విజయవాడలోని మల్టీప్లెక్స్‌లో బూజు పట్టిన సమోసా.. సోషల్ మీడియా వీడియో వైరల్‌

విజయవాడలోని ఓ మల్టీప్లెక్స్‌లో బూజుపట్టిన సమోసా వ్యవహారం చర్చనీయాంశం అయ్యింది. సినిమాకు వెళ్లిన ఓ మహిళ ఇంటర్వెల్ సమయంలో ఆమె సమోసాలు కొనుగోలు చేయగా అవి బూజుపట్టి ఉన్నాయని ఆరోపించారు. ఆమె వీడియో వీసి సోషల్‌మీడియాలో పోస్ట్ చేయగా వైరల్‌గా మారింది. విజయవాడకు చెందిన ఓ మహిళ సోమవారం సాయంత్రం సినిమా చూసేందుకు కుటుంబ సభ్యులతో కలిసి విజయవాడ పటమటలోని మల్టీప్లెక్స్‌కు వెళ్లారు.

మహిళ ఇంటర్వెల్ సమయంలో అక్కడున్న స్టాల్‌లో సమోసాలు కొన్నారు. వాటిని తినడానికి ప్రయత్నించగా కుళ్లిన వాసన వచ్చింది. సమోసాను తుంపి చూడగా లోపల బూజు పట్టి ఉంది. దీంతో ఆమె వెంటనే కౌంటర్‌ దగ్గరికి వెళ్లి గట్టిగా నిలదీయగా సిబ్బంది పట్టించుకోలేదు. ఫుడ్‌ స్టాల్‌ నిర్వాహకులు, మల్టీప్లెక్స్‌ మేనేజర్‌ని అడిగినా స్పందన లేదు. ఈ తతంగాన్నంతా ఆమె వీడియో తీసి సోషల్‌మీడియాలో పోస్ట్ చేసింది. మరోవైపు ఈ గొడవ కారణంగా థియేటర్‌లో పడిపోయిన తన బైక్, ఇంటి తాళాలు తీసుకునేందుకు కూడా వారు లోపలికి అనుమతి ఇవ్వలేదని ఆ మహిళ ఆరోపిస్తోంది.

దీనిపై మల్టీప్లెక్స్‌ మేనేజ్‌మెంట్‌ స్పందిస్తూ.. సమోసాలు బాగోలేదని ఆమె చెప్పడంతో వేరేవి ఇస్తామని, లేదంటే డబ్బులు రిఫండ్ చేస్తామని తమ సిబ్బంది చెప్పినా ఆమె దుర్భాషలాడుతూ వెళ్లిపోయారని తెలిపారు. కాసేపటి తర్వాత వేరే వ్యక్తితో కలిసి వచ్చిన తన స్కూటీ, ఇంటి తాళాలు పోయాయని.. మీరే తీశారంటూ వాగ్వాదానికి దిగారని వెల్లడించారు. ఆమె తీరువల్ల వేరేవాళ్లు ఇబ్బంది పడుతుండటంతో పోలీసులకు తామే సమాచారం ఇచ్చామని.. వారి సమక్షంలో థియేటర్ మొత్తం వెతికినా తాళాలు కనిపించలేదన్నారు.

మహిళ వీడియో తీస్తూ ప్రేక్షకులను ఇబ్బంది పెడుతున్నారని మల్టీప్లెక్స్‌ నిర్వాహకులు స్టేషన్‌కు ఫోన్‌ చేయడంతో తాము అక్కడికి వెళ్లామని పటమట పోలీసులు తెలిపారు. ఈ ఘటనపై ఫిర్యాదు చేయమని ఆమెను కోరగా.. స్టేషన్‌ వరకు వచ్చిన ఆమె మళ్లీ వచ్చి ఫిర్యాదు చేస్తానని చెప్పి వెళ్లిపోయారని వివరించారు. మొత్తానికి ఈ వ్యవహారం సోషల్‌మీడియాలో వైరల్‌గా మారింది.