పండగ పూట రచ్చ చేసిన మందు బాబు,,,,అడిగిన బ్రాండ్ ఇవ్వకపోవడంతో వైన్ షాప్‌కి నిప్పు
Andhra Pradesh Telugu | Suryaa Desk | Published : Mon, Nov 13, 2023, 08:31 PM
దీపావళి పండుగ రోజున.. విశాఖ నగరంలో ఓ మందు వీరంగం సృష్టించాడు. తాను అడిగిన బ్రాండ్ మద్యం ఇవ్వలేదనే కారణంతో పెట్రోల్ పోసి వైన్స్ షాప్‌కు నిప్పు అంటించాడు. వైజాగ్‌లోని కొమ్మాది జంక్షన్‌లో చోటు చేసుకున్న ఈ ఘటన వివరాల్లోకి వెళ్తే.. కొమ్మాదిలోని సాయిరాం కాలనీకి చెందిన గుమ్మడి మధు అనే వ్యక్తి వైన్ షాప్ దగ్గరకు వచ్చి.. ఓ బ్రాండ్ మద్యం కావాలని అడిగాడు. ఆ బ్రాండ్ తమ దగ్గర లేదని సిబ్బంది చెప్పారు. అప్పటికే ఫుల్లుగా మద్యం సేవించిన మధుకి ఆ మాటలు నచ్చలేదు. దీంతో ఆగ్రహానికి లోనై వాటర్ బాటిల్‌లో పెట్రోల్ నింపుకొని వచ్చాడు. పెట్రోల్‌ను వైన్ షాపు మీద చల్లి నిప్పంటించాడు. దీంతో క్షణాల్లో మంటలు అంటుకొని.. సుమారు రూ.2 లక్షల విలువైన 15 లిక్కర్ కేసులు, ప్రింటర్, కంప్యూటర్, స్కానర్, ఫ్రిజ్ కాలిపోయాయి. వైన్ షాప్ సిబ్బంది భయంతో బయటకు పరుగులు తీశారు. మంటలను ఆర్పేసిన స్థానికులు నిందితుణ్ని పట్టుకున్నారు. కాసేపటి తర్వాత ఘటనా స్థలానికి చేరుకున్న పోలీసులు నిందితుణ్ని అదుపులోకి తీసుకున్నారు. శనివారం కొమ్మాది ఏరియాలోనే మద్యం లోడ్‌తో వెళ్తున్న వాహనం బోల్తా పడింది. మందు బాటిళ్లు రోడ్డు మీద చెల్లాచెదురుగా పడిపోగా.. బాటిళ్లను తీసుకెళ్లడానికి జనం ఎగబడ్డారు. కాసేపట్లోనే మద్యం బాటిళ్లను మాయం చేశారు.
|
|