రిజర్వేషన్లను 65 శాతానికి పెంచాలని బిహార్ నిర్ణయం.. కులగణన ఆధారణంగా నితీశ్ చర్యలు

రిజర్వేషన్ల విషయంలో బిహార్ సర్కార్ కీలక నిర్ణయం తీసుకుంది. బిహార్‌లో ప్రస్తుతం ఉన్న రిజర్వేషన్లను 65 శాతానికి పెంచాలని నిర్ణయించింది. ప్రస్తుతం బిహార్‌లో ఎస్సీ, ఎస్టీ, ఓబీసీ, ఈబీసీ వర్గాలకు కలిపి మొత్తం 55 శాతం వరకు రిజర్వేషన్లు ఉండగా.. వాటిని 65 శాతానికి పెంచాలని నితీశ్ కుమార్ సర్కార్ ప్రతిపాదించింది. ఇది ఆర్థికంగా బలహీన వర్గాలైన ఈడబ్ల్యూఎస్‌ వర్గాలకు కేంద్రం నిర్దేశించిన 10 శాతం రిజర్వేషన్లకు మినహయింపు అని పేర్కొంది. ఈ నేపథ్యంలోనే బిహార్‌ ప్రభుత్వం, కేంద్ర ప్రభుత్వం కల్పిస్తున్న రిజర్వేషన్లు కలిపి ఆ రాష్ట్రంలో మొత్తం రిజర్వేషన్లు 75 శాతానికి చేరుకోనున్నాయి.

అయితే ఈ రిజర్వేషన్ల పెంపుపై సంబంధిత నిపుణులతో సంప్రదించిన తర్వాత అవసరమైన చర్యలు తీసుకుంటామని బిహార్ ముఖ్యమంత్రి నితీష్‌ కుమార్‌ స్పష్టం చేశారు. బిహార్‌లో ప్రస్తుతం ఈ మార్పులు అమలు చేయాలనేది తమ ఉద్ధేశ్యమని పేర్కొన్నారు. అయితే ఈ క్రమంలోనే ఓబీసీ మహిళలకు కేటాయించిన 3 శాతం రిజర్వేషన్ల కోటాను రద్దు చేయాలని నిర్ణయించినట్లు నితీశ్ కుమార్ తెలిపారు. ఇక ఆర్థికంగా బలహీనవర్గాలకు చెందిన వారికి న్యాయ సర్వీసులు, ప్రభుత్వ న్యాయ కళాశాలలు, యూనివర్సిటీల్లో 10 శాతం రిజర్వేషన్లు అమలు చేయనున్నట్టు నీతీశ్‌ కుమార్ ప్రభుత్వం ఇటీవలే ప్రకటించింది.

ఇందులో భాగంగా షెడ్యూల్డ్‌ కులాలకు 20 శాతం రిజర్వేషన్‌ లభించనుంది. ఓబీసీ, ఈబీసీలకు కలిపి 43 శాతం రిజర్వేషన్లు దక్కనున్నాయి. ప్రస్తుతం ఓబీసీ, ఈబీసీ వర్గాలకు కలిపి 30 శాతం రిజర్వేషన్‌లు ఉండగా.. తాజా పెంపుతో అవి మరో 13 శాతానికి పెరగనున్నాయి. షెడ్యూల్డ్‌ తెగలకు 2 శాతం రిజర్వేషన్లను ప్రతిపాదించారు. దీంతో బిహార్‌లో రిజర్వేషన్లు 65 శాతానికి చేరుకోనున్నాయి. ప్రస్తుత ఈబీసీలకు 18 శాతం, ఓబీసీలకు 12 శాతం, ఎస్సీలకు 16 శాతం, ఎస్టీలకు ఒక శాతం రిజర్వేషన్‌లు ఉన్నాయి.

ఇటీవల నిర్వహించిన కులగణనకు సంబంధించిన నివేదికను బిహార్‌ అసెంబ్లీలో నితీశ్ కుమార్ ప్రభుత్వం ప్రవేశపెట్టింది. ఇది ప్రవేశపెట్టిన కొన్ని గంటల్లోనే నితీశ్ కుమార్ ఈ రిజర్వేషన్ల పెంపు నిర్ణయం తీసుకోవడం గమనార్హం. ఇక ఓబీసీ వర్గం వారిలో యాదవులు అధిక సంఖ్యలో ఉంటారు. ఇక బిహార్ రాష్ట్ర జనాభాలో యాదవులు 14.27 శాతం ఉన్నారు. ఇక తాజాగా నిర్వహించిన కులగణన ప్రకారం.. బిహార్‌‌లోని 13 కోట్ల జనాభాలో 36 శాతం మంది ఈబీసీలు.. 27.1 శాతం మంది బీసీలు.. 19.7 శాతం మంది ఎస్సీలు, 1.7 శాతం ఎస్టీలు ఉన్నారు. ఇక జనరల్ కేటగిరీలో 15.5 శాతం మంది ఉన్నారు. ఈ కులగణన ప్రకారం బిహార్‌లో 60 శాతానికి పైగా ప్రజలు వెనకబడిన, అత్యంత వెనకబడిన తరగతులకు చెందిన వారే ఉండటంతో రిజర్వేషన్లను కూడా 60 శాతానికి పైగా పెంచాలని నితీశ్ కుమార్ సర్కార్ ఈ ప్రతిపాదనను ముందుకు తీసుకువచ్చింది.