టీడీపీ, జనసేన జాయింట్ మేనిఫెస్టో కమిటీ తొలి భేటీ,,,11 అంశాలతో మినీ మేనిఫెస్టో రూపకల్పన

వచ్చే ఎన్నికల్లో కలిసి పోటీ చేయాలని నిర్ణయించిన టీడీపీ-జనసేన.. ఉమ్మడి మేనిఫెస్టో రూపకల్పనకు కసరత్తు ప్రారంభించాయి. దసరా పర్వదినం రోజున టీడీపీ, జనసేన జేఏసీ తొలిసారి సమావేశం కాగా.. దీపావళి ముగిసిన మరుసటి రోజు.. జాయింట్ మేనిఫెస్టో కమిటీ తొలిసారి భేటీ అయ్యింది. ఈ కమిటీలో టీడీపీ తరఫున యనమల రామకృష్ణుడు, అశోక్ బాబు, పట్టాభి పాల్గొనగా.. జనసేన నుంచి వరప్రసాద్, ముత్తా శశిధర్, శరత్ కుమార్ పాల్గొన్నారు. ఉమ్మడి మేనిఫెస్టో రూపకల్పనలో భాగంగా.. టీడీపీ ఆరు అంశాలను ప్రతిపాదించగా.. జనసేన 5 అంశాలను ప్రతిపాదించింది. దీంతో 11 అంశాలతో మినీ మేనిఫెస్టోను రూపొందించామని ఇరు పార్టీల నేతలు తెలిపారు. వివిధ వర్గాల నుంచే వచ్చే ప్రతిపాదనలను పరిశీలించాక.. పూర్తి స్థాయిలో మేనిఫెస్టోను రూపొందిస్తామని నేతలు తెలిపారు.

యువతకు ఉపాధి కల్పించడంపై ఈ మేనిఫెస్టోలో ప్రధానంగా దృష్టి సారించినట్లు తెలుస్తోంది. స్టార్టప్‌ల ఏర్పాటుకు రూ.10 లక్షల వరకు రాయితీ ఇవ్వడం, ఆక్వా, ఉద్యాన, పాడి రైతులకు ప్రోత్సాహకాలు కల్పించడం, రాజధానిగా అమరావతిని కొనసాగించడం లాంటి అంశాలను మినీ మేనిఫెస్టోలో పొందుపర్చారు. పేదలకు ఉచితంగా ఇసుక ఇవ్వాలని, కార్మిక సంక్షేమం పట్ల శ్రద్ధ పెట్టాలని.. బీసీలకు అండగా నిలవాలని నిర్ణయించారు. మేనిఫెస్టోపై చంద్రబాబు నాయుడు, పవన్ కళ్యాణ్ ఫొటోలు ఉంటాయని.. సౌభాగ్యపథం అనే పథకాన్ని జనసేన ప్రతిపాదించిందని టీడీపీ నేత యనమల తెలిపారు. సౌభాగ్య పథం అనేది జనసేన షణ్ముఖ వ్యూహంలో భాగం. తెలంగాణలో దళిత బంధు కింద దళితులకు రూ.10 లక్షలు ఆర్థిక సాయం చేస్తున్న తరహాలోనే.. సౌభాగ్య పథం కింద.. యువతను పారిశ్రామికవేత్తలుగా తీర్చిదిద్దడం కోసం ఏటా నియోజకవర్గానికి 500 మంది చొప్పున.. ఒక్కొక్కరికి రూ.10 లక్షల చొప్పున ఆర్థిక సాయం చేయాలనేది ఈ పథకం ఉద్దేశం. ఈ మొత్తాన్ని తిరిగి చెల్లించాల్సిన అవసరం లేదు. అయితే ఈ పథకం కింద లబ్ధి పొందిన వ్యక్తి మరికొందరికి ఉపాధి కల్పించాలి. దీని వల్ల ఐదేళ్లలో యువత పారిశ్రామికవేత్తలుగా ఎదుగుతారని, ఉపాధి అవకాశాలు పెరగడం వల్ల వలసలను కట్టడి చేయొచ్చని జనసేన భావిస్తోంది.