అనంత పద్మనాభ ఆలయంలో మరో అద్భుతం.. చనిపోయిన మొసలి స్థానంలో మరొకటి ప్రత్యక్షం

కేరళలో ఉన్న అనంత పద్మనాభ స్వామి ఆలయం గురించి దేశవ్యాప్తంగానే కాకుండా ప్రపంచ వ్యాప్తంగా చాలామందికి తెలిసిందే. ఆ ఆలయంలో టన్నుల కొద్ది బంగారం, వజ్రాలు, విగ్రహాలు ఉన్నాయంటూ కొన్నేళ్ల క్రితం బయటపడటం సంచలనంగా మారింది. ఈ క్రమంలోనే ఆ అనంత పద్మనాభ స్వామి ఆలయం గురించిన విషయాలు ఒక్కొక్కటిగా బయటికి వస్తున్నాయి. అయితే ఈ అనంత పద్మనాభ స్వామి ఆలయానికి మూలస్థానంగా పిలిచే కాసర్‌గోడ్ జిల్లాలోని కుంబ్లా వద్ద ఉన్న అనంతపుర ఆలయ సరస్సులో ఉండే ఒక మొసలి గతేడాది చనిపోయింది. అయితే ఆ సరస్సులో కొత్త మొసలి ప్రత్యక్షం కావడం ప్రస్తుతం తీవ్ర చర్చకు దారి తీసింది. అయితే అంతకుముందు చనిపోయిన మొసలి కంటే ముందు కూడా ఆ సరస్సులో ఇంకో మొసలి ఉండేదని.. అది చనిపోయిన తర్వాత గతంలో ఉన్న మొసలి ప్రత్యక్షం అయిందని చెబుతుంటారు.

కేరళ రాజధాని తిరువనంతపురంలో ఉన్న అనంత పద్మనాభ స్వామి ఆలయం.. అత్యంత ధనిక ఆలయంగా పేరు గాంచింది. ఆలయంలో బయటపడిన నేల మాళిగల్లో రాశుల కొద్దీ బంగారం, వజ్ర వైఢూర్యాలు, బంగారు విగ్రహాలు ఉన్నాయంటూ ఆలయ అధికారులు గుర్తించడంతో ఎన్నో శతాబ్దాలుగా ఉన్న ఆ ఆలయం.. గత కొన్నేళ్ల క్రితం విపరీతంగా వార్తల్లోకి ఎక్కింది. అయితే ఇంతటి సంపదతోపాటు ఆ గుడికి మరో విశిష్ఠతత కూడా ఉంది. ఈ ఆలయానికి మూలస్థానంగా భావించి అనంతపుర ఆలయ సరస్సులో 'బబియా' అనే మొసలి ఉండేది. అయితే ఆ మొసలి.. పూర్తిగా శాకాహారి అని.. భక్తులు ఇచ్చే పండ్లు, ఫలాహారాలు తప్ప ఇంకేమీ తినకుండా ఉండేదని ఆలయ అధికారులు చెబుతుంటారు. ఆలయానికి వచ్చే భక్తులు కూడా ఆ మొసలిని చూసి.. దానికి పండ్లు అందించేవారు. అయితే ఎన్నో ఏళ్ల పాటు ఆ చెరువులో ఉన్న 'బబియా' అనే ఆ మొసలి.. 2022 అక్టోబర్ 9 వ తేదీన మరణించింది.

అయితే చనిపోయిన బబియా స్థానంలో ప్రస్తుతం మరో కొత్త మొసలి ప్రత్యక్షం కావడంతో మరోసారి వార్తల్లో నిలిచింది. అయితే బబియా చనిపోయిన ఏడాది తర్వాత మరో మొసలి కనిపించడం ప్రస్తుతం తీవ్ర చర్చకు దారితీసింది. నవంబర్ 8 వ తేదీన సరస్సు వెంబడి ఉన్న ఒక గుహలో మొసలి ఉన్నట్లు కొందరు భక్తులు గమనించారు. ఈ విషయాన్ని ఆలయ అధికారులకు చెప్పడంతో వారు శనివారం దాన్ని గుర్తించారు. అనంతరం ఆలయ ప్రధాన పూజారికి చెప్పారు. అయితే ప్రస్తుతం కనిపిస్తున్న మొసలి చిన్నది అని.. ప్రధాన పూజారికి విషయం చెప్పామని.. ఆయన ఏం చెప్తే అది త్వరలోనే చేస్తామని తెలిపారు. అయితే ఈ సరస్సులో కొత్తగా మొసలి కనిపించడం ఇదే మొదటిసారి ఏమీ కాదని ఆలయ వర్గాలు చెబుతున్నాయి. గతేడాది చనిపోయిన బబియా అనే మొసలి వయసు 70 ఏళ్లకు పైనే ఉంటుందని పేర్కొన్నారు. దాని కంటే ముందు కూడా 2 మొసళ్లు ఆ సరస్సులో జీవించినట్లు తెలిపారు. ఒకప్పుడు ఆ సరస్సులో ఒక పెద్ద మొసలి ఉండేదని.. దాన్ని బ్రిటీష్ వారు కాల్చి చంపేశారని చెబుతారు. దాని తర్వాత అదే సరస్సులో మరో మొసలి ప్రత్యక్షమైందని.. అది కూడా చనిపోయిన తర్వాత బబియా అనే మొసలి వచ్చిందని పేర్కొన్నారు. అయితే ఈ బబియా అనే శాకాహార మొసలి.. ఆలయ పూజారి పెట్టే ప్రసాదంతోనే జీవించేదని.. ఎవరికీ ఎలాంటి హాని తలపెట్టేది కాదని తెలిపారు. కనీసం ఆ సరస్సులో ఉండే చేపలను కూడా తినేది కాదని వివరించారు. అయితే గతేడాది చనిపోయిన మొసలికి బబియా అనే పేరు కూడా ఎవరు పెట్టారో తెలియదని ఆలయ అధికారులు తెలిపారు. బబియా చనిపోయిన తర్వాత అంత్యక్రియలు చూసేందుకు రాజకీయ నేతలతో సహా వేలాది మంది భక్తులు వచ్చినట్లు చెప్పారు. ఇప్పుడు అదే స్థానంలో మరో మొసలి కనిపించడం అందర్నీ ఆశ్చర్యానికి గురి చేస్తోంది.