ఉమ్మడి పౌరస్మృతి అమలుకు సిద్ధమైన ఉత్తరాఖండ్.. అసెంబ్లీలో ఆమోదం తెలిపే అవకాశం

యూనిఫాం సివిల్ కోడ్‌-యూసీసీ అమలు దిశగా ఉత్తరాఖండ్‌లోని పుష్కర్ సింగ్ ధామీ నేతృత్వంలోని బీజేపీ ప్రభుత్వం తీవ్ర కృషి చేస్తోంది. ఈ క్రమంలోనే వచ్చే వారం జరగనున్న ఉత్తరాఖండ్ శాసనసభ సమావేశాల్లో ఈ యూనిఫాం సివిల్ కోడ్‌ బిల్లును ప్రవేశ పెట్టాలని భావిస్తోంది. పనిలో పనిగా ఈ సమావేశాల్లోనే ఈ ఉమ్మడి పౌరస్మృతి అమలు చేసేందుకు పుష్కర్ సింగ్ ధామీ సర్కార్ సిద్ధమైంది. ఉమ్మడి పౌర స్మృతి అమలుకు సంబంధించి సుప్రీంకోర్టు మాజీ జడ్జి జస్టిస్‌ రంజనాప్రకాశ్‌ దేశాయ్‌ నేతృత్వంలో ఏర్పాటైన ఐదుగురు సభ్యుల కమిటీ నివేదికను త్వరలో సమర్పించే అవకాశం ఉన్నట్లు తెలుస్తోంది. అయితే ఈ నివేదిక వచ్చిన తర్వాత అసెంబ్లీ ప్రత్యేక సమావేశాలు నిర్వహించి ఈ బిల్లుకు చట్ట రూపం తీసుకురావాలని పుష్కర్ సింగ్ ధామీ ప్రభుత్వం యోచిస్తోంది. ఒకవేళ అనుకున్న విధంగా జరిగి యూసీసీ అమల్లోకి వస్తే దేశంలోనే యూసీసీ అమలు చేస్తున్న తొలి రాష్ట్రంగా ఉత్తరాఖండ్‌ నిలవనుంది.

పెళ్లి, విడాకులు, వారసత్వం, దత్తత వంటి అంశాల్లో అన్ని మతాలకు ఒకే విధమైన చట్టం తీసుకురావడమే ఈ ఉమ్మడి పౌరస్మృతి చట్టం ప్రధాన ఉద్దేశం. లింగ సమానత్వం, పూర్వీకుల ఆస్తుల్లో కుమార్తెలకు కూడా సమాన వాటా వంటి అంశాలపై నిపుణుల కమిటీ దృష్టి పెట్టింది. దీంతోపాటు పెళ్లిళ్లకు స్త్రీల కనీస వయస్సు 21కు పెంచాలన్న డిమాండ్ వచ్చినా 18 కే కమిటీ పరిమితమైనట్లు తెలుస్తోంది. మరోవైపు.. లివ్ ఇన్ రిలేషన్‌లో ఉండే వారికోసం రిజిస్ట్రేషన్‌ తప్పనిసరి చేయనున్నట్లు సమాచారం. ఉత్తరాఖండ్‌ అసెంబ్లీ ఎన్నికల సమయంలో హామీ ఇచ్చిన నేపథ్యంలో బీజేపీ.. అందుకు అనుగుణంగానే అధికారంలోకి వచ్చిన వెంటనే 2022 మే నెలలో నిపుణులతో కమిటీని ఏర్పాటు చేసింది. ఆ కమిటీ నివేదిక రాగానే యూసీసీని అమలు చేస్తామని సీఎం పుష్కర్‌ సింగ్‌ ధామీ ఇప్పటికే చాలా సార్లు ప్రకటించారు. అయితే వచ్చే 3, 4 రోజుల్లో జస్టిస్ రంజనా ప్రకాష్ దేశయ్ నేతృత్వంలోని కమిటీ తన నివేదికను సమర్పించనున్నట్లు సమాచారం. అయితే కమిటీ నివేదిక సమర్పించిన తర్వాతే బిల్లులో ఏమేం వివరాలు ఉన్నాయనేది తెలియనుంది. అటు.. ఉత్తరాఖండ్‌లో యూసీసీ అమలు చేశాక.. 2024 ఎన్నికలకు ముందే గుజరాత్‌లోనూ ఇదే చట్టాన్ని అమలు చేయాలని బీజేపీ యోచిస్తోంది. అదే జరిగితే యూసీసీని అమలు చేసిన రెండో రాష్ట్రంగా గుజరాత్‌ నిలవనుంది. కానీ మన దేశానికి స్వాతంత్ర్యం రాక ముందు నుంచే గోవాలో యూనిఫాం సివిల్‌ కోడ్‌ అమలు అవుతుండడం గమనార్హం.