్ పోలీస్ స్టేషన్ పరిధిలోని లాల్ చౌక్ వద్ద చోటుచేసుకుంది.

కాగా, ఈ ఘటనపై తాము పోలీసులకు ఫిర్యాదు చేసినా.. మహిళా అధికారి లేదనే కారణంతో తీసుకోడానికి నిరాకరించారని దంపతులు ఆరోపించారు. ఒకవేళ, కేసు నమోదు చేయకుంటే.. మేము ప్రధాని నరేంద్ర మోదీని కలుస్తామని బాధితుడు అన్నారు. ఇదే సమయంలో వీడియో సామాజిక మాధ్యమాల్లో వైరల్ కావడంతో పోలీసులు కేసు నమోదుచేసి దర్యాప్తు చేపట్టారు. నిందితుల్లో ఒకర్ని గుర్తించామని, మిగతా వారిని గుర్తించే ప్రక్రియ కొనసాగుతోందన్నారు. ఘటన జరిగిన ప్రదేశంలో సీసీటీవీ రికార్డులను పరిశీలిస్తున్నట్టు చెప్పారు. బాధితుల కారు.. నిందితుల వాహనాన్ని ఢీకొట్టడంతో ఈ వివాదం మొదలైందని తెలిపారు. ప్రొఫెసర్ దంపతులను నోటికొచ్చినట్టు మాట్లాడి, భౌతిక దాడికి పాల్పడ్డారని పేర్కొన్నారు. కాగా, హరియాణాలోని సోనేపట్‌లోనూ ఇటువంటి ఘటనే చోటుచేసుకుంది. మద్యం మత్తులో ఉన్న కొందరు దంపతులపై దాడి చేశారు. మహిళను అడ్డుకునేందుకు ప్రయత్నించగా.. ఆమె భర్త ప్రతిఘటించడంతో అతడిపై మందుబాబులు దాడి చేసి తీవ్రంగా కొట్టారు. ఈ ఘటనపై పోలీసులు కేసు నమోదుచేసి దర్యాప్తు కొనసాగిస్తున్నారు.