మహాదేవ్ బెట్టింగ్ యాప్: ప్రధాని వ్యాఖ్యలకు.. సీఎం భూపేశ్ బఘేల్ కౌంటర్

ఛత్తీస్‌గఢ్ అసెంబ్లీ ఎన్నికల ప్రచారం ప్రస్తుతం ‘మహాదేవ్ బెట్టింగ్ యాప్’ చుట్టూ తిరుగుతోంది. ఛత్తీస్‌గఢ్‌లో శనివారం ఎన్నికల ప్రచారం నిర్వహించి ప్రధాని మోదీ.. కాంగ్రెస్‌పై విమర్శలు గుప్పించారు. ఎన్నికల ప్రచారానికి నిధుల కోసం కాంగ్రెస్ పార్టీ అక్రమ బెట్టింగ్ నిర్వాహకుల ద్వారా అందిన హవాలా డబ్బును ఉపయోగిస్తోందని ఆరోపించారు. మహాదేవ్ బెట్టింగ్ యాప్ ప్రమోటర్లు.. సీఎం భూపేష్ బఘేల్‌కు రూ.508 కోట్లు చెల్లించారని ఈడీ చేసిన వాదనలను మోదీ ప్రస్తావించారు. కాంగ్రెస్ ప్రభుత్వం మిమ్మల్ని (ప్రజల్ని ఉద్దేశిస్తూ) దోచుకునే ఎలాంటి అవకాశాన్నైనా వదిలిపెట్టడం లేదని ధ్వజమెత్తారు. ఛత్తీస్‌గఢ్ సర్కారు అవినీతిలో కూరుకుపోయిందని, తాము అధికారంలోకి వచ్చిన తర్వాత దీనిపై విచారణ జరిపించి, దోషులను శిక్షిస్తామని మోదీ అన్నారు.

ఇక, ప్రధాని నరేంద్ర మోదీ వ్యాఖ్యలకు ఛత్తీస్‌గఢ్ ముఖ్యమంత్రి భూపేశ్ బఘేల్ దిమ్మదిరిగే కౌంటర్ ఇచ్చారు. అసలు దుబాయ్ వ్యక్తులతో మీకున్న ఒప్పందాలు ఏంటి? ఇంతవరకూ ఎందుకు అరెస్టులు చేయలేదు? అసలు యాప్‌ని ఎందుకు బహిష్కరించలేదు? అని ప్రశ్నల వర్షం కురిపించారు. చైనా యాప్‌లను నిసేధించినప్పుడు.. మహాదేవ్ బెట్టింగ్ యాప్‌పై చర్యలు తీసుకోకపోవడానికి గల కారణాలేంటి? అని మోదీని నిలదీశారు. ‘‘నిజంగా అవినీతి జరిగి ఉంటే, ఆ యాప్‌ని ఎందుకు నిషేధించలేదు? ఆ యాప్‌ని శాశ్వతంగా నిషేధించే బాధ్యత కేంద్ర ప్రభుత్వానిదే. అసలు వాళ్లతో ప్రధాని మోదీకి ఉన్న సంబంధం ఏంటని నేను అడగాలని అనుకుంటున్నాను? లుకౌట్ నోటీసులు జారీచేసిన తర్వాత కూడా ఒక్కర్ని కూడా ఎందుకు అరెస్ట్ చేయలేదు.. ఒకవేళ ఎలాంటి ఒప్పందం లేకపోతే.. భారత ప్రభుత్వం ఆ యాప్‌ని బ్యాన్ చేసే దిశగా ఎందుకు ఎలాంటి చర్యలు చేపట్టలేదు’’ అని ఛత్తీస్‌గఢ్ సీఎం ఎదురుదాడి చేశారు.

అంతేకాదు.. బీజేపీ ప్రత్యక్ష పోరాటం చేయలేదని.. అందుకే ఈడీ, ఐటీ, మీడియా ద్వారా ఎన్నికల్లో పోరాడుతోందని విమర్శలు గుప్పించారు. ఎలాంటి విచారణ లేకుండానే మోదీ ఆరోపణలు చేస్తున్నారని మండిపడ్డారు. ఈడీ, ఐటీ ఇక్కడ తిరుగుతున్నాయని.. ఇది మీ (మోదీ) దిగజారుడు రాజకీయాలకు పరాకాష్ట అని బఘేల్ ధ్వజమెత్తారు. ఫోరెన్సిక్ విశ్లేషణ, ‘క్యాష్ కొరియర్’ ప్రకటన ఆధారంగా.. మహాదేవ్ బెట్టింగ్ యాప్ ప్రమోటర్లు ఛత్తీస్‌గఢ్ సీఎం భూపేశ్ బఘెల్‌కు ఇప్పటివరకూ సుమారు రూ. 508 కోట్లు చెల్లించారనే ఆరోపణలకు దారితీసిందని ఈడీ శుక్రవారం తెలిపింది. దీనిపై సమగ్ర విచారణ జరపాల్సిన అవసరం ఉందని వెల్లడించారు. ఈడీ ఈ అంశాన్ని ప్రస్తావించడమే తరువాయి. కాంగ్రెస్‌ని టార్గెట్‌ చేసుకొని మోదీ, కేంద్ర మంత్రి స్మృతి ఇరానీ ఆరోపణలు గుప్పించడం, ఆ వెంటనే భూపేశ్ కౌంటర్ ఇవ్వడం జరిగింది.