ఎల్‌ అండ్‌ టీ చేతికి భోగాపురం ఇంటర్నేషనల్ ఎయిర్‌పోర్ట్‌ నిర్మాణ కాంట్రాక్ట్‌
Andhra Pradesh Telugu | Suryaa Desk | Published : Tue, Nov 07, 2023, 08:34 PM
విశాఖపట్నం సమీపంలోని భోగాపురం విమానాశ్రయ నిర్మాణానికి సంబంధించి క్రాంట్రాక్ట్‌పై క్లారిటీ వచ్చింది. ఈ అంతర్జాతీయ విమానాశ్రయ నిర్మాణ కాంట్రాక్టును జీఎంఆర్‌ గ్రూప్‌.. ఎల్‌ అండ్‌ టీ గ్రూప్‌ కంపెనీ ఎల్‌ అండ్‌ టీ కన్‌స్ట్రక్షన్‌కు అప్పగించింది. ఈపీసీ పద్దతిలో ఎల్‌ అండ్‌ టీ కన్‌స్ట్రక్షన్‌ ఈ విమానాశ్రయం నిర్మాణ పనులు పూర్తి చేస్తుంది. ఇంజినీరింగ్, ప్రొక్యూర్‌మెంట్, నిర్మాణ (ఈపీసీ) కాంట్రాక్టు తమ అనుబంధ సంస్థ ఎల్‌అండ్‌టీ కన్‌స్ట్రక్షన్‌కి లభించినట్లు వివరించింది.
అయితే ఈ కాంట్రాక్టు విలువ ఎంత అనే విషయాన్ని రెండు కంపెనీలు తెలియజేయలేదు. ఎల్‌ అండ్‌ టీ మాత్రం ఇది పెద్ద కాంట్రాక్ట్‌ అని పేర్కొంది. దీన్నిబట్టి ఈ కాంట్రాక్ట్‌ విలువ రూ.2,500 కోట్ల నుంచి రూ.5,000 కోట్ల మధ్య ఉంటుందని భావిస్తున్నారు. తొలి దశలో ఏటా 60 లక్షల మంది ప్రయాణికులు రాకపోకలు సాగించేలా భోగాపురం అంతర్జాతీయ విమానాశ్రయాన్ని నిర్మిస్తారు. తర్వాత దీన్ని 1.20 లక్షల ప్రయాణికులకు విస్తరిస్తారు.
నేవీ నిర్వహణలోని వైజాగ్‌ ఎయిర్‌పోర్టుకు ప్రత్యామ్నాయంగా ఈ కొత్త విమానాశ్రయాన్ని ఏర్పాటు చేస్తున్నారు. ఈ విమానాశ్రయం నిర్మాణంతో విశాఖ, ఉత్తరాంధ్ర ప్రాంతానికి ఆర్థికంగా ఎంతో మేలు జరుగుతుందని భావిస్తున్నారు. జీఎంఆర్‌ విశాఖపట్నం ఇంటర్నేషనల్ ఎయిర్‌పోర్టు లిమిటెడ్‌ పేరుతో జీఎంఆర్‌ గ్రూప్‌ ఈ కొత్త విమానాశ్రయ నిర్మాణం చేపడుతోంది.
|
|