14 వేల అడుగుల ఎత్తులో విమానం.. రెండు కిటికీలు ధ్వంసం

ఇటీవల విమానాల్లో చోటు చేసుకుంటున్న భద్రతా పరమైన లోపాలు తీవ్ర దుమారానికి కారణం అవుతున్నాయి. విమానాల్లో జరిగిన సంఘటనలు కొన్ని అయితే సాంకేతిక లోపాలు తలెత్తిన సందర్భాలు కూడా పెరగడం తీవ్ర ఆందోళన కలిగిస్తోంది. అయితే ఇది కొన్నిసార్లు ఆయా ఎయిర్‌లైన్స్ అజాగ్రత్త, మరికొన్నిసార్లు యాదృచ్చికంగా జరుగుతున్నాయి. ఈ క్రమంలోనే తాజాగా జరిగిన ఘటన తీవ్ర భయందోళన కలిగిస్తోంది. ఎందుకంటే వేల అడుగుల ఎత్తులో ఉన్న ఓ విమానంలోని కిటికీలు దెబ్బతిన్నాయి. అయితే గాల్లో ఉండగా ఈ విషయాన్ని ప్రయాణికులు గుర్తించి ఎయిర్‌లైన్స్ సిబ్బందికి తెలియజేశారు. దీంతో అందులో ఉన్న ప్రయాణికులు ప్రాణాలు అరచేతిలో పెట్టుకుని బిక్కుబిక్కుమంటూ గడిపారు.

లండన్‌లోని స్టాన్స్టెడ్ ఎయిర్‌పోర్ట్ నుంచి ఫ్లోరిడా ఇంటర్నేషనల్‌ ఎయిర్‌పోర్టుకు బయల్దేరిన ఓ విమానంలో ఈ సంఘటన చోటు చేసుకుంది. విమానం గాలిలో ఉండగా రెండు కిటికీలు ధ్వంసం అయినట్లు అందులోని ప్రయాణికులు గుర్తించారు. దీంతో వెంటనే సిబ్బందిని అప్రమత్తం చేయడంతో ఆ విమానాన్ని వెనక్కి మళ్లించారు. ఎయిర్‌బస్ ఏ-321 జెట్‌‌లో ఈ ఘటన చోటు చేసుకుంది. ఆ విమానం 14500 అడుగుల ఎత్తులో ప్రయాణిస్తుండగా.. అందులోని రెండు విండోలకు చెందిన ఇన్నర్, ఔటర్ పేన్స్, రబ్బర్ సీల్స్ లేవనే విషయాన్ని ప్రయాణికులు గుర్తించారు. అయితే ఘటన జరిగిన సమయంలో అందులో 11 మంది ఎయిర్‌లైన్స్ సిబ్బంది, 9 మంది ప్రయాణికులు ఉన్నట్లు తెలుస్తోంది.

అమెరికాకు చెందిన లగ్జరీ హాలీడే కంపెనీ అయిన టీసీఎస్ వరల్డ్ ట్రావెల్ వినియోగిస్తుండగా దాన్ని టైటాన్ ఎయిర్‌వేస్ ఆపరేట్ చేస్తోంది. ఎయిర్ యాక్సిడెంట్స్ ఇన్వెస్టిగేషన్ బ్రాంచ్ విచారణ జరపడంతో ఈ ఘటన వెలుగులోకి వచ్చింది. విమానం టేకాఫ్ అయిన తర్వాత అందులో ఉన్న ఒక ప్రయాణికుడు గుర్తించి విమాన సిబ్బందికి చెప్పారు. అందులో ఒక కిటికీ చుట్టూ ఉన్న రబ్బర్ సీల్ ఊడిపోయి వేలాడుతూ కనిపించింది. దీంతో ఈ విషయాన్ని ఉన్నతాధికారులకు సమాచారం అందించారు.

అయితే ఆ విమానాన్ని ఈ ప్రయాణానికి ముందు రోజు ఒక సినిమా షూటింగ్‌ కోసం ఉపయోగించినట్లు తెలుస్తోంది. అయితే సినిమా షూటింగ్‌లో భాగంగా శక్తివంతమైన లైట్లు ఉపయోగించడం వల్ల విండోలు దెబ్బతిని ఉండవచ్చని ఎయిర్ యాక్సిడెంట్స్ ఇన్వెస్టిగేషన్ బ్రాంచ్ అనుమానం వ్యక్తం చేసింది. అయితే లైట్లకు, విమానం కిటికీలకు మధ్య దూరం కనీసం 10 మీటర్లు ఉండాలని.. అయితే సినిమా షూటింగ్ సమయంలో కేవలం 6 మీటర్ల నుంచి 9 మీటర్లే ఉంచారని ఏఏఐబీ గుర్తించింది. దీంతో ఈ విషయాన్ని సీరియస్‌గా తీసుకున్న ఏఏఐబీ మరింత లోతైన దర్యాప్తు చేస్తోంది.