ఆ పార్టీల గురించి మాట్లాడబోను.... ప్రకాశ్ రాజ్

ఆంధ్రప్రదేశ్‌లో ప్రస్తుతం మారుతున్న రాజకీయ పరిణామాలపై అడిగిన ప్రశ్నకు ప్రకాశ్ రాజ్ స్పందించారు. ఏపీకి సీఎంగా జగన్ మోహన్ రెడ్డి, చంద్రబాబు నాయుడు, పవన్ కల్యాణ్‌లలో ఎవరు ఉండాలి అని కోరుకుంటున్నారని అడిగిన ప్రశ్నకు ఆయన సరికొత్త సమాధానాన్ని చెప్పారు. ప్రస్తుతం ఆంధ్రప్రదేశ్‌లో రాజకీయంగా ప్రభావవంతంగా ఉన్న వైసీపీ, టీడీపీ, జనసేన మూడు పార్టీలు బీజేపీ వెనకాల ఉన్నాయని తెలిపారు. బీజేపీ వెనకాల ఉన్న పార్టీల గురించి తాను మాట్లాడబోనని స్పష్టం చేశారు. ఇక బీజేపీ, జనసేన పొత్తుపైనా ప్రకాశ్ రాజ్ స్పందించారు.

ప్రస్తుతం తాను, పవన్ కల్యాణ్ ఒక సినిమాలో నటిస్తున్నట్లు చెప్పిన ప్రకాశ్ రాజ్.. ఆ సినిమా షూటింగ్‌లో భాగంగా రాజకీయాల గురించి పవన్ కల్యాణ్‌తో చర్చించినట్లు తెలిపారు. అయితే మతతత్వ పార్టీ అయిన బీజేపీతో ఎందుకు కలిశారు అని తాను అడిగిన ప్రశ్నకు పవన్ కల్యాణ్ సమాధానం ఇచ్చారని చెప్పారు. తమ రెండు పార్టీల మధ్య పొత్తుకు కొన్ని ప్రత్యేక కారణాలు ఉన్నాయని పవన్ కల్యాణ్ చెప్పినట్లు ప్రకాశ్ రాజ్ వెల్లడించారు. అయితే సినిమాల్లో పవన్ కల్యాణ్ తనకు మంచి మిత్రుడని.. అయితే రాజకీయాల్లో బీజేపీతో పవన్ కల్యాణ్ ఉన్నంత కాలం తాను అతనికి ఓటు వేయనని ప్రకాశ్ రాజ్ స్పష్టం చేశారు.

ఇక ఆంధ్రప్రదేశ్‌లో మాజీ సీఎం చంద్రబాబు నాయుడు అరెస్ట్ పైనా ప్రకాశ్ రాజ్ స్పందించారు. చంద్రబాబు నాయుడు గురించి ఎవరు ఎన్ని చెప్పినా ఆయన ఒక గొప్ప నాయకుడని పేర్కొన్నారు. అయితే చంద్రబాబు అరెస్ట్‌కు వ్యతిరేకంగా హైదరాబాద్‌లో నిర్వహించిన నిరసన ప్రదర్శనలకు తెలంగాణ ప్రభుత్వం అనుమతి ఇవ్వలేదు అని అడిగిన ప్రశ్నకు కూడా ప్రకాశ్ రాజ్ సమాధానం ఇచ్చారు. ప్రజలకు ఇబ్బంది కలిగించే విధంగా రోడ్లపై ఆందోళనలు చేయడం ఏంటని అన్నారు.