అటవీ విస్తీర్ణంలో పెరగడంలో తెలుగు రాష్ట్రాలు టాప్

తెలుగు రాష్ట్రాలు జీడీపీ వృద్ధిలోనే కాదు.. అటవీ విస్తీర్ణాన్ని పెంచడంలోనూ ముందంజలో ఉన్నాయి. 2019-21 మధ్య కాలంలో దేశంలో అత్యధిక అటవీ విస్తీర్ణత శాతం పెరిగిన రాష్ట్రాల జాబితాలో తెలంగాణ, ఆంధ్రప్రదేశ్ తొలి రెండు స్థానాల్లో నిలిచాయి. ఈ మధ్య కాలంలో తెలంగాణలో అటవీ విస్తీర్ణం 3.07 శాతం పెరగ్గా.. ఆంధ్రప్రదేశ్ అటవీ విస్తీర్ణం 2.22 శాతం పెరిగింది. ఒడిశాలో 1.04 శాతం పచ్చదనం పెరగ్గా.. బిహార్‌లో 1.03 శాతం పెరిగింది.

‘ది ఇండియన్ ఇండెక్స్’ ట్వీట్ ద్వారా ఈ విషయాలను వెల్లడించగా.. ఆ ట్వీట్‌ను వైఎస్సార్సీపీ కోట్ చేసింది. జగన్ సీఎం అయ్యాక అన్ని విభాగాలపై దృష్టి సారించి, ఏపీని అభివృద్ధి చేస్తున్నారని వైఎస్సార్సీపీ తెలిపింది. ‘అడ‌వుల ప‌రిర‌క్షణ‌కు అట‌వీ ప్రాంతాల్లో నివ‌సించే ప్రజ‌ల‌ను భాగ‌స్వాముల‌ను చేస్తూ.. రాష్ట్రంలో నాలుగు ద‌శాబ్దాలుగా అమ‌ల్లో ఉన్న భాగ‌స్వామ్య అటవీ యాజ‌మాన్య విధానాన్ని త‌న ప్రభుత్వంలో మ‌రింత ప్రభావ‌వంతంగా అమ‌లు చేస్తున్నారు. ఈ చ‌ర్యలు స‌త్ఫలితాలు ఇవ్వడం వ‌ల్లే అడ‌వుల విస్తీర్ణతా శాతం పెరిగిన రాష్ట్రాల‌లో ఏపీ రెండో స్థానంలో నిలిచింది’ అని వైఎస్సార్సీపీ ట్విటర్ ద్వారా వెల్లడించింది.

మరోవైపు తెలంగాణ ప్రభుత్వం ‘తెలంగాణకు హరితహారం’ కార్యక్రమం ద్వారా ఏటా కోట్లాది మొక్కలను నాటుతోన్న సంగతి తెలిసిందే. రాష్ట్రంలో పచ్చదనాన్ని 33 శాతానికి పెంచడమే లక్ష్యంగా కేసీఆర్ సర్కారు ముందుకు సాగుతోంది. హరితహారం పట్ల ప్రజల్లో అవగాహన కల్పిస్తూ.. మొక్కల పెంపకానికి విశేష ప్రాధాన్యం ఇస్తోంది. రోడ్లకు ఇరువైపులా, ఖాళీ స్థలాల్లో మొక్కలను నాటుతూ.. వాటి సంరక్షణకు ప్రత్యేక చర్యలు తీసుకుంటోంది.

2022లో కేంద్ర అటవీ, పర్యావరణ శాఖ విడుదల చేసిన ‘ఇండియా స్టేట్ ఆఫ్ ఫారెస్ట్ రిపోర్ట్ 2021’ నివేదిక ప్రకారం.. అటవీ విస్తీర్ణాన్ని పెంచడంలో ఏపీ, తెలంగాణ దేశంలోనే అగ్రస్థానంలో ఉన్నాయి. ఈ నివేదిక ప్రకారం.. దేశంలో 80.9 మిలియన్ హెక్టార్లలో అడవులు ఉన్నాయి. దేశ విస్తీర్ణంలో ఇది 24.62 శాతానికి సమానం. 2019తో పోలిస్తే దేశంలో 2261 చదరపు కిలోమీటర్ల మేర పచ్చదనం పెరిగింది. ఏపీలో 647 కిలోమీటర్ల అటవీ విస్తీర్ణం పెరగ్గా.. తెలంగాణలో 637 కి.మీ. మేర పచ్చదనం పెరిగింది.

దేశంలోని 17 రాష్ట్రాలు, కేంద్ర పాలిత ప్రాంతాల్లో 33 శాతానికిపైగా అడవులు ఉన్నాయని ఆ నివేదిక తెలిపింది. అత్యధిక విస్తీర్ణంలో అడవులు ఉన్న రాష్ట్రంగా మధ్యప్రదేశ్ నిలిచింది. అరుణాచల్ ప్రదేశ్, ఛత్తీస్‌గఢ్, ఒడిశా, మహారాష్ట్ర రాష్ట్రాలు తర్వాతి స్థానాల్లో ఉన్నాయి. భౌగోళిక విస్తీర్ణంలో శాతం పరంగా చూసుకుంటే.. మిజోరాంలో అత్యధికంగా 84.53 శాతం పచ్చదనం ఉండగా.. అరుణాచల్ ప్రదేశ్‌లో 79.33 శాతం, మేఘాలయలో 76 శాతం, మణిపూర్‌లో 74.34 శాతం, నాగాలాండ్‌లో 73.90 శాతం చొప్పున అడవులున్నాయి.