ఆంధ్రప్రదేశ్‌లో విద్యా సంస్థల బంద్‌కు విద్యార్థి సంఘాల పిలుపు

ఆంధ్రప్రదేశ్‌లో నవంబర్ 8 (బుధవారం) రోజున స్కూళ్లు, కాలేజీలకు విద్యార్థి సంఘాలు బంద్ ప్రకటించాయి. విశాఖ ఉక్కు పరిరక్షణ, కడప ఉక్కు ఫ్యాక్టరీ సాధనకు మద్దతు ప్రకటించిన ఏఐఎస్ఎఫ్, పీడీఎస్‌యూ, ఏఐవైఎఫ్ విద్యార్థి సంఘాలు.. ఈ బంద్‌కు పిలుపునిస్తున్నట్లు తెలిపాయి. విశాఖ ఉక్కు ఫ్యాక్టరీని ప్రైవేటు పరం చేస్తారన్న ఊహాగానాలతో గత కొన్ని నెలలుగా ఆందోళనలు కొనసాగుతున్నాయి. ఈ క్రమంలోనే విశాఖ ఉక్కు పరిశ్రమ పరిరక్షణ కోసం నిరసనలు ప్రారంభించి బుధవారానికి వెయ్యి రోజులు పూర్తవుతున్న సందర్భంగా ఈ బంద్ చేపడుతున్నట్లు విద్యార్థి సంఘాల నేతలు వెల్లడించారు. విద్యార్థులు, యువత పెద్ద ఎత్తున పాల్గొని ఈ బంద్‌ను విజయవంతం చేయాలని విద్యార్థి సంఘాలు కోరాయి.

ఇప్పటికే కడప జిల్లాలోని బేతంచెర్ల సీఐటీయూ కార్యాలయంలో ఎస్‌ఎఫ్‌ఐ, డీవైఎఫ్‌ఐ నాయకులు బంద్‌కు సంబంధించి పోస్టర్లను విడుదల చేశారు. ఈ సందర్భంగా మాట్లాడిన విద్యార్థి నాయకులు.. విశాఖ ఉక్కు ఫ్యాక్టరీ ప్రైవేటీకరణకు ప్రధాని నరేంద్ర మోదీ ప్రభుత్వం చర్యలు తీసుకోవడం దారుణమని మండిపడ్డారు. విశాఖ ఉక్కు పరిశ్రమ ప్రైవేటీకరణను నిరసిస్తూ జరుగుతున్న అలుపులేని పోరాటం ఈనెల 8 వ తేదీ నాటికి 1000 రోజులు పూర్తవుతుందని తెలిపారు. ఈ సందర్భంగా విశాఖ ఉక్కు ఫ్యాక్టరీ కోసం పోరాడుతున్న కార్మికులు, వారి కుటుంబాలకు మద్దతు తెలిపేందుకు విద్యార్థి యువజన సంఘాలు ప్రత్యక్ష ఆందోళనలో పాల్గొనడం, బుధవారం ఆంధ్రప్రదేశ్ వ్యాప్తంగా విద్యాసంస్థల బంద్‌కు పిలుపునిచ్చినట్లు తెలిపారు. మరోవైపు.. లాభాలు వస్తున్నప్పటికీ విశాఖ ఉక్కు పరిశ్రమను ప్రైవేటుకు అప్పగించాలని కేంద్ర ప్రభుత్వం చేస్తున్న ఆలోచనలు విరమించుకోవాలని ఈ సందర్భంగా విద్యార్థి సంఘాల నేతలు డిమాండ్‌ చేశారు. ఈ విశాఖ ఉక్కు ఫ్యాక్టరీకి ఇనుము, గనులు కేటాయించకపోవడం దారుణమని పేర్కొన్నారు. లక్షలాది మందికి ప్రత్యక్షంగా, పరోక్షంగా ఉపాధి కల్పిస్తున్న విశాఖ ఉక్కు పరిశ్రమను ప్రైవేటు వ్యక్తులకు విక్రయించాలని చూడటం పట్ల తీవ్ర స్థాయిలో విరుచుకుపడ్డారు. ఇక కడపలో ఉక్కు పరిశ్రమ ఏర్పాటు చేస్తామని రాష్ట్ర విభజన చట్టంలో పేర్కొన్నారని.. పదేళ్లు పూర్తవుతున్నా.. ఇంత వరకు దాన్ని రాయలసీమలో ఏర్పాటు చేయలేదని తెలిపారు. కడపలో ఉక్కు పరిశ్రమ ఏర్పాటైతే లక్షలాది మంది రాయలసీమ నిరుద్యోగులకు ఉద్యోగ అవకాశాలు వస్తాయని తెలిపారు.