దీపావళి బోనస్‌ ఇవ్వలేదని ,,,,,,యజమాని అతి కిరాతకంగా హత్య

దీపావళి పండగకు బోనస్ డబ్బులు ఇవ్వలేదనే కోపంతో తమ యజమానిని ఇద్దరు వర్కర్లు అతి కిరాతకంగా హత్య చేసిన ఘటన మహారాష్ట్రలో సంచలనం సృష్టించింది. నిందితులు మధ్యప్రదేశ్ వాసులుగా పోలీసులు గుర్తించారు. అయితే బోనస్ డబ్బులు తర్వాత ఇస్తానని యజమాని చెప్పగా.. అందుకు ఒప్పుకోని ఆ ఇద్దరు నిందితులు తమకు ఇప్పుడే కావాలని పట్టుబట్టారు. దీనికి ఆ యజమాని అంగీకరించకపోవడంతో దారుణానికి తెగబడ్డారు. ఇద్దరూ కలిసి ఓనర్‌ను చంపేసి.. పారిపోయారు. ఈ ఘటనపై కేసు నమోదు చేసిన పోలీసులు నిందితుల కోసం గాలింపు చేపట్టారు.

మహారాష్ట్రలోని నాగ్‌పూర్‌లో ఈ ఘోరం చోటు చేసుకుంది. నాగ్‌పూర్‌ రూరల్‌ పోలీస్‌ స్టేషన్‌ పరిధిలోని కుహి ఫటా వద్ద ఉన్న ఓ దాబాలో శనివారం తెల్లవారుజామున ఈ ఘటన జరిగినట్లు పోలీసులు గుర్తించారు. ఆ దాబా ఓనర్‌ రాజు ధెంగ్రేను అందులో పనిచేసే ఇద్దరు వర్కర్లే అతి దారుణంగా హత్య చేశారు. నిందితులు ఇద్దరు మధ్యప్రదేశ్‌లోని మండ్లాకు చెందిన ఛోటు, ఆదిగా తేల్చారు. అయితే వీరు నెల రోజుల క్రితమే పనిలో చేరినట్లు పోలీసులు తెలిపారు. మధ్యప్రదేశ్‌లోని ఓ లేబర్‌ కాంట్రాక్టర్‌ ద్వారా ఛోటు, ఆదిని.. రాజు ధెంగ్రే తన దాబాలో పనికి పెట్టుకున్నట్లు తెలిసింది.

ఈ క్రమంలోనే తాజాగా దీపావళి పండగ రావడంతో బోనస్‌ డబ్బులు ఇవ్వాలని వారిద్దరూ రాజు ధెంగ్రేను అడిగారు. ఇటీవల రాజు ధెంగ్రేతో కలిసి అన్నం తింటుండగా.. దీపావళి బోనస్‌ల విషయంలో వారి మధ్య ఘర్షణ చోటు చేసుకుంది. ఇప్పుడు కాకుండా తర్వాత ఎప్పుడైనా ఇస్తానని వారికి రాజు ధెంగ్రే చెప్పినట్లు తెలుస్తోంది. అయితే బోనస్ డబ్బులు అడిగిన వెంటనే ఇవ్వలేదని కోపం పెంచుకున్న ఆ ఇద్దరు నిందితులు ఎలాగైనా రాజు ధెంగ్రేను చంపేందుకు కుట్ర పన్నినట్లు సమాచారం. దీంతో గొడవ జరిగిన అదే రోజు రాత్రి రాజు ధెంగ్రే నిద్రపోతున్న సమయంలో కిరాతకంగా కొట్టి చంపారు.

రాజు ధెంగ్రే మెడకు తాడుతో ఉరివేసి.. తలపై బండరాయితో కొట్టారు. అనంతరం అతనిపై పదునైన ఆయుధంతో దాడి చేసి ముఖం కనిపించకుండా ఛిద్రం చేశారు. రాజు ధెంగ్రేను హత్య చేసిన తర్వాత ఆయన మృతదేహాన్ని ఒక బెడ్‌షీట్‌లో చుట్టి.. ఆ యజమాని కారులోనే పరారయ్యారు. పారిపోయే క్రమంలో వారి కారుకు ప్రమాదం జరిగింది. విహార్‌ గావ్‌ వద్ద నాగ్‌పుర్‌-ఉమ్రెడ్‌ హైవేపై కారు డివైడర్‌ను ఢీకొట్టడంతో వారిద్దరికీ గాయాలయ్యాయి. దీంతో ఆ కారును అక్కడే వదిలేసి.. పారిపోతున్న దృశ్యాలు అక్కడే ఉన్న సీసీటీవీ కెమెరాల్లో రికార్డ్ అయ్యాయి. అయితే తన తండ్రి ఎంతకూ ఇంటికి రావడం లేదని చూసిన రాజు ధెంగ్రే కుమార్తె.. ఎన్నిసార్లు ఫోన్‌ చేసినా అతడు సమాధానం ఇవ్వలేదు. దీంతో ఆ దాబా పక్కన ఉన్న పాన్‌షాప్‌ యజమానికి ఫోన్ చేసి చెప్పింది. ఆ వ్యక్తి దాబాలోకి వెళ్లి చూడగా.. రాజు ధెంగ్రే రక్తపు మడుగులో పడి చనిపోయినట్లు గుర్తించాడు. వెంటనే పోలీసులు, కుటుంబ సభ్యులకు సమాచారం అందించాడు.