పాస్‌పోర్ట్ పేరుతో మహిళకు బురిడీ,,,,,అకౌంట్ నుంచి డబ్బులు మాయం

ఇటీవల కాలంలో సైబర్ మోసాలు పెరిగిపోతున్నాయి. తెలిసీ తెలియక చేసే తప్పులతో.. మోసగాళ్లు దోచుకునేందుకు అవకాశంగా మారుతోంది. బ్యాంకు అకౌంట్‌లను ఖాళీ చేసేందుకు రోజు రోజుకూ కొత్త మార్గాలు అన్వేషిస్తున్న కేటుగాళ్లు. విజయవాడ రామవరప్పాడుకు చెందిన ఓ మహిళకు పదేళ్ల నుంచి పాస్‌పోర్టు ఉంది. అయితే ఆమె అడ్రస్ మార్చి రెన్యువల్‌ చేసుకునేందుకు గత నెలలో విజయవాడలోని పాస్‌పోర్టు కేంద్రంలో దరఖాస్తు చేశారు. పాస్‌పోర్ట్ సిద్ధమైందని.. తర్వాత పోస్టులో ఇంటికి పంపిస్తామని అధికారులు చెప్పారు.

ఆ తర్వాత కొన్ని రోజులకు పోస్టల్‌ శాఖ నుంచి ఆమెకు ఓ మెసేజ్‌ వచ్చింది. రిజిస్టర్డ్‌ పోస్టులో కవర్‌ డిస్‌పాచ్‌ చేసినట్లు తెలిపారు. మూడు రోజులు చూసినా ఆమెకు పాస్‌పోర్ట్ కవర్‌ రాలేదు. దీంతో ఆమె ఆన్‌లైన్‌లోకి వెళ్లి పోస్టల్‌ శాఖను సంప్రదించేందుకు నంబరు కోసం వెతికారు. అందులో కనిపించిన ఓ సైట్‌లో తన సమస్యపై ఫిర్యాదు చేశారు. ఈ నెల 3న ఓ నంబరు నుంచి ఓ వ్యక్తి కాల్ చేశాడు.‌అడ్రస్ సరిగా లేదని, మార్చాల్సి ఉందని.. అందుకే రిజిస్టర్డ్‌ పోస్టు ఆలస్యమవుతోందని నమ్మించాడు.

ఈ సమస్య పరిష్కారం కావాలంటే పోస్టల్‌ శాఖకు రూ.5 యూపీఐ ద్వారా చెల్లించాలని ఫోన్‌ చేసిన వ్యక్తి చెప్పాడు. ఈ పేమెంట్ కోసం ఓ లింక్‌ పంపిస్తున్నట్లు చెప్పి దానిని 15 సెకన్లలో ఓ నంబరుకు పంపించమని చెప్పాడు. ఆ వ్యక్తి పంపించిన లింక్‌ను చెప్పిన సమయంలోగా పంపించేందుకు 14 సార్లు ప్రయత్నించినా సాధ్యం కాలేదు. చివరకు 15వ సారి పంపించగలిగింది. తర్వాత యూపీఐ ద్వారా రూ.5 చెల్లించింది. మరుసటి రోజే ఆమెకు పోస్టులో పాస్‌పోర్టు వచ్చింది. రూ.5 చెల్లించడం వల్లే వచ్చిందని ఆమె భావించారు.

ఇంతలో ఆమెకు ఎస్‌బీఐ నుంచి కాల్‌ వచ్చింది. 'మీ బ్యాంకు ఖాతా నుంచి రూ.లక్ష బదిలీ అయ్యాయి. మీరే చేశారా?' అని ప్రశ్నించారు. తాను చేయలేదని ఆమె చెప్పారు. అనుమానంతో తీరా బ్యాంకు స్టేట్‌మెంట్‌ను పరిశీలిస్తే.. తన అకౌంట్ నుంచి రూ.లక్ష డెబిట్‌ అయినట్లు చూసి అవాక్కయ్యారు. వెంటనే సైబర్‌ క్రైమ్‌ కస్టమర్ కేర్ నంబర్‌కు ఫోన్‌ చేసి అకౌంట్‌ను బ్లాక్‌ చేసి పోలీసులను ఆశ్రయించారు. ఎవరైనా ప్రభుత్వ శాఖకు సంబంధించిన సమాచారం ఫిర్యాదుల కోసం అధికారిక వెబ్‌సైట్‌, ఫోన్ నంబర్లు తెలుసుకుంటే మంచిందంటున్న పోలీసులు. లేకపోతే ఇలాగే మోసపోతారంటున్నారు. ఆన్‌లైన్‌లో కుప్పలు తెప్పలుగా ఉన్న నకిలీ సైట్లు ఉన్నాయి. ఈ విషయంలో జాగ్రత్తగా ఉండాలని పోలీసులు హెచ్చరిస్తున్నారు.